اردو ترجمہ · Urdu

امام مالک رحمہ اللہ کو یہ خبر پہنچی کہ بے شک حضرت عمر بن خطاب رضی اللہ عنہ نے اس شخص کے متعلق فرمایا جس نے دوسرے آدمی کو کچھ اناج اس شرط پر ادھار دیا کہ وہ اسے وہ اناج ایک دوسرے شہر میں ادا کرے گا تو حضرت عمر رضی اللہ عنہ نے اسے ناپسند کیا اور فرمایا کہ پھر بوجھ اٹھوانے ( اور بار برادری ) کی اجرت کہاں جائے گی ؟

اردو ترجمہ · Urdu

امام مالک رحمہ اللہ کو یہ خبر پہنچی کہ ایک آدمی حضرت عبداللہ بن عمر رضی اللہ عنہما کے پاس آیا ، وہ کہنے لگا کہ اے ابوعبدالرحمن ! بے شک میں نے ایک شخص کو کچھ ادھار دیا اور میں نے جو مال اسے دیا تھا اس سے افضل مال ( واپس ادا کرنے ) کی اس پر شرط لگا لی ، تو حضرت عبداللہ بن عمر رضی اللہ عنہما نے فرمایا کہ پھر یہ تو سود ہے ۔ وہ کہنے لگا کہ اے ابوعبدالرحمن ! آپ مجھے کیا حکم دیتے ہیں ؟ حضرت عبداللہ بن عمر رضی اللہ عنہما نے فرمایا : ادھار ( اور قرض ) تین قسم پر ہے ، ایک وہ قرض ہے جسے تم دو اور اس کے ذریعے سے تم اللہ کے چہرے ( کے دیدار اور رضامندی کے حصول ) کو چاہتے ہو ، تو تمھارے لیے اللہ کی رضامندی ( ہی لکھی جاتی ) ہے ، اور ایک وہ قرض ہے جسے تم اس لیے دو کہ تم اس کے ذریعے سے اپنے دوست کی رضا مندی چاہتے ہو تو تمھارے لیے تمھارے دوست کی رضا مندی ( ہی حاصل ہوتی ) ہے اور ایک وہ ادھار ہے جسے تم اس لیے ادھار دو تاکہ پاکیزہ مال کے عوض پلید مال حاصل کرو ، تو یہی سود ہے ، وہ آدمی ( پھر ) کہنے لگا کہ اے ابوعبدالرحمن ( عبداللہ بن عمر ) ! تو آپ مجھے کیا حکم دیتے ہیں ؟ انھوں نے فرمایا : میں یہ خیال کرتا ہوں کہ تم صحیفہ ( دستاویز ، اسٹام ، ثبوت والی تحریر ) پھاڑ ڈالو ، پھر اگر وہ ( قرض ادا کرتے وقت ) تمھیں اسی کی مثل دے جو تم نے اسے ادھار دیا تھا تو اسے قبول کر لو ، اور اگر وہ تمھیں اس سے گھٹیا چیز دے جو تم نے اسے قرض دی تھی اور تم اسے لے لو تو تمھیں اجر دیا جائے گا ( کیونکہ یہ تمھارا اس پر احسان ہو گا ) اور اگر وہ اپنے دل کی خوشی سے تمھیں اس سے بہتر ادا کرے جو تم نے اسے ادھار دیا تھا تو یہ شکریہ ہے ، اس نے ( ایسا کر کے ) تمھارا شکریہ ادا کیا ہے اور تمھیں اس کا اجر ملے گا ، جو تم نے اسے مہلت دی تھی ۔

اردو ترجمہ · Urdu

نافع سے روایت ہے ، انھوں نے حضرت عبداللہ بن عمر رضی اللہ عنہما کو یہ فرماتے ہوئے سنا : جس شخص نے کوئی قرض دیا تو وہ قرض ادا کرنے کے سوا کوئی شرط نہ لگائے ۔

اردو ترجمہ · Urdu

امام مالک رحمہ اللہ کو یہ خبر پہنچی کہ بے شک حضرت عبداللہ بن مسعود رضی اللہ عنہ فرمایا کرتے تھے کہ جس نے بھی کوئی قرض دیا تو وہ اس سے افضل ( چیز کو واپس لینے ) کی شرط نہ لگائے ، خواہ وہ ( زائد چیز اور شرط ) مٹھی بھر چارہ ہی ہو ، تو وہ سود ہی ہے ۔