اردو ترجمہ · Urdu

علی بن عبدالرحمن معاوی رحمہ اللہ سے روایت ہے ، کہتے ہیں کہ حضرت عبداللہ بن عمر رضی اللہ عنہما نے مجھے دیکھا ، میں نماز میں کنکریوں سے کھیل رہا تھا ، جب میں نماز سے فارغ ہوا تو انھوں نے مجھے ( اس سے ) منع کیا اور فرمایا کہ اس طرح کیا کرو جیسے رسول اللہ ﷺ کیا کرتے تھے ، میں نے پوچھا کہ رسول اللہ ﷺ کیا کیا کرتے تھے ؟ تو انھوں نے بتایا کہ جب آپ ﷺ نماز میں بیٹھتے تو اپنی دائیں ہتھیلی کو اپنی دائیں ران پر رکھ لیتے اور اپنی ( دائیں ہاتھ والی ) ساری انگلیاں بند کر لیتے اور اس ( شہادت کی ) انگلی سے اشارہ فرماتے جو انگوٹھے کے قریب ہے اور اپنی بائیں ہتھیلی کو اپنی بائیں ران پر رکھ لیتے اور ( ابن عمر رضی اللہ عنہما نے ) کہا کہ آپ ﷺ اسی طرح ہی کیا کرتے تھے ۔

اردو ترجمہ · Urdu

عبداللہ بن دینار رحمہ اللہ سے روایت ہے کہ انھوں نے حضرت عبداللہ بن عمر رضی اللہ عنہما کو سنا ، ( ہوا یوں تھا ) کہ ایک آدمی نے اُن کے پہلو میں نماز پڑھی ، پھر جب وہ آدمی چار رکعتوں کے بعد بیٹھا تو وہ چار زانو ہو کر بیٹھ گیا اور اس نے اپنے پاؤں موڑ لیے ( اس سے مراد تورُک ہے جو سلام والے تشہد ہی میں کیا جاتا ہے ) ، چنانچہ جب حضرت عبداللہ بن عمر رضی اللہ عنہما اپنی نماز سے فارغ ہوئے تو انھوں نے اس عمل کو اس آدمی کے لیے معیوب جانا ، وہ آدمی کہنے لگا کہ بے شک آپ خود تو یہ عمل کرتے ہیں ، تو انھوں نے کہا کہ یقیناً میں تو بیمار ہوں ۔

اردو ترجمہ · Urdu

مغیرہ بن حکیم رحمہ اللہ کہتے ہیں کہ انھوں نے حضرت عبداللہ بن عمر رضی اللہ عنہما کو دیکھا ، وہ نماز میں دونوں سجدوں کے درمیان اپنی انگلیوں پر بیٹھے ہوئے تھے ، چنانچہ جب وہ فارغ ہوئے تو اُن سے اس کا تذکرہ کیا گیا ، وہ کہنے لگے کہ یہ نماز کی سنت اور طریقہ نہیں ہے ، میں تو صرف اور صرف اس لیے یہ عمل کرتا ہوں کہ میں بیمار ہوں ۔

اردو ترجمہ · Urdu

عبید اللہ رحمہ اللہ بن عبداللہ بن عمر رضی اللہ عنہ سے روایت ہے کہ وہ حضرت عبداللہ بن عمر رضی اللہ عنہما کو نماز میں آلتی پالتی مار کر بیٹھے ہوئے دیکھا کرتے تھے ، کہتے ہیں کہ میں نے بھی ایسا ہی کر لیا ، میں ان دنوں کمسن ( اور نو عمر ) ہی تھا تو عبداللہ بن عمر رضی اللہ عنہما نے مجھے ایسا کرنے سے روک دیا اور کہا کہ یقیناً نماز ( میں بیٹھنے ) کی سنت یہ ہے کہ تو اپنے دائیں پاؤں کو کھڑا کر لے اور بائیں پاؤں کو موڑ لے ( اور اس کے اوپر بیٹھ جائے ) ، میں نے اُن سے کہا کہ بے شک آپ خود تو ایسا کرتے ہیں تو انھوں نے کہا کہ میرے پاؤں میرا بوجھ نہیں اٹھا سکتے ۔

اردو ترجمہ · Urdu

یحیی بن سعید رحمہ اللہ سے روایت ہے کہ قاسم بن محمد رحمہ اللہ نے اُن ( شاگردوں ) کو تشہد میں بیٹھنا سکھایا ، انھوں نے اپنا دایاں پاؤں کھڑا کر لیا اور بائیں پاؤں کو موڑ ( کر اسے دائیں کے نیچے سے باہر نکال ) لیا ، وہ اپنے بائیں سرین پر بیٹھ گئے اور پاؤں کے اوپر نہ بیٹھے ، پھر فرمایا کہ مجھے یہ کیفیت عبداللہ بن عبداللہ بن عمر نے دکھائی تھی ، انھوں نے مجھے بتایا تھا کہ ان کے والد حضرت عبداللہ بن عمر رضی اللہ عنہما ایسا ہی کیا کرتے تھے ۔