اردو ترجمہ · Urdu

حضرت زید بن خالد جہنی رضی اللہ عنہ سے روایت ہے ، کہتے ہیں کہ ایک آدمی رسول اللہ ﷺ کی خدمت میں حاضر ہوا ، پھر اس نے آپ ﷺ سے لقطہ کے متعلق سوال کیا تو رسول اللہ ﷺ نے فرمایا :’’ اس کے برتن ، ( یا گٹھڑی یا تھیلا یعنی ہر وہ چیز جس میں سامان ڈالا ہوا ہو ) اور اس کے بندھن ( تسمہ ، رسی ، ڈھکن وغیرہ ) کی پہچان کر لو اور ایک سال تک اس کا اعلان کرو ، ( لوگوں کو ایک گم شدہ چیز ملنے کی خبر دیتے رہو ) پھر اگر اس کا مالک آ جائے ( تو اس سے نشانیاں پوچھ کر اسے واپس کر دو ) ورنہ اپنی حالت اس کے ساتھ لازم پکڑو ، ( یعنی جیسے دل کرتا ہے اسے استعمال کر لو ) ۔ وہ آدمی کہنے لگا : اے اللہ کے رسول ! گم شدہ بکری ( مل جائے تو کیا کروں ) ؟ آپ ﷺ نے فرمایا :’’ وہ تمھارے لیے ہے یا تمھارے بھائی کے لیے یا بھیڑیئے کے لیے ‘‘۔ اس نے پوچھا کہ ’’ گم شدہ اونٹ ‘‘؟ تو آپ ﷺ نے فرمایا :’’ تمھیں اس سے کیا واسطہ ؟ اس کے پاس اپنا مشکیزہ اور جوتا ہے ، وہ پانی پر وارد ہو گا اور درختوں سے کھاتا رہے گا ، یہاں تک کہ اس کا مالک اس کو پا لے گا ۔

اردو ترجمہ · Urdu

معاویہ بن عبداللہ بن بدر جہنی رحمہ اللہ سے روایت ہے ، انھیں ان کے والد ( حضرت عبداللہ بن بدر رضی اللہ عنہ ) نے خبر دی کہ انھوں نے ملک شام کی راہ میں کچھ لوگوں کے پڑاؤ کی جگہ پر ( ان کے جانے کے بعد ) پڑاؤ ڈالا تو انھوں نے ایک تھیلی پائی جس میں اسّی دینار تھے ، انھوں نے حضرت عمر بن خطاب رضی اللہ عنہ کے سامنے اس کا ذکر کیا تو حضرت عمر رضی اللہ عنہ نے ان سے فرمایا کہ : مسجدوں کے دروازوں پر اس کا اعلان کرو اور ایک سال تک ہر اس شخص سے اس کا ذکر کرو جو شام سے آئے پھر جب سال گزر جائے تو تمھیں اس پر اختیار ہے ( چاہو تو سنبھال رکھو اور چاہو تو استعمال کر لو ) ۔

اردو ترجمہ · Urdu

نافع رحمہ اللہ سے روایت ہے کہ بے شک ایک آدمی نے ایک گری پڑی چیز پا لی تو وہ اسے لے کر حضرت عبداللہ بن عمر رضی اللہ عنہما کے پاس آیا اور ان سے کہنے لگا : یقیناً میں نے ایک گری پڑی چیز پائی ہے ، آپ اس کے متعلق کیا خیال فرماتے ہیں ؟ تو حضرت عبداللہ بن عمر رضی اللہ عنہما نے اس سے فرمایا کہ اس کا اعلان کرتے رہو ، اس نے کہا کہ میں ایسا کر چکا ہوں ، انھوں نے کہا اور زیادہ کرو ، وہ کہنے لگا کہ میں نے وہ بھی کر لیا ہے تو حضرت عبداللہ بن عمر رضی اللہ عنہما فرمانے لگے : میں تمھیں اس کے کھا لینے کا حکم نہیں دوں گا اور اگر تم چاہتے تو اسے نہ پکڑتے ۔