اردو ترجمہ · Urdu

ربیعہ بن ابی عبدالرحمن رحمہ اللہ سے روایت ہے کہ حضرت زبیر بن عوام رضی اللہ عنہ نے ایک غلام خریدا ، پھر اسے آزاد کر دیا ، اس غلام ( کی حالت غلامی میں ایک آزاد عورت سے شادی ہو چکی تھی اور اس ) کے لیے ( اس ) آزاد عورت سے کچھ بیٹے تھے ۔ پھر جب حضرت زبیر رضی اللہ عنہ نے اسے آزاد کیا تو کہا کہ وہ ( بیٹے بھی ) میرے مولیٰ ہیں ( اور ان کا تعلق ولاء بھی میرے ساتھ قائم ہو گا ) لیکن ان بیٹوں کی ماں ( آزاد عورت ) کے رشتہ داروں نے کہا کہ یہ ہمارے مولیٰ ہیں ، چنانچہ وہ ( سب ) حضرت عثمان بن عفان رضی اللہ عنہ کے پاس یہ جھگڑا لے کر آئے تو حضرت عثمان رضی اللہ عنہ نے ان کی ولاء کا فیصلہ حضرت زبیر رضی اللہ عنہ کے حق میں کر دیا ۔

اردو ترجمہ · Urdu

امام مالک رحمہ اللہ کو یہ خبر پہنچی کہ سعید بن مسیب رحمہ اللہ سے اس غلام کے متعلق سوال کیا گیا جس کی کسی آزاد عورت سے کچھ اولاد ہو تو ان بچوں کی ولاء کس کا حق ہے ؟ تو سعید رحمہ اللہ نے فرمایا : اگر ان بچوں کا باپ مر جائے اس حال میں کہ وہ غلام ہی ہو اور آزاد نہ ہو تو پھر ان بچوں کی ولاء ان کی ماں کے رشتہ داروں کے لیے ہو گی ۔