اردو ترجمہ · Urdu

عبید ابو صالح جو کہ سفاح کے آزاد کردہ غلام تھے ، سے روایت ہے انھوں نے کہا کہ میں نے ( مکہ و طائف کے درمیان ایک مقام ) ’’ دار نخلہ ‘‘ والوں کے ہاتھ اپنا کچھ کپڑا میعاد پر ( ادھار ) بیچا ، پھر میں نے ( حجاز سے عراق کی طرف ) کوفہ جانے کا ارادہ کیا ، ( ابھی ادھار والی میعاد نہیں آئی تھی ) تو ان لوگوں نے مجھے یہ تجویز پیش کی کہ میں ان کو کچھ قیمت معاف کر دوں تو وہ مجھے نقد ادائیگی کر دیں گے ، چنانچہ میں نے حضرت زید بن ثابت رضی اللہ عنہ سے اس کے متعلق سوال کیا تو انھوں نے فرمایا کہ میں تجھے یہ حکم نہیں دوں گا کہ تم اسے کھاؤ اور نہ ہی ( یہ کہوں گا کہ ) اسے کھلاؤ ۔

اردو ترجمہ · Urdu

حضرت عبداللہ بن عمر رضی اللہ عنہما سے روایت ہے ، ان سے اس شخص کے متعلق سوال کیا گیا جس کا دوسرے شخص پر ایک مقررہ وقت تک قرض ہو تو حقدار ( قرض خواہ ) اس ( مقروض ) سے کچھ قرض معاف کر دے اور وہ اسے نقد ادائیگی کر دے تو حضرت عبداللہ بن عمر رضی اللہ عنہما نے اسے ناپسند جانا اور اس سے منع فرما دیا ۔

اردو ترجمہ · Urdu

زید بن اسلم رحمہ اللہ سے روایت ہے ، انھوں نے کہا کہ دورِ جاہلیت کا سود اس طرح تھا کہ ایک آدمی کا دوسرے آدمی پر ایک مقرر وقت تک حق ہوتا ، پھر جب مقررہ مدت آ جاتی تو وہ ( قرض خواہ اس مقروض سے ) کہتا : ادائیگی کرو گے یا سود دو گے ، چنانچہ اگر تو وہ ادائیگی کر دیتا تو وہ اسے لے لیتا ورنہ اپنے حق میں اسی ( مقروض کے ذمے ) پر اضافہ کر دیتا اور اس سے مدت کو مزید مؤخر کر دیتا ۔