اردو ترجمہ · Urdu

( عبدالرحمن ) ابن و علہ مصری رحمہ اللہ سے روایت ہے ، انھوں نے حضرت عبداللہ بن عباس رضی اللہ عنہ سے اس شیرے ( رس ) کے متعلق پوچھا ، جو انگور سے نچوڑا گیا ہو تو حضرت ابن عباس رضی اللہ عنہ نے فرمایا : ایک آدمی نے رسول اللہ ﷺ کو شراب کی ایک مشک ہدیے میں دی تو آپ ﷺ نے فرمایا :’’ کیا تمھیں علم نہیں کہ یقیناً اللہ نے اسے حرام قرار دیا ہے ؟‘‘ اس نے کہا کہ نہیں ، تو اس کے پہلو میں ( موجود ) ایک شخص نے ( اس کے کان میں ) چپکے سے اس سے کوئی بات کہی تو رسول اللہ ﷺ نے فرمایا : تم نے اس سے کیا خفیہ بات کہی ہے ؟‘‘ وہ ( سرگوشی کرنے والا ) کہنے لگا کہ میں نے اسے حکم دیا تھا کہ اسے بیچ ڈالے تو رسول اللہ ﷺ نے فرمایا :’’ یقیناً وہ ذات جس نے اس کے پینے کو حرام قرار دیا ہے اس نے اس کی خرید و فروخت کو بھی حرام فرما دیا ہے ۔‘‘ چنانچہ اس آدمی نے دونوں مشکیزوں کے منہ کھول دیے یہاں تک کہ ان میں جو کچھ تھا وہ سب بہہ گیا ۔

اردو ترجمہ · Urdu

حضرت انس بن مالک رضی اللہ عنہ سے روایت ہے ، کہتے ہیں کہ میں حضرت ابوعبیدہ بن جراح ، ( اپنے سوتیلے والد ) حضرت ابوطلحہ انصاری اور حضرت ابی بن کعب رضی اللہ عنہ کو گدّر ( نیم پختہ کھجور ) اور خشک کھجور کی شراب پلا رہا تھا ۔ حضرت انس رضی اللہ عنہ کہتے ہیں : ( اتنے میں ) ان کے پاس ایک آنے والا آیا اور کہنے لگا کہ بلاشبہ شراب حرام کی جا چکی ہے تو حضرت ابوطلحہ رضی اللہ عنہ نے فرمایا : انس ! ( شراب کے ) ان مٹکوں کی طرف اٹھو اور انھیں توڑ ڈالو ۔ حضرت انس رضی اللہ عنہ کہتے ہیں کہ میں اپنے ایک ( وضو کے لیے ) کریدے ہوئے پتھر ( کے برتن ) کی طرف اٹھا اور اُس کے نچلے حصے کے ساتھ مٹکوں کو ضرب لگائی یہاں تک کہ وہ ( سب ) ٹوٹ گئے ۔

اردو ترجمہ · Urdu

حضرت محمود بن ولید رضی اللہ عنہ سے روایت ہے کہ بے شک حضرت عمر بن خطاب رضی اللہ عنہ جب ملک شام تشریف لائے تو اہل شام نے ان کے سامنے اس زمین کی وبا اور اس ( کی آب و ہوا ) کے ثقیل ہونے کا شکوہ کیا اور انھوں نے بتایا کہ ( اس وبائی علاقے اور ثقیل آب و ہوا کی وجہ سے ) ہمیں اس شراب کے سوا کوئی چیز موافق نہیں آتی تو حضرت عمر رضی اللہ عنہ نے فرمایا : تم شہد پیا کرو ۔ وہ کہنے لگے کہ شہد بھی ہمیں موافق نہیں ہے ۔ اہل علاقہ میں سے ایک شخص کہنے لگا کہ آپ اس بات میں رغبت رکھتے ہیں کہ ہم آپ کے لیے اس شراب میں سے کچھ تیار کریں جو نشہ آور نہ ہو ؟ انھوں نے فرمایا : ہاں ۔ چنانچہ انھوں نے اسے پکایا یہاں تک کہ اس کا دو تہائی حصہ ( جل کر ) ختم ہو گیا اور ایک تہائی بچ گیا ۔ پھر وہ اسے لے کر حضرت عمر رضی اللہ عنہ کے پاس آئے ، حضرت عمر رضی اللہ عنہ نے اس میں اپنی انگلی داخل کی ، پھر اسے اوپر اٹھایا تو وہ ( طلاء اور شیرہ ) انگلی کے پیچھے لمبا ہوتا چلا گیا ، ( گاڑھا ہونے کی وجہ سے انگلی کی ساتھ اس کی تار اور دھار سی بن گئی ) حضرت عمر رضی اللہ عنہ نے فرمایا : یہ تو طلاء ہے ، یہ تو اونٹوں کے طلاء ( اونٹوں کو ملے جانے والے گندھک کے سیال مادے ) کی طرح ہے ، پھر حضرت عمر رضی اللہ عنہ نے انھیں حکم دیا کہ وہ اسے پی لیا کریں تو حضرت عبادہ بن صامت رضی اللہ عنہ ان سے کہنے لگے : کیا آپ نے اللہ کی قسم ! ان کے لیے اس ( حرام چیز ) کو حلال قرار دے دیا ؟ تو حضرت عمر رضی اللہ عنہ نے فرمایا : ہرگز نہیں ، اللہ کی قسم ! ( پھر دعائیہ انداز میں عرض کرنے لگے کہ ) اے اللہ ! یقیناً میں نے ان کے لیے کوئی ایسی چیز حلال نہیں کی ، جسے تو نے ان پر حرام قرار دیا ہے اور نہ ہی میں نے ان پر کسی ایسی چیز کو حرام کیا ہے جسے تو نے ان کے لیے حلال کیا ہے ۔

اردو ترجمہ · Urdu

حضرت عبداللہ بن عمر رضی اللہ عنہ سے روایت ہے کہ اہل عراق میں سے کچھ لوگوں نے ان سے کہا : اے ابوعبدالرحمن ! بے شک ہم کھجوروں اور انگوروں کے پھل خریدتے ہیں ، پھر ہم ان سے شراب کشید کر کے اسے بیچ دیتے ہیں ، تو حضرت عبداللہ بن عمر رضی اللہ عنہ نے فرمایا : یقیناً میں اللہ کو ، اس کے فرشتوں اور ان تمام جنوں اور انسانوں کو جو ( میری بات ) سن رہے ہیں ، گواہ بنا کر کہتا ہوں کہ بلاشبہ میں نے تمھیں یہ حکم نہیں دیا کہ اسے بیچو اور اسے خریدو اور اسے کشید کرو اور اسے پیو اور اسے پلاؤ ۔ یقیناً یہ شراب گند ہے ( اوراس کا استعمال ) شیطان کے کام میں سے ہے ۔