اردو ترجمہ · Urdu

حضرت ابورافع رضی اللہ عنہ جو کہ رسول اللہ ﷺ کے آزاد کردہ غلام ہیں ، سے روایت ہے ، کہتے ہیں کہ رسول اللہ ﷺ نے ایک ( نوعمر ) اونٹ قرض لیا ، پھر آپ ﷺ کے پاس زکاۃ کے اونٹ آئے ۔ حضرت ابو رافع رضی اللہ عنہ کہتے ہیں کہ رسول اللہ ﷺ نے مجھے حکم فرمایا کہ میں ( قرض دینے والے ) آدمی کو اس کا اونٹ ادا کر دوں ، تو میں نے عرض کیا کہ میں ان اونٹوں میں چھ سالہ بہترین اونٹ کے سوا کچھ نہیں پاتا ( زکاۃ میں بڑی عمر والے اونٹ آئے ہیں جبکہ اس کا اونٹ چھوٹی عمر کا تھا ) تو رسول اللہ ﷺ نے فرمایا :’’ اسے وہی دے دو ، بلاشبہ لوگوں میں سب سے بہتر وہ شخص ہے جو ( قرض ) ادا کرنے میں ان میں سب سے بہتر ہو ۔‘‘

اردو ترجمہ · Urdu

مجاہد رحمہ اللہ سے روایت ہے ، انھوں نے کہا کہ یقیناً حضرت عبداللہ بن عمر رضی اللہ عنہما نے ایک آدمی سے کچھ درہم ادھار لیے ، پھر اسے ان سے بہتر درہم ادا کیے ، وہ آدمی کہنے لگا : اے ابوعبدالرحمن ! یہ درہم تو ان درہموں سے بہتر ہیں جو میں نے آپ کو قرض دیے تھے ( تو کیا یہ سود نہیں ہے ؟ ) چنانچہ حضرت عبداللہ بن عمر رضی اللہ عنہما نے فرمایا : مجھے اس کا علم ہے ، لیکن میرا دل اس پر ( راضی اور ) خوش ہے ۔