اردو ترجمہ · Urdu

حضرت عبداللہ بن عمر رضی اللہ عنہ سے روایت ہے ، کہتے ہیں : یہودی رسول اللہ ﷺ کے پاس آئے ، پھر انھوں نے آپ ﷺ سے ذکر کیا کہ ان میں سے ایک مرد اور ایک عورت نے زنا کا ارتکاب کیا ہے ، تو رسول اللہ ﷺ نے فرمایا :’’ تم تورات میں رجم کے متعلق کیا ( لکھا ہوا ) پاتے ہو ؟‘‘ انھوں نے کہا ہے : ہم انھیں رسوا کرتے ہیں اور انھیں کوڑے مارے جاتے ہیں ۔ تو حضرت عبداللہ بن سلام رضی اللہ عنہ ( جو اسلام لانے سے قبل یہودی عالم تھے ) کہنے لگے : تم نے جھوٹ کہا ہے ، یقیناً تورات میں رجم مذکور ہے ۔ وہ تورات لے آئے اور اسے کھول دیا تو ان میں سے ایک نے رجم والی آیت پر ہاتھ رکھ لیا ، پھر اس سے پہلے اور اس کے بعد ( والی آیات تورات ) کو پڑھنے لگا ، سو حضرت عبداللہ بن سلام رضی اللہ عنہ فرمانے لگے : اپنا ہاتھ اٹھاؤ ، اس نے اپنا ہاتھ اٹھایا تو ناگہاں اس میں رجم والی آیت ( چمک رہی ) تھی ۔ چنانچہ وہ کہنے لگے : اے محمد ﷺ ! اس ( عبداللہ بن سلام رضی اللہ عنہ نے سچ کہا ہے ) ، واقعی اس میں رجم والی آیت ہے ، پھر رسول اللہ ﷺ نے ان دونوں کے متعلق حکم فرمایا تو وہ رجم کر دیے گئے ، حضرت عبداللہ بن عمر رضی اللہ عنہ کہتے ہیں : میں نے دیکھا کہ وہ آدمی عورت پر جھکا جا رہا تھا اور اسے پتھروں سے بچا رہا تھا ۔

اردو ترجمہ · Urdu

سعید بن مسیب رحمہ اللہ سے روایت ہے کہ بے شک اسلم قبیلے کا ایک آدمی ( حضرت ماعزاسلمی رضی اللہ عنہ ) حضرت ابوبکر صدیق رضی اللہ عنہ کے پاس آیا اور ان سے کہنے لگا : اس نالائق ( ذلیل ، کمینے ) نے زنا کر لیا ہے ۔ حضرت ابوبکر رضی اللہ عنہ نے اس سے فرمایا : کیا تم نے اس کا تذکرہ میرے سوا کسی اور کے سامنے کیا ہے ؟ اس نے کہا کہ نہیں ، تو حضرت ابوبکر رضی اللہ عنہ اس سے فرمانے لگے : تو پھر اللہ تعالیٰ کی طرف توبہ تائب ہو جاؤ اور اللہ کے پردے کے ساتھ پردہ ہی رکھو ( جب اللہ تعالیٰ نے تمھاری پردہ پوشی کی ہے تو تم اسے پردے ہی میں رہنے دو اور اللہ ہی کے حضور توبہ کر لو ) یقیناً اللہ اپنے بندوں کی توبہ قبول فرماتا ہے ۔ ( لیکن ) اس ( ماعز رضی اللہ عنہ ) کے جی نے اسے قرار نہ لینے دیا ( وہ بے چین ہی رہا ) یہاں تک کہ وہ حضرت عمر رضی اللہ عنہ کے پاس آیا ، پھر اس نے ان سے بھی اسی طرح کہا جیسا اس نے حضرت ابوبکر رضی اللہ عنہ سے کہا تھا تو حضرت عمر رضی اللہ عنہ نے بھی اس سے اسی طرح کہا ، جو حضرت ابوبکر رضی اللہ عنہ اس سے فرما چکے تھے ۔ سعید بن مسیب رحمہ اللہ کہتے ہیں : اس کے نفس ( دل ) نے اسے قرار نہ آنے دیا ( وہ بے قرار ہی رہا اور اس کی تسلی و تسکین نہ ہوئی ) یہاں تک کہ وہ رسول اللہ ﷺ کے پاس آ گیا اور آپ ﷺ سے عرض کرنے لگا : اس بدبخت نے زنا کر لیا ہے ۔ سعید بن مسیب رحمہ اللہ کہتے ہیں کہ رسول اللہ ﷺ نے اس سے اعراض کر لیا ( اور اپنا رخ انور اس سے پھیر لیا ، اس نے ) تین بار ایسا ہی کہا ، ہر بار رسول اللہ ﷺ اس سے منہ پھیرتے رہے ، یہاں تک کہ جب اس نے آپ ﷺ پر بہت ( اصرار سے اظہار اور اقرار ) کیا تو رسول اللہ ﷺ نے اس کے گھر والوں کی طرف پیغام بھیجا ( اور دریافت کروایا ) کہ ’’ کیا یہ بیمار ہے ؟ کیا اس کے ساتھ جنون ( اور پاگل پن لاحق ) ہے ؟‘‘ تو انھوں نے کہا : اے اللہ کے رسول ﷺ ! اللہ کی قسم ! یقیناً یہ بالکل صحیح ہے ، تو رسول اللہ ﷺ نے اس سے پوچھا :’’ کیا تم کنوارے ہو یا شادی شدہ ؟‘‘ اس نے کہا : بلکہ میں تو شادی شدہ ہوں اے اللہ کے رسول ! چنانچہ رسول اللہ ﷺ نے اس کے متعلق حکم فرمایا تو اسے رجم کر دیا گیا ۔

