اردو ترجمہ · Urdu

حضرت عبداللہ بن عمر رضی اللہ عنہما سے روایت ہے کہ بے شک ایک آدمی نے رسول اللہ ﷺ کے سامنے ذکر کیا کہ یقیناً اسے خرید و فروخت میں دھوکا دیا جاتا ہے تو رسول اللہ ﷺ نے اس سے فرمایا :’’ جب تو بیع کرنے لگے تو یہ کہہ دیا کر کہ ( اس بیع میں کوئی ) دھوکا ( قابل قبول ) نہیں ہے ۔‘‘ چنانچہ جب وہ آدمی خرید و فروخت کرتا تو یہ کہہ دیتا تھا کہ کوئی دھوکا نہیں ہے ۔

اردو ترجمہ · Urdu

یحیی بن سعید رحمہ اللہ سے روایت ہے ، انھوں نے سعید بن مسیب رحمہ اللہ کو یہ فرماتے ہوئے سنا : جب تم کسی ایسی زمین میں آؤ جہاں کے لوگ ماپ تول کو پورا کرتے ہوں تو وہاں اپنے قیام کو لمبا کرو اور جب تم کسی ایسی زمین میں آؤ جہاں لوگ ماپ تول میں کمی کرتے ہیں تو وہاں کم ٹھہرو ۔

اردو ترجمہ · Urdu

یحیی بن سعید سے روایت ہے ، انھوں نے محمد بن منکدر کو یہ فرماتے ہوئے سنا : اللہ تعالیٰ اس بندے سے محبت فرمائے جو اگر ( کچھ ) بیچے تو نرم ہوتا ہے ، اگر خریدے تو نرم ہوتا ہے ، اگر ( قرض وغیرہ کی ) ادائیگی کرے تو نرم رہتا ہے اور اگر ( قرض وغیرہ کی واپسی کا ) تقاضا کرے تو بھی نرمی دکھاتا ہے ۔

اردو ترجمہ · Urdu

امام مالک رحمہ اللہ نے ابن شہاب رحمہ اللہ سے اس شخص کے متعلق سوال کیا جو کوئی جانور کرائے پر لیتا ہے ، پھر اسے اس سے زیادہ کرائے پر آگے دے دیتا ہے کہ جس پر خود اس نے کرایہ دینا طے کیا تھا ، تو انھوں نے فرمایا : اس میں کوئی حرج نہیں ہے ۔