اردو ترجمہ · Urdu

حضرت عبداللہ بن عمر رضی اللہ عنہما سے روایت ہے کہ بے شک رسول اللہ ﷺ نے فرمایا :’’ جس شخص نے اناج خریدا تو وہ اسے آگے نہ بیچے ، یہاں تک کہ اسے پورا پورا حاصل کر لے ۔‘‘

اردو ترجمہ · Urdu

حضرت عبداللہ بن عمر رضی اللہ عنہما سے روایت ہے کہ یقیناً رسول اللہ ﷺ نے فرمایا :’’ جس شخص نے کوئی غلہ خریدا تو وہ اسے نہ بیچے یہاں تک کہ اسے قبضے میں لے لے ۔‘‘

اردو ترجمہ · Urdu

حضرت عبداللہ بن عمر رضی اللہ عنہما سے روایت ہے ، انھوں نے کہا کہ ہم رسول اللہ ﷺ کے زمانے میں اناج خریدتے تھے تو آپ ﷺ ہمارے پاس اس شخص کو ( مقرر کر کے ) بھیجتے جو ہمیں حکم دیتا کہ ہم اس غلے کو اس جگہ جس میں ہم نے اسے خریدا تھا ، سے کسی اور جگہ منتقل کر لیں ، پہلے اس سے کہ اسے آگے بیچیں ۔

اردو ترجمہ · Urdu

نافع سے روایت ہے کہ حضرت حکیم بن حزام رضی اللہ عنہ نے وہ غلہ خریدا جسے لوگوں کے لیے حضرت عمر رضی اللہ عنہ نے حکم فرمایا تھا ، پھر حضرت حکیم بن حزام رضی اللہ عنہ نے اسے پورا پورا لے لینے ( اور قبضہ کر لینے ) سے پہلے ہی اسے آگے بیچ دیا ، یہ بات حضرت عمر بن خطاب رضی اللہ عنہ کے پاس پہنچ گئی تو انھوں نے یہ غلہ انھیں واپس دے دیا اور فرمایا : جس اناج کو بھی خریدو اسے پورا وصول کر لینے سے قبل مت بیچو ۔

اردو ترجمہ · Urdu

امام مالک رحمہ اللہ کو یہ خبر پہنچی کہ ( حضرت معاویہ رضی اللہ عنہ کے دور میں مدینہ کے امیر اور گورنر ) مروان بن حکم رحمہ اللہ کے زمانے میں ( ساحل سمندر کے پاس ) ’’ جار ‘‘ نامی جگہ کے غلے کے متعلق لوگوں کے لیے چیک ( سندیں ) جاری ہوئے ۔ ( اس جگہ سرکاری غلے کے گودام تھے اور لوگوں کو سرکار کی طرف سے سالانہ یا ششماہی غلہ ملتا تھا ، جتنا غلہ ملنا ہوتا اس کا چیک کاٹ دیا جاتا یعنی مخصوص کاغذات پر حاکم دستخط کر دیتا ، اب کچھ لوگ وہ کاغذ جمع کروا کر اس کے عوض غلہ لے لیتے اور کچھ لوگ اس چیک کو دوسروں کے ہاتھ فروخت کر دیتے ) ، چنانچہ لوگوں نے ان ( کاغذات پر لکھے ہوئے غلے ) کو وصول کرنے سے پہلے ہی آپس میں ان کی خرید و فروخت شروع کر دی تو حضرت زید بن ثابت رضی اللہ عنہ اور اصحاب رسول ﷺ میں سے ایک شخص مروان بن حکم کے پاس گئے اور دونوں نے کہا کہ اے مروان ! کیا تم سود کی بیع کو حلال قرار دیتے ہو ؟ وہ کہنے لگے : میں ( اس سے ) اللہ کی پناہ میں آتا ہوں ، ہوا کیا ہے ؟ انھوں نے بتایا کہ یہ جو چیک ہیں ، لوگ انھیں ایک دوسرے سے خریدتے ہیں ، پھر انھیں ( یعنی ان سے حاصل شدہ غلہ ) حاصل کرنے سے پہلے ہی انھیں بیچ دیتے ہیں ۔ تو مروان بن حکم نے سپاہی بھیجے جو لوگوں سے ان چیکوں کو لے لیتے اور ان کے اصل مالکوں تک انھیں لوٹا دیتے تھے ۔

اردو ترجمہ · Urdu

امام مالک رحمہ اللہ کو یہ خبر پہنچی کہ ایک آدمی نے دوسرے آدمی سے ایک مقررہ مدت تک ( رقم کی ادائیگی کی میعاد مقرر کر کے ) غلہ خریدنے کا ارادہ کیا تو وہ دوسرا شخص جو اسے اناج بیچنا چاہتا تھا اسے بازار لے گیا اور اسے غلے کے ڈھیر دکھانے لگا اور کہنے لگا کہ تم ان میں سے کس کو پسند کرتے ہو کہ میں تیرے لیے اسے خرید لوں ( یعنی اس آدمی کے پاس خود تو کچھ بھی نہ تھا لیکن اس نے باتوں باتوں میں اپنے ساتھی کو پھنسا کر غلے کے دام طے کر لیے ) تو وہ خریدار ( پہلا شخص ) کہنے لگا کہ کیا تم مجھے وہ چیز بیچنا چاہتے ہو جو تمھارے پاس نہیں ہے ؟ ( تمھاری ملکیت میں نہیں ہے اور ایسا کرنا تو شریعت میں حرام ہے ، تو اس نے گویا بیع کے واقع ہونے ہی سے انکار کر دیا ، لیکن یہ چالاک شخص اڑ گیا اور کہنے لگا کہ چونکہ بات طے ہو چکی ہے اس لیے تمہیں مجھ سے غلہ لینا ہی پڑے گا ) ، چنانچہ وہ دونوں حضرت عبداللہ بن عمر رضی اللہ عنہما کے پاس آئے اور ان کے سامنے اس کا تذکرہ کیا تو حضرت عبداللہ بن عمر رضی اللہ عنہما نے اس خریدار سے فرمایا : تم اس سے وہ چیز مت خریدو جو اس کے پاس ( اس کی ملکیت میں ) نہیں ہے اور بیچنے والے سے کہا کہ اسے مت بیچو وہ چیز جو تمھارے پاس نہیں ہے ۔

اردو ترجمہ · Urdu

یحیی بن سعید رحمہ اللہ سے روایت ہے ، انھوں نے جمیل بن عبدالرحمن رحمہ اللہ کو سنا جو کہ ( مدینہ منورہ میں ) مؤذن تھے ، وہ سعید بن مسیب رحمہ اللہ سے عرض کر رہے تھے کہ بے شک میں ایک ایسا شخص ہوں جو کہ لوگوں کو ’’ جار ‘‘ نامی جگہ پر ( سرکار کی طرف سے ) جو غلے دیے جاتے ہیں ان میں سے جتنا اللہ چاہے ( اور جتنی توفیق اور وسعت دے ) میں ( اسے ) خرید لیتا ہوں ، پھر میں چاہتا ہوں کہ میں خود ضامن بن کر اس اناج کو ( لوگوں کے ہاتھ اس مال کی ادائیگی کی ) ایک میعاد مقرر کر کے بیچ دوں ، تو سعید بن مسیب رحمہ اللہ نے فرمایا : کیا تم یہی چاہتے ہو کہ لوگوں کو انھی غلوں سے ادا کرو گے جسے تم نے خریدا تھا ؟ جمیل نے کہا کہ جی ہاں ، تو انھوں نے اس کو اس سے روک دیا ۔