اردو ترجمہ · Urdu

یحیی بن سعید رحمہ اللہ ، سعید بن مسیب رحمہ اللہ رضی اللہ عنہ سے روایت کرتے ہیں ، انھوں نے کہا : مجھے یہ خبر پہنچی ہے کہ بے شک رسول اللہ ﷺ نے اسلم قبیلے کے ایک آدمی جسے ہزال کہا جاتا تھا ، سے فرمایا :’’ اے ہزال ! اگر تو اس ( ماعز رضی اللہ عنہ ) پر اپنی چادر کے ساتھ پردہ ڈال دیتا تو تیرے لیے بہتر ہوتا ۔‘‘ یحیی بن سعید رحمہ اللہ کہتے ہیں : میں نے ( ایک دفعہ ) یہ حدیث ایک ایسی محفل میں بیان کی جس میں ( حضرت ہزال رضی اللہ عنہ کے پوتے ) یزید بن نعیم بن ہزال اسلمی رحمہ اللہ موجود تھے ، تو وہ کہنے لگے کہ حضرت ہزال رضی اللہ عنہ میرے دادا تھے اور یہ حدیث ( بالکل ) سچ ہے ۔

اردو ترجمہ · Urdu

ابن شہاب رحمہ اللہ سے روایت ہے کہ بے شک ایک آدمی نے رسول اللہ ﷺ کے زمانے میں اپنے آپ پر چار بار زنا کا ارتکاب کیا اور اپنے خلاف چار بار گواہی دی ، تو رسول اللہ ﷺ نے اس کے متعلق حکم دیا ، چنانچہ اسے رجم کر دیا گیا ۔ ابن شہاب رحمہ اللہ کہتے ہیں : اسی ( حدیث ) کی وجہ سے آدمی کے اپنے خلاف اعتراف کر لینے کی بنا پر اس کا مؤاخذہ کیا جاتا ہے ۔

اردو ترجمہ · Urdu

عبداللہ بن ابی ملیکہ رحمہ اللہ سے روایت ہے کہ بلاشبہ ایک عورت رسول اللہ ﷺ کے پاس آئی اور اس نے آپ ﷺ کو خبر دی : یقیناً اس نے زنا کر لیا ہے اور وہ حاملہ بھی ہے ، تو رسول اللہ ﷺ نے فرمایا :’’ چلی جاؤ ، یہاں تک کہ بچے کو جنم دے دو ( تو پھر آنا ) ۔‘‘ چنانچہ جب اس نے بچہ جنا تو وہ آپ ﷺ کے پاس آ گئی ، تو آپ ﷺ نے فرمایا :’’ چلی جاؤ ، یہاں تک کہ اسے ( پرورش ، کفالت اور حفاظت کے لیے ) کسی کے سپرد کر دو ۔‘‘ عبداللہ بن ابی ملیکہ رحمہ اللہ کہتے ہیں : اس نے اسے ( کسی کے ) سپرد کیا ، پھر وہ آ گئی ، سو آپ ﷺ نے اس کے متعلق حکم دیا ، پھر اسے رجم کر دیا گیا ۔

