اردو ترجمہ · Urdu

زید بن اسلم اپنے والد ( اسلم ) سے روایت کرتے ہیں کہ حضرت عمر بن خطاب رضی اللہ عنہ کے دو بیٹے حضرت عبداللہ اور عبیداللہ عراق کی طرف جانے والے ایک لشکر میں ( جہاد کے لیے ) نکلے ، جب وہ واپس آئے تو حضرت ابوموسیٰ اشعری رضی اللہ عنہ کے پاس سے گزرے جو اس وقت بصرہ کے امیر تھے ، انھوں نے دونوں کو خوش آمدید کہا ، پھر کہا کہ اگر میں کسی ایسے کام پر قدرت رکھتا جس کے ذریعے تمھیں نفع پہنچا سکتا تو ضرور ایسا کرتا ، پھر انھوں نے کہا کہ کیوں نہیں ( تمھارے نفع کا ایک کام میرے ذہن میں آ گیا ہے ) یہاں اللہ کے مال ( بیت المال ) میں سے کچھ مال موجود ہے ، میں اسے امیرالمومنین کی طرف بھیجنے کا ارادہ رکھتا ہوں ، میں وہ تم دونوں کو قرض دے دیتا ہوں ، تم اس سے عراق کے سامان اسباب میں سے کچھ سامان خرید لو ، پھر اسے مدینہ منورہ میں بیچ دینا ، اصل مال امیرالمومنین کو ادا کر دینا اور نفع تم دونوں کا ہو جائے گا ، دونوں نے کہا کہ ہم ( بھی ایسا ہی ) چاہتے ہیں ، چنانچہ انھوں نے ایسا ہی کیا اور حضرت عمر بن خطاب رضی اللہ عنہ کی طرف ایک خط لکھ دیا کہ وہ ان دونوں سے مال وصول کر لیں ، چنانچہ جب وہ دونوں ( مدینہ ) آئے تو انھوں نے ( عراق سے خریدا ہوا مال ) بیچ دیا اور نفع حاصل کر لیا ۔ پھر جب انھوں نے اسے امیرالمومنین کے سپرد کیا تو وہ فرمانے لگے : کیا حضرت ابوموسیٰ اشعری رضی اللہ عنہ نے پورے لشکر کو اس طرح قرض دیا جس طرح انھوں نے تمھیں قرض دیا ہے ؟ وہ بولے کہ نہیں ، تو حضرت عمر بن خطاب رضی اللہ عنہ فرمانے لگے : ( چونکہ تم ) دونوں امیرالمومنین کے بیٹے ہو اس لیے انھوں نے تمھیں قرض دیا ، ( میری رضا مندی چاہنے کے سوا اور کوئی سبب نظر نہیں آتا لہٰذا اس کے رشوت ہونے کا خدشہ ہے ) لہٰذا تم دونوں اصل مال بھی اور اس کا نفع بھی ادا کر دو ۔ حضرت عبداللہ رضی اللہ عنہ تو خاموش رہے ( بڑا بیٹا ہونے کے باوجود ، ادب و احترام اور ورع و تقویٰ کی بنا پر انھوں نے کچھ اعتراض نہ کیا ) لیکن عبیداللہ کہنے لگے کہ اے امیرالمومنین ! آپ کے لیے یہ مناسب نہیں ہے ، اگر یہ مال کم ہو جاتا ( اور گھاٹا پڑ جاتا ) یا ہلاک ہو جاتا تو ہم ہی اس کے ضامن ہوتے ( اور آپ ہم سے یہ قرض وصول کر لیتے ، لہٰذا نقصان ہم پر پڑنا تھا تو فائدہ بھی ہمارا ہو گا ، یہ ہبہ یا امانت نہیں ہے ، اگر یہ امانت ہوتا تو ہم ضامن نہ ہوتے بلکہ یہ تو یقیناً قرض ہے اور شرعی طور پر ہم اس میں کاروبار کرنے کے مجاز ہیں ) تو حضرت عمر رضی اللہ عنہ نے فرمایا کہ تم وہ ( سب اصل زر اور نفع ) ادا کر دو ، حضرت عبداللہ رضی اللہ عنہ ( اب بھی ) خاموش رہے ، اور عبیداللہ ان سے بحث کرنے لگے ۔ ( یہ بے ادبی نہ تھی بلکہ ایک شرعی اور علمی مسئلے پر بحث تھی جو کہ جائز ہے ) تو ( اتنے میں ) حضرت عمر رضی اللہ عنہ کے ہم نشینوں میں سے ایک شخص ( حضرت عبدالرحمن بن عوف رضی اللہ عنہ ) فرمانے لگے کہ اے امیرالمومنین ! اگر آپ اسے مضاربت شمار کر لیں ، چنانچہ حضرت عمر رضی اللہ عنہ نے فرمایا : ( ٹھیک ہے ) میں نے اسے مضاربت شمار کر لیا ، پھر حضرت عمر رضی اللہ عنہ نے اصل مال اور نصف نفع لے لیا اور حضرت عبداللہ بن عمر رضی اللہ عنہ اور عبیداللہ نے مال کا ( باقی ماندہ ) نصف نفع وصول کر لیا ۔

اردو ترجمہ · Urdu

علاء بن عبدالرحمن رحمہ اللہ اپنے والد ( عبدالرحمن بن یعقوب رحمہ اللہ ) سے اور وہ اس کے دادا ( یعنی اپنے بیٹے کے دادا اور اپنے والد یعقوب مدنی رحمہ اللہ ) سے روایت کرتے ہیں کہ بے شک حضرت عثمان بن عفان رضی اللہ عنہ نے انھیں ( یعقوب مدنی رحمہ اللہ کو ) مضاربت کے طور پر مال دیا جس میں وہ کام ( محنت اور کاروبار ) کریں گے ، ایک معاہدے پر کہ نفع دونوں کے درمیان ( نصف نصف تقسیم ) ہو گا ۔