اردو ترجمہ · Urdu

محمد بن یحیی بن حبان رحمہ اللہ سے روایت ہے کہ بے شک ایک غلام نے کسی آدمی کے باغ سے کھجور کا چھوٹا سا پودا چرا لیا اور اسے اپنے آقا کے باغ میں لگا دیا ۔ اس پودے والا شخص اسے تلاش کرتا ہوا نکلا تو اس نے اسے پا لیا ۔ چنانچہ اس نے غلام کے خلاف مروان بن حکم ( جو حضرت معاویہ رضی اللہ عنہ کی طرف سے مدینہ کے امیر تھے ) سے مدد چاہی ، مروان بن حکم رحمہ اللہ نے غلام کو قید میں ڈال دیا اور چاہا کہ اس کا ہاتھ کاٹ ڈالے ، تو اس غلام کا آقا حضرت رافع بن خدیج رضی اللہ عنہ کی طرف گیا اور اس نے ان سے اس بارے میں پوچھا تو انھوں نے اسے خبر دی کہ یقیناً انھوں نے رسول اللہ ﷺ کو یہ فرماتے ہوئے سنا تھا :’’ نہ تو ’’ ثَمَر ‘‘ ( کھجور پر موجود پھل ) میں ہاتھ کاٹنے کی سزا ہے اور نہ ’’ کَثَر ‘‘ میں ۔‘‘ اور کثر سے مراد کھجور کی چربی ( اور گودا ) ہے ۔ وہ آدمی کہنے لگا : یقیناً مروان بن حکم نے میرا غلام پکڑ رکھا ہے اور اس کا ہاتھ کاٹنے کا ارادہ رکھتا ہے اور میں چاہتا ہوں کہ آپ میرے ہمراہ اس کے پاس چلیں اور اسے اس ( حدیث ) کی خبر دیں جو کہ آپ نے رسول اللہ ﷺ سے سنی ہے ، چنانچہ حضرت رافع رضی اللہ عنہ اس کے ہمراہ مروان بن حکم کی طرف چل پڑے اور ( جا کر مروان بن حکم سے ) پوچھا : کیا تم نے اس آدمی کا غلام پکڑا ہوا ہے ؟ انھوں نے کہا کہ : جی ہاں ۔ پھر انھوں نے کہا کہ : تم اس کے ساتھ کیا سلوک کرنے والے ہو ؟ انھوں نے کہا کہ میں اس کا ہاتھ کاٹ دینے کا ارادہ رکھتا ہوں ، تو حضرت رافع رضی اللہ عنہ اس سے کہنے لگے کہ میں نے رسول اللہ ﷺ کو سنا تھا کہ آپ ﷺ فرما رہے تھے :’’ نہ پھل میں ہاتھ کاٹنے کی سزا ہے اور نہ کھجور کی چربی میں ۔‘‘ چنانچہ مروان نے اس غلام کے متعلق حکم دیا ، تو اسے چھوڑ دیا گیا ۔

اردو ترجمہ · Urdu

حضرت سائب بن یزید رضی اللہ عنہ ( جو مدینہ میں فوت ہونے والے آخری صحابی تھے ) سے روایت ہے کہ بے شک حضرت عبداللہ بن عمرو بن ( عبداللہ ) حضرمی رضی اللہ عنہ اپنے غلام کو لے کر حضرت عمر بن خطاب رضی اللہ عنہ کے پاس آئے اور ان سے کہا : میرے اس غلام کا ہاتھ کاٹ دیجیے کیونکہ یقیناً اس نے چوری کی ہے ، حضرت عمر رضی اللہ عنہ نے پوچھا کہ اس نے کیا چرایا ہے ؟ وہ کہنے لگے : اس نے میری بیوی کا وہ آئینہ چرایا ہے جس کی قیمت ساٹھ درہم ہے تو حضرت عمر رضی اللہ عنہ نے فرمایا : اسے چھوڑ دو ، اس پر ہاتھ کاٹنے کی سزا نہیں ہے ۔ ( یہ ) تمھارا خادم ( ہی ہے جس ) نے تمھارا سامان چرایا ہے ۔

اردو ترجمہ · Urdu

ابن شہاب رحمہ اللہ سے روایت ہے کہ بے شک مروان بن حکم کے پاس ایک شخص لایا گیا جس نے کوئی سامان اُچک لیا ( جھپٹ کر چھینا اور بھاگ گیا ) ، چنانچہ انھوں نے اس کا ہاتھ کاٹنے کا ارادہ کیا تو حضرت زید بن ثابت رضی اللہ عنہ کی طرف پیغام بھیجا ، وہ ان سے اس کے متعلق سوال کر رہے تھے تو حضرت زید بن ثابت رضی اللہ عنہ نے فرمایا : اچانک اچک لی جانے والی چیز میں ہاتھ کاٹنے کی سزا نہیں ہے ۔

اردو ترجمہ · Urdu

( مدینہ منورہ کے قاضی ) ابوبکر بن محمد بن عمرو بن حزم رحمہ اللہ سے روایت ہے کہ انھوں نے ایک نبطی کو پکڑ لیا ، جس نے لوہے کی کچھ انگوٹھیاں چوری کی تھیں ۔ انھوں نے اسے قید میں ڈال دیا تاکہ اس کا ہاتھ کاٹ دیں تو عمرہ بنت عبدالرحمن نے اپنی آزاد کردہ لونڈی جسے اُمیہ کہا جاتا تھا ، کو ان کی طرف بھیجا ۔ ابوبکر بن محمد رحمہ اللہ کہتے ہیں : وہ میرے پاس آئی اس حال میں کہ میں لوگوں کے درمیان بیٹھا ہوا تھا ، وہ کہنے لگی کہ آپ کی خالہ عمرہ آپ سے کہتی ہیں کہ اے میرے بھانجے ! تم نے ایک نبطی کو پکڑ رکھا ہے ( اور وہ بھی ) ایک تھوڑی سی چیز ( کی چوری ) میں جو کہ میرے سامنے ذکر کی گئی ہے ، پھر ( کیا ) تم نے اس کا ہاتھ کاٹنے کا ارادہ بھی کر لیا ہے ؟ ( ابوبکر رحمہ اللہ کہتے ہیں کہ ) میں نے جواب دیا کہ جی ہاں ، تو وہ کہنے لگی : بے شک عمرہ آپ سے کہتی ہیں کہ ہاتھ کاٹنے کی سزا ( لاگوہی ) نہیں ہوتی مگر چوتھائی دینار یا اس سے زیادہ ( کی چوری ) میں ، ابوبکر رحمہ اللہ کہتے ہیں کہ ( یہ سنا تو ) میں نے نبطی کو چھوڑ دیا ۔