اردو ترجمہ · Urdu

حضرت ابوہریرہ رضی اللہ عنہ اور حضرت زید بن خالد جہنی رضی اللہ عنہ سے روایت ہے کہ بے شک دو آدمی رسول اللہ ﷺ کے پاس جھگڑا لے کر آئے ۔ ان میں سے ایک نے عرض کیا : اے اللہ کے رسول ! ہمارے درمیان اللہ کی کتاب کے مطابق فیصلہ فرمائیے اور دوسرے نے جو ان میں سے زیادہ سمجھدار ( محسوس ہو رہا ) تھا ، کہا : جی ہاں ، اے اللہ کے رسول ! ہمارے درمیان کتاب اللہ پر فیصلہ کیجیے اور مجھے اجازت دیجیے کہ میں گفتگو ( کا آغاز ) کروں ، آپ ﷺ نے فرمایا :’’ بولو ۔‘‘ وہ کہنے لگا : بے شک میرا بیٹا اس شخص کے پاس مزدور تھا ، اس نے اس کی بیوی کے ساتھ زنا کر لیا تو مجھے ( کسی نے ) خبر دی کہ میرے بیٹے پر رجم ( کی سزا ) ہے ، تو میں نے اس کے فدیے میں سو بکریاں اور اپنی ایک لونڈی دے دی ، پھر بے شک میں نے اہل علم سے سوال کیا تو انھوں نے مجھے خبر دی کہ بے شک وہ سزا جو میرے بیٹے پر پڑتی ہے وہ تو سو کوڑے اور ایک سال کی جلاوطنی ہے ( کیونکہ وہ ابھی کنوارا ہے ) اور بلاشبہ رجم تو صرف اور صرف اس ( میرے ساتھی ) کی بیوی پر ہے ، تو رسول اللہ ﷺ نے فرمایا :’’ میں تمھارے درمیان ضرور ضرور اللہ ہی کی کتاب کے ساتھ فیصلہ کروں گا ۔ رہیں تیری بکریاں اور لونڈی تو وہ تجھ پر لوٹا دی جائیں گی ۔‘‘ اور آپ ﷺ نے اس کے بیٹے کو سو کوڑے لگوائے اور ایک سال کے لیے جلا وطن کر دیا اور حضرت انیس اسلمی رضی اللہ عنہ کو حکم دیا کہ وہ اس دوسرے شخص کی بیوی کے پاس جائیں ، پھر اگر تو وہ اعتراف کر لے تو اسے رجم کر دیں ، چنانچہ اس نے اعتراف کر لیا تو انھوں نے اسے رجم کر دیا ۔ امام مالک رحمہ اللہ نے فرمایا : ( حدیث کے لفظ ) ’’ اَلْعَسِیف ‘‘ سے مراد اجیر یعنی ( اجرت پر رکھا ہوا ) مزدور ہے ۔

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ بے شک حضرت سعد بن عبادہ رضی اللہ عنہ نے رسول اللہ ﷺ سے عرض کیا : مجھے بتائیے کہ اگر میں اپنی بیوی کے ساتھ کسی شخص کو دیکھ لوں تو کیا اسے مہلت دوں ، یہاں تک کہ چار گواہ لے آؤں ؟ تو رسول اللہ ﷺ نے فرمایا :’’ ہاں ۔‘‘

اردو ترجمہ · Urdu

حضرت عبداللہ بن عباس رضی اللہ عنہ سے روایت ہے ، کہتے ہیں کہ میں نے حضرت عمر بن خطاب رضی اللہ عنہ کو سنا ، وہ فرما رہے تھے : رجم اللہ کی کتاب میں برحق ہے ، اس شخص پر ( یہ لاگو ہو گا ) جس نے زنا کیا ، خواہ وہ مردوں میں سے ہو یا عورتوں میں سے ، ( بشرطیکہ ) جب وہ شادی شدہ ہو ( اور بشرطیکہ ) جب ( چار ) گواہ قائم ہوں ، یا حمل ( ظاہر ) ہو یا اعتراف ( کر لیا گیا ) ہو ۔

