اردو ترجمہ · Urdu

حضرت جابر بن عبداللہ انصاری رضی اللہ عنہما سے روایت ہے کہ بے شک رسول اللہ ﷺ نے فرمایا :’’ جو شخص کسی کو اس کے لیے اور اس کے ورثاء کے لیے عمرٰی دے تو بلاشبہ وہ اسی کا ( ہو جاتا ) ہے جسے عطا کیا گیا ہے ، وہ کبھی بھی اس شخص کی طرف واپس نہ لوٹے گا جس نے اسے دیا تھا ، کیونکہ بلاشبہ اس نے ایسا عطیہ دیا ہے کہ جس میں وراثت داخل ہو گئی ہے ۔

اردو ترجمہ · Urdu

عبدالرحمن بن قاسم رحمہ اللہ سے روایت ہے کہ انھوں نے مکحول دمشقی رحمہ اللہ کو سنا ، وہ ( ان کے والد ) قاسم بن محمد رحمہ اللہ سے عمرٰی کے متعلق سوال کر رہے تھے اور اس بارے میں بھی کہ لوگ عمرٰی کے متعلق جو باتیں کر رہے تھے ( کہ یہ جائز ہے یا ناجائز ) تو قاسم بن محمد رحمہ اللہ نے فرمایا : میں نے تو لوگوں کو اس ( صورتحال ) کے علاوہ کچھ ( اور ذہن رکھتے ہوئے ) نہیں پایا کہ وہ اپنی شرطوں پر ہی ( قائم رہتے اور شمار ) ہوتے ہیں ، اپنے مالوں میں بھی اور ان چیزوں میں بھی جو وہ دیے جائیں ۔

اردو ترجمہ · Urdu

نافع رحمہ اللہ سے روایت ہے کہ بے شک حضرت عبداللہ بن عمر رضی اللہ عنہما نے ( اپنی ہمشیرہ ام المؤمنین ) سیدہ حفصہ بنت عمر رضی اللہ عنہما سے ایک گھر وراثت میں پایا ۔ نافع رحمہ اللہ کہتے ہیں کہ سیدہ حفصہ رضی اللہ عنہا نے ( اپنے چچا ) حضرت زید بن خطاب رضی اللہ عنہ کی بیٹی کو ( وہ گھر ) رہائش کے لیے دے رکھا تھا ( اس شرط پر کہ ) جب تک وہ زندہ رہیں ( استعمال کرتی رہیں اور بعد از وفات یہ گھر ان کی طرف واپس آ جائے گا ) ، چنانچہ جب حضرت زید رضی اللہ عنہ کی بیٹی فوت ہو گئی تو حضرت عبداللہ بن عمر رضی اللہ عنہما نے اس گھر پر قبضہ کر لیا اور یہ سمجھا کہ بلاشبہ وہ گھر ( اب دوبارہ ) انھیں کا ہو گیا ) ہے ۔