اردو ترجمہ · Urdu

نافع رحمہ اللہ سے روایت ہے کہ حضرت عبداللہ بن عمر رضی اللہ عنہما سے جب یہ سوال کیا جاتا کہ کیا کوئی شخص امام کے پیچھے قراءت کر سکتا ہے ؟ تو وہ کہتے کہ جب تم میں سے کوئی شخص امام کے پیچھے نماز پڑھے تو اسے امام کی قراءت ہی کافی ہے ، البتہ جب وہ اکیلا نماز پڑھے تو پھر اسے قراءت کر لینا چاہیے ۔ نافع رحمہ اللہ کہتے ہیں کہ حضرت عبداللہ بن عمر رضی اللہ عنہما امام کے پیچھے قراءت نہیں کرتے تھے ۔

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ ( ایک دفعہ ) ایک نماز سے فارغ ہوئے جس میں آپ ﷺ نے جہری قراءت کی تھی ، آپ ﷺ نے دریافت فرمایا :’’ کیا تم میں سے کسی نے میرے ساتھ ساتھ قراءت کی تھی ؟‘‘ ایک آدمی نے عرض کیا کہ جی ہاں ، اے اللہ کے رسول ! تو رسول اللہ ﷺ نے فرمایا :’’ بے شک میں بھی کہوں ( میں بھی دل میں سوچ رہا تھا ) کہ مجھے کیا ہو گیا ہے کہ مجھ سے قرآن چھینا جا رہا ہے ( تو وہ تمہاری قراءت تھی جو میرے لیے الجھاؤ اور پریشانی کا باعث بن رہی تھی ) ، چنانچہ جب لوگوں نے رسول اللہ ﷺ سے یہ بات سنی تو وہ آپ کے ساتھ اُن نمازوں میں قراءت کرنے سے رُک گئے جن میں آپ جہری قراءت فرماتے تھے ۔