اردو ترجمہ · Urdu

حضرت سائب بن یزید رضی اللہ عنہ سے روایت ہے کہ بے شک حضرت عمر بن خطاب رضی اللہ عنہ باہر نکل کر ان کے پاس آئے اور فرمایا : یقیناً میں نے فلاں شخص سے شراب کی بو محسوس کی ، تو اس نے کہا کہ یہ تو ’’ طِلاء ‘‘ یعنی انگوروں کا پکایا ہوا مشروب ہے اور میں اس چیز کے متعلق ( تم سے ) سوال کرنے والا ہوں جو اس نے پی ہے ۔ اگر تو یہ نشہ کرتی ہے تو میں اُسے کوڑے لگاؤں گا ، چنانچہ ( انھیں بتایا گیا کہ یہ نشہ آور ہے تو ) حضرت عمر بن خطاب رضی اللہ عنہ نے اسے مکمل کوڑے مارے ۔

اردو ترجمہ · Urdu

ثور بن زید دیلی رحمہ اللہ سے روایت ہے کہ بے شک حضرت عمر بن خطاب رضی اللہ عنہ نے شراب کے بارے میں مشورہ طلب کیا ، جسے کوئی شخص پی لیتا ہے تو حضرت علی بن ابی طالب رضی اللہ عنہ نے ان سے فرمایا : ہم خیال کرتے ہیں کہ آپ اسے اسی کوڑے لگائیں کیونکہ یقیناً وہ جب شراب پیے گا تو نشہ میں مبتلا ہو گا اور جب وہ نشے میں آئے گا تو ہذیان ( بیہودہ کلام ) بکے گا اور جب وہ بہکی بہکی باتیں کرے گا تو ( کسی پاکدامن جان پر زنا کی ) تہمت لگائے گا ( اور تہمت زنا میں بھی اسی کوڑے ہیں ، حضرت علی رضی اللہ عنہ نے یہی الفاظ کہے ) یا جیسا بھی انھوں نے کہا ( مطلب یہی تھا جو کہ بیان ہوا ہے ) تو حضرت عمر رضی اللہ عنہ نے شراب ( پینے کی سزا ) میں اسی کوڑے مارے ( اور انھیں جاری کر دیا ) ۔

اردو ترجمہ · Urdu

ابن شہاب رحمہ اللہ سے روایت ہے ، ان سے شراب پینے میں غلام کی حد کے بارے میں پوچھا گیا تو انھوں نے فرمایا : مجھے یہ خبر پہنچی ہے کہ یقیناً اس پر آزاد آدمی کی شراب والی حد کا نصف ہے اور بلاشبہ حضرت عمر بن خطاب رضی اللہ عنہ ، حضرت عثمان بن عفان رضی اللہ عنہ اور حضرت عبداللہ بن عمر رضی اللہ عنہ نے اپنے غلاموں کو اس حد سے نصف کوڑے لگائے ، جو آزاد آدمی کی شراب پینے میں ہے ۔

اردو ترجمہ · Urdu

یحیی بن سعید رحمہ اللہ سے روایت ہے ، انھوں نے سعید بن مسیب رحمہ اللہ کو یہ فرماتے ہوئے سنا : کوئی بھی چیز ( گناہ ، قصور اور جرم ) نہیں مگر اللہ تعالیٰ پسند فرماتے ہیں کہ اس سے درگزر کیا جائے ، جب تک کے وہ حد نہ ہو ۔