اردو ترجمہ · Urdu

سیدہ عائشہ رضی اللہ عنہا سے روایت ہے کہ حضرت ابوجَہْم بن حذَیفہ رضی اللہ عنہ نے رسول اللہ ﷺ کو ملک شام کی بنی ہوئی ایک ( دھاری دار سُرخ یا سیاہ ، باریک ) چادر کا ہدیہ پیش کیا جس میں نشانات ( یعنی نقش و نگار ) تھے ، آپ ﷺ اسی چادر میں نماز کے لیے حاضر ہوئے ، پھر جب نماز سے فارغ ہوئے تو ( سیدہ عائشہ رضی اللہ عنہا سے ) فرمایا :’’ اس چادر کو ابوجَہْم ہی کی طرف واپس لوٹا دو ، کیونکہ میں نے نماز میں اس کے بیل بوٹوں کو دیکھا ( یعنی میری نظر اس کے نقش و نگار کی طرف چلی گئی ) تو قریب تھا کہ یہ مجھے فتنے میں ڈال دیتی ( یعنی اللہ اور نماز سے غافل کر دیتی ) ۔‘‘

اردو ترجمہ · Urdu

ہشام بن عروہ رحمہ اللہ سے روایت ہے ، وہ اپنے والد عُروہ رحمہ اللہ سے روایت کرتے ہیں کہ بلاشبہ رسول اللہ ﷺ نے ایک ( باریک ، دھاری دار سرخ یا سیاہ ) چادر پہنی جس میں نشان ( بیل بوٹے ) تھے ، پھر آپ ﷺ نے وہ چادر حضرت ابوجَہْم رضی اللہ عنہ کو دے دی اور ابوجَہم رضی اللہ عنہ سے ان کی موٹی اُونی چادر لے لی ، انھوں نے عرض کیا کہ اے اللہ کے رسول ! آخر ایسا کیوں ؟ تو آپ ﷺ نے فرمایا :’’ یقیناً نماز میں میری نظر اس کے نقش و نگار کی طرف چلی گئی تھی ۔‘‘

اردو ترجمہ · Urdu

عبداللہ بن ابی بکر رضی اللہ عنہ ( بن محمد بن عمرو بن حزم ) سے روایت ہے کہ حضرت ابو طلحہ انصاری رضی اللہ عنہ اپنے ایک باغ میں نماز پڑھ رہے تھے کہ ایک فاختہ نما ( یا کبوتر نما خاکی ) پرندہ اُڑا ، ( چونکہ باغ بہت ہی گھنا تھا اس لیے ) وہ اِدھر اُدھر اڑ کر نکلنے کی راہ ڈھونڈنے لگا ، حضرت ابوطلحہ انصاری رضی اللہ عنہ ( زید بن سہل ) رضی اللہ عنہ کو اس منظر نے حیرت ( و خوشی ) میں ڈال دیا ، تو انھوں نے بھی کچھ دیر تک اس کے پیچھے اپنی نگاہ کو دوڑانا شروع کر دیا ، پھر جب وہ اپنی نماز کی طرف لوٹے ( اور دوبارہ نماز کی طرف متوجہ ہوئے ) تو ناگہاں وہ ( تو بھول کا شکار ہو چکے تھے اور وہ ) یہ نہ جان سکے کہ کتنی نماز پڑھ لی ہے ، چنانچہ ( نماز ہی میں یا بعد میں اپنے دل میں ) کہنے ( اور سوچنے ) لگے کہ یقیناً میرے اس مال میں آزمائش آ پہنچی ہے ، تو وہ رسول اللہ ﷺ کی خدمت میں تشریف لائے اور آپ ﷺ کے حضور اُس آزمائش کا تذکرہ کیا جو اُن کو اپنے باغ میں پہنچی تھی اور کہنے لگے کہ اے اللہ کے رسول ! یہ ( سارے کا سارا باغ میں نے ) اللہ کی خاطر صدقہ ( کر دیا ) ہے ، لہٰذا آپ جہاں چاہیں اسے رکھ دیجیے ( یعنی تقسیم اور خرچ کر دیجیے ) ۔

اردو ترجمہ · Urdu

عبداللہ بن ابی بکر رضی اللہ عنہ سے روایت ہے کہ انصار میں سے ایک شخص پھل ( پک جانے ) کے زمانے میں ’’ قُفّ ‘‘ مقام پر واقع اپنے باغ میں نماز ادا کر رہا تھا ، قُفّ مدینہ منورہ کی وادیوں میں سے ایک وادی کا نام ہے ، کھجوروں کے درخت ( یعنی اُن کی ٹہنیوں پر لگے ہوئے پھل ) جھکے ہوئے تھے ، یوں لگتا تھا کہ ان درختوں کو ان کے پھلوں کے ہار پہنا دیے گئے ہیں ، اس انصاری شخص نے ان کو دیکھا تو وہ پھل جسے وہ دیکھ رہے تھے اُنھیں بہت اچھا اور بھلا لگا ، پھر وہ اپنی نماز کی طرف لوٹے تو اچانک وہ جان ہی نہ سکے کہ کتنی نماز پڑھی ہے ؟ تو کہنے لگے کہ مجھے میرے اس مال میں فتنہ پہنچ گیا ہے ، چنانچہ وہ حضرت عثمان رضی اللہ عنہ کے پاس آئے جو کہ اُن دنوں خلیفہ تھے ، اُن کے سامنے اس کا تذکرہ کیا اور کہا کہ یہ ( سب کا سب ) صدقہ ہے ، ( اب ) آپ اسے نیکی ( کی راہوں ) میں خرچ کر دیجیے ، تو حضرت عثمان بن عفان رضی اللہ عنہ نے اُسے پچاس ہزار میں فروخت کر دیا ، ( جس کی وجہ سے ) اس مال ( یعنی باغ ) کا نام ہی ’’ خَمْسِیْن ‘‘ ( پچاس ) رکھ دیا گیا ۔