اردو ترجمہ · Urdu

حضرت عبداللہ بن عمر رضی اللہ عنہ سے روایت ہے کہ بلاشبہ رسول اللہ ﷺ نے ایک ایسی ڈھال ( کی چوری ) میں ہاتھ کاٹا جس کی قیمت تین درہم تھی ۔

اردو ترجمہ · Urdu

عبداللہ بن عبدالرحمن بن ابی حسین مکی رحمہ اللہ سے روایت ہے کہ یقیناً رسول اللہ ﷺ نے فرمایا :’’ ( حد کے طور پر ) ہاتھ کاٹنا نہ تو اس پھل ( کی چوری ) میں لازم آتا ہے جو درخت ہی پر لٹکا ہوا ہو اور نہ ہی پہاڑ پر رہنے والی بکری میں ، ہاں جب اس ( جانور اور پھل ) کو باڑا یا کھلیان پناہ دے تو پھر ہاتھ کاٹنا اس چیز ( کی چوری ) میں ( لازم ) ہے جو ڈھال کی قیمت کو پہنچ جائے ۔‘‘

اردو ترجمہ · Urdu

عمرہ بنت عبدالرحمن رحمہ اللہ سے روایت ہے کہ یقیناً ایک چور نے حضرت عثمان بن عفان رضی اللہ عنہ کے زمانے میں ایک سنگترہ چرا لیا تو حضرت عثمان رضی اللہ عنہ نے حکم دیا کہ اس کی قیمت لگائی جائے ۔ چنانچہ بارہ درہم فی دینار ( والے ریٹ اور بھاؤ ) کے حساب سے اس کی قیمت تین درہم لگائی گئی تو حضرت عثمان رضی اللہ عنہ نے اس کا ہاتھ کاٹ دیا ۔

اردو ترجمہ · Urdu

سیدہ عائشہ رضی اللہ عنہا زوجہ پیغمبر ﷺ سے روایت ہے ، انھوں نے کہا کہ نہ تو مجھ پر لمبا زمانہ گزرا ہے اور نہ میں بھول کا شکار ہوئی ہوں ، ( مجھے اچھی طرح یاد ہے کہ ) ہاتھ کاٹنا دینار کے چوتھائی حصے یا اس سے زیادہ ( کی چوری ) میں ہے ۔

اردو ترجمہ · Urdu

عمرہ بنت عبدالرحمن رحمۃ اللہ علیہما سے روایت ہے ، کہتی ہیں : سیدہ عائشہ رضی اللہ عنہا زوجہ پیغمبر ﷺ مکہ کی طرف نکلیں ، ان کے ہمراہ ان کی دو آزاد کردہ لونڈیاں بھی تھیں اور ان کے ساتھ ( ان کے بھائی ) عبداللہ رحمہ اللہ بن ابی بکر صدیق رضی اللہ عنہ کی اولاد کا ایک غلام بھی تھا ۔ انھوں نے اپنی لونڈیوں کے ساتھ ایک چادر ( مدینہ منورہ واپس ) بھیجی ، جس میں ( مرُدوں کی یا ) پالانوں کی تصویریں تھیں ۔ اس چادر کے اوپر سے ( سبز کپڑا ) پھاڑا اور اسے نکال کر اس کی جگہ نمدہ یا پوستین رکھ دی ، پھر اس کے اوپر ( وہی سبز کپڑا چڑھا کر اُسے ) سی دیا ۔ جب وہ دونوں لونڈیاں مدینہ منورہ آئیں تو انھوں نے اس ( کپڑے میں پیک شدہ چیز ) کو اس چادر والوں کے سپرد کر دیا ( جن کی وہ امانت تھی ) ۔ انھوں نے جب اس ( کے اوپر ) سے کپڑا پھاڑا تو اس میں نمدہ پایا اور چادر نہ پائی ۔ چنانچہ انھوں نے ان دونوں لونڈیوں سے بات کی تو ان دونوں نے سیدہ عائشہ رضی اللہ عنہا سے ( اس بارے میں ) گفتگو کی ( یا مدینہ سے مکہ ) ان کی طرف ( پیغام ) لکھا اور اس غلام پر الزام لگایا ۔ اس غلام سے اس بارے میں پوچھا گیا تو اس نے اعتراف کر لیا ۔ چنانچہ سیدہ عائشہ رضی اللہ عنہا زوجہ پیغمبر ﷺ نے حکم دیا تو اس کا ہاتھ کاٹ دیا گیا اور سیدہ عائشہ رضی اللہ عنہا نے فرمایا : ہاتھ کاٹنا چوتھائی دینار یا اس سے زیادہ میں ہے ۔