اردو ترجمہ · Urdu

حضرت ابوواقد لیثی رضی اللہ عنہ سے روایت ہے کہ بے شک حضرت عمر بن خطاب رضی اللہ عنہ کے پاس ایک آدمی آیا ، اس وقت وہ ملک شام میں تھے ۔ اس نے ان سے ذکر کیا کہ بے شک اس نے اپنی بیوی کے ساتھ ایک آدمی کو پایا ہے ، تو حضرت عمر بن خطاب رضی اللہ عنہ نے حضرت ابوواقد لیثی رضی اللہ عنہ کو اس کی بیوی کے پاس بھیجا ( تاکہ ) وہ اس سے اس بارے میں پوچھیں ( اور اگر وہ مان لے تو رجم ہو گی اور اگر انکار کر دے تو خاوند پر حد قذف یعنی تہمت کی حد لازم ہو گی ) چنانچہ وہ ( حضرت ابو واقد لیثی رضی اللہ عنہ ) اس کے پاس آئے اس حال میں کہ عورت کے اردگرد ( کئی ) عورتیں ( بیٹھی ہوئی ) تھیں ۔ انھوں نے اس کے سامنے وہ بات ذکر کی جو اس کے خاوند نے حضرت عمر بن خطاب رضی اللہ عنہ سے کہی تھی اور اسے بتلایا کہ بلاشبہ اس ( خاوند کے ) قول پر اس کا مؤاخذہ ( اور رجم کا نفاذ ) نہیں ہو سکتا اور وہ اسی طرح ( کے الفاظ کے ساتھ ) تلقین کرنے لگے ( اور اس کے علم میں لانے لگے ) تاکہ وہ اقرار سے باز رہے ( اور تنہائی میں توبہ تائب ہو جائے لیکن ) اس نے ( اقرار سے ) باز رہنے سے انکار کر دیا اور اعتراف پر قائم رہی تو حضرت عمر رضی اللہ عنہ نے اس کے متعلق حکم صادر فرما دیا سو اسے رجم کر دیا گیا ۔

اردو ترجمہ · Urdu

سعید بن مسیب رحمہ اللہ سے روایت ہے ، کہتے ہیں : جب حضرت عمر بن خطاب رضی اللہ عنہ ( 23ھ میں اپنے آخری حج سے فارغ ہو کر ) منی سے واپس لوٹے تو ابطح ( وادی محصب ) میں انھوں نے اونٹ کو بٹھایا ، پھر انھوں نے کنکریوں کا ایک ڈھیر بنایا ، پھر اس کے اوپر اپنی چادر ڈال دی ، پھر ( انھیں تکیہ یا بستر بنا کر پشت کے بل سیدھے ) چت لیٹ گئے ، پھر اپنے دونوں ہاتھ آسمان کی طرف ( پھیلاتے ہوئے ) بلند کر دیے اور ( دعا مانگتے ہوئے ) فرمایا : اے اللہ ! میری عمر بڑھ گئی ہے ، میری قوت ، ضعف کاشکار ہو گئی ہے اور میری رعایا ( دور دراز کے ممالک تک ) پھیل گئی ہے ۔ لہٰذا مجھے اپنی طرف قبض کر ( کے اٹھا ) لے ، اس حال میں کہ میں نہ ( تیرے احکام کو ) ضائع کرنے والا ہوں اور نہ ( عبادت اور نفاذِ اسلام میں ) کوتاہی کرنے والا ہوں ۔ پھر وہ مدینہ منورہ آ گئے اور لوگوں کو خطبہ دیا ۔ چنانچہ فرمایا : اے لوگو ! یقیناً تمھارے لیے سنتیں ( مشروع ، نافذ اور ) جاری کر دی گئی ہیں ، تم پر فرائض مقرر کر دیے گئے ہیں اور تمھیں ( اسلام کے ) ایک واضح راستے پر چھوڑ دیا گیا ہے ، الّا یہ کہ تم خود لوگوں کو لے کر دائیں بائیں بھٹک جاؤ اور ( پھر ) انھوں نے اپنا ایک ہاتھ دوسرے پر مارا ، پھر فرمایا : اپنے آپ کو اس سے بچاؤ کہ تم رجم والی آیت کے بارے میں ہلاکت میں پڑو کہ کوئی کہنے والا یہ کہنے لگے کہ ہم کتاب اللہ میں دو حدیں نہیں پاتے ( بلکہ قرآن میں تو صرف کوڑوں کا ذکر ہے ۔ رجم کا نہیں ، لہٰذا سنو ) یقیناً رسول اللہ ﷺ نے بھی رجم کیا اور ( آپ ﷺ کے بعد ) ہم نے بھی رجم کیا ، قسم ہے اس ذات کی جس کے ہاتھ میں میری جان ہے ! اگر یہ ڈرنہ ہوتا کہ لوگ کہیں گے عمر نے اللہ کی کتاب میں ( اپنی طرف سے ) اضافہ کر دیا ہے تو میں اس میں ( یہ آیت ) لکھ دیتا : ( اَلشَّیْخُ وَالشَّیْخَۃُ اِذَا زَنَیَا فَارْجُمُوْھُمَا الْبَتَّۃَ ) ’’ شادی شدہ مرد اور شادی شدہ عورت جب باہم زنا کریں تو انھیں ضرور رجم کر دو ۔‘‘ یقیناً ہم نے اسے ( نبی کریم ﷺ سے سن کر قرآن میں ) پڑھا تھا ( پھر اس کا حکم تو باقی رکھا گیا لیکن تلاوت منسوخ کر دی گئی ۔

