اردو ترجمہ · Urdu

نافع رحمہ اللہ سے روایت ہے کہ بے شک حضرت عبداللہ بن عمر رضی اللہ عنہ کے ایک غلام نے اس حال میں چوری کی کہ وہ بھاگا ہوا تھا ، تو ( اس کے پکڑے جانے کے بعد ) حضرت عبداللہ بن عمر رضی اللہ عنہ نے اسے حضرت سعید بن عاص رضی اللہ عنہ کی طرف بھیجا تاکہ وہ اس کا ہاتھ کاٹ دیں ، اور وہ ( ان دنوں حضرت معاویہ رضی اللہ عنہ کی طرف سے ) مدینہ منورہ کے امیر تھے تو حضرت سعید رضی اللہ عنہ نے اس کا ہاتھ کاٹنے سے انکار کر دیا اور کہا : بھاگا ہوا غلام جب چوری کرے تو اس کا ہاتھ کاٹا نہیں جائے گا تو حضرت عبداللہ بن عمر رضی اللہ عنہ نے ان سے فرمایا کہ تو نے کون سی کتاب اللہ ( کی آیت ) میں یہ ( مسئلہ ) پایا ہے ؟ پھر حضرت عبداللہ بن عمر رضی اللہ عنہ نے حکم دیا تو اس کا ہاتھ کاٹ دیا گیا ۔

اردو ترجمہ · Urdu

زُریق بن حکیم رحمہ اللہ ( یا حکیم رحمہ اللہ ) سے روایت ہے ، انھوں نے ایک بھاگا ہوا غلام پکڑا جس نے چوری کی تھی ، زریق کہتے ہیں کہ اس کا معاملہ مجھے مشکل محسوس ہوا ۔ وہ کہتے ہیں کہ پھر میں نے اس کے متعلق حضرت عمر بن عبدالعزیز رحمہ اللہ کی طرف ( پیغام ) لکھا ، میں اُن سے اس بارے میں سوال کر رہا تھا ، وہ اس وقت ( مسلمانوں کے خلیفہ اور ) والی تھے ۔ میں نے انھیں خبر دی کہ بے شک میں تو ( ہمیشہ یہی ) سنا کرتا تھا کہ غلام جب اس حال میں چوری کرے کہ وہ بھاگا ہوا ہو تو اس کا ہاتھ نہیں کاٹا جائے گا ۔ زریق رحمہ اللہ کہتے ہیں کہ حضرت عمر بن عبدالعزیز رحمہ اللہ نے میری طرف خط کا جواب لکھا ( جس میں ) وہ فرما رہے تھے : تم نے میری طرف یہ لکھا تھا کہ بے شک تم یہ سنا کرتے تھے کہ بھاگا ہوا غلام جب چوری کرے تو اس کا ہاتھ نہیں کاٹا جائے گا اور ( جبکہ ) بلاشبہ اللہ تعالیٰ اپنی کتاب میں ( اس کا استثناء کیے بغیر ) فرماتے ہیں : { وَ السَّارِقُ وَ السَّارِقَۃُ فَاقْطَعُوْٓا اَیْدِیَہُمَا جَزَآئً بِمَا کَسَبَا نَکَالًا مِّنَ اللّٰہِ وَ اللّٰہُ عَزِیْزٌ حَکِیْمٌ } ( المائدۃ 5 : 38 ) ’’ اور تم چوری کرنے والے مرد اور چوری کرنے والی عورت کے ہاتھ کاٹ دیا کرو ، یہ اللہ کی طرف سے اس گناہ کی عبرت ناک سزا ہے جو انھوں نے کیا ، اور اللہ خوب غالب اور بہت حکمت والا ہے ۔‘‘ لہٰذا اگر اس ( بھاگے ہوئے غلام ) کی چوری چوتھائی دینار یا اس سے زیادہ تک پہنچ جائے تو اس کا ہاتھ کاٹ دو ۔

اردو ترجمہ · Urdu

امام مالک رحمہ اللہ کو یہ خبر پہنچی کہ بے شک قاسم بن محمد رحمہ اللہ ، سالم بن عبداللہ اور عروہ بن زبیر رحمہ اللہ فرمایا کرتے تھے : جب بھاگا ہوا غلام وہ چیز چرائے جس میں ہاتھ کاٹنا واجب ہو تو اسے کاٹ دیا جائے گا ۔