اردو ترجمہ · Urdu

امام مالک رحمہ اللہ کو یہ خبر پہنچی کہ بے شک حضرت عثمان بن عفان رضی اللہ عنہ کے پاس ایک عورت کو لایا گیا ۔ جس نے ( شادی کے بعد ) چھ ماہ ( کے اخیر ) میں بچہ جنا تھا ، تو انھوں نے اسے رجم کرنے کا حکم صادر فرما دیا ۔ پھر حضرت علی رضی اللہ عنہ نے ( اس کے متعلق سن کر ) ان سے فرمایا : یہ رجم اس پر ( لاگو ) نہیں ہے کیونکہ اللہ تعالیٰ اپنی کتاب میں فرماتے ہیں : { وَحَمْلُہٗ وَفِصٰلُہٗ ثَلٰثوْنَ شَھْرًا } ( الاحقاف 46 : 15 ) ’’ اور اس ( بچے ) کا حمل اور اس کا دودھ چھڑانا تیس ماہ ( کی مدت پر مشتمل ) ہے ۔‘‘ اور فرمایا : { وَالْوَالِدٰتُ یُرْضِعْنَ اَوْلَادَھُنَّ حَوْلَیْنِ کَامِلَیْنِ لِمَنْ اَرَادَ اَنْ یُّـتِمَّ الرَّضَاعَۃَ } ( البقرۃ 2 : 233 ) ’’ اور مائیں اپنی اولاد کو ( زیادہ سے زیادہ ) مکمل دو سال ( یعنی چوبیس ماہ ) دودھ پلائیں ، ( یہ حکم ) اس شخص کے لیے ( ہے ) جو دودھ پلانے کی مدت پوری کرنا چاہے ۔‘‘ لہٰذا حمل چھ مہینے کا بھی ہوتا ہے ، پس اس عورت پر سنگساری ( کی سزا عائد ) نہیں ہے ۔ چنانچہ حضرت عثمان رضی اللہ عنہ نے اس کے پیچھے ( اسے واپس لانے کا پیغام ) بھیجا ، لیکن اس ( پیغام لے جانے والے ) نے اسے اس حال میں پایا کہ وہ رجم کی جا چکی تھی ۔

اردو ترجمہ · Urdu

امام مالک رحمہ اللہ نے ابن شہاب سے اس شخص کے متعلق سوال کیا جو قوم لوط والا عمل کرتا ہے تو ابن شہاب رحمہ اللہ نے فرمایا : اس پر رجم ( نافذ ) ہو گا شادی شدہ ہو یا غیر شادی شدہ ۔