اردو ترجمہ · Urdu

حضرت ابوہریرہ رضی اللہ عنہ سے روایت ہے ، کہتے ہیں کہ میں نے رسول اللہ ﷺ کو یہ فرماتے ہوئے سنا :’’ جس کسی نے کوئی ایسی نماز پڑھی جس میں اُس نے سورۂ فاتحہ کی قراءت نہ کی تو وہ ناقص ہے ، وہ ناتمام ہے ، وہ نامکمل ہے ۔‘‘ وہ ( ابوسائب عبداللہ بن سائب رحمہ اللہ جو ہشام بن زُہرہ کے آزاد کردہ غلام اور حضرت ابوہریرہ رضی اللہ عنہ کے شاگرد ہیں ) کہتے ہیں کہ میں نے عرض کیا : اے ابوہریرہ ! بے شک میں بعض اوقات امام کے پیچھے ہوتا ہوں ( تو اس وقت کیا کروں ؟ ) تو انھوں نے میرے بازو کو دبایا ، پھر کہنے لگے کہ اے فارس کے رہنے والے ! تو اُسے اپنے نفس میں پڑھ ( یعنی آہستہ آواز سے پڑھ ) ، کیونکہ بلاشبہ میں نے رسول اللہ ﷺ کو سنا ، آپ ﷺ فرما رہے تھے کہ ’’ اللہ تعالیٰ نے فرمایا : میں نے نماز کو اپنے درمیان اور اپنے بندے کے درمیان میں تقسیم کر لیا ہے ، چنانچہ اس کا نصف حصہ میرے لیے ہے اور نصف حصہ میرے بندے کے لیے ہے ، اور ( اِس نماز میں ) جو اُس نے ( مجھ سے ) مانگا وہ میرے بندے کے لیے ( میری طرف سے عطا ہو چکا ) ہے ۔‘‘ رسول اللہ ﷺ نے ( اس کی مزید وضاحت کرتے ہوئے ) فرمایا :’’ ( سورۂ فاتحہ کو ) پڑھا کرو ( کیونکہ اسی سورت کا نام اللہ نے ’’ نماز ‘‘ رکھا ہے ، اور اللہ کے ساتھ بندے کی تقسیم اسی سورت میں ہوتی ہے کہ اس کا پہلا حصہ اللہ کی حمد و ثنا پر مشتمل ہے اور دوسرا حصہ بندے کی دعا و التجا پر مشتمل ہے ، تو جب بندہ کہتا ہے : اَلْحَمْدُ لِلّٰہِ رَبِّ الْعَالَمِیْنَ ( ہر قسم کی الوہیت والی تعریف ( حمد ) تمام جہانوں کے پالنے والے اللہ ہی کے لیے خاص ہے ) تو اللہ ( تعالیٰ بندے کو جواب دیتے ہوئے ) فرماتے ہیں کہ میرے بندے نے میری حمد بیان کی ہے ، ( پھر ) بندہ کہتا ہے : اَلرَّحْمٰنِ الرَّحِیْمِ ( وہ بے حد مہربان نہایت رحم فرمانے والا ہے ) تو اللہ فرماتے ہیں کہ میرے بندے نے میری ثنا بیان کی ہے ، ( پھر ) بندہ کہتا ہے : مَالِکِ یَوْمِ الدِّیْنِ ( وہ بدلے کے دن کا مالک ہے ) تو اللہ تعالیٰ فرماتے ہیں کہ میرے بندے نے میری بزرگی ( و عظمت اور شان ) بیان کی ہے ، ( پھر ) بندہ کہتا ہے اِیَّاکَ نَعْبُدُ وَ اِیَّاکَ نَسْتَعِیْنُ ( خاص تیری ہی ہم عبادت کرتے ہیں اور خاص تجھ ہی سے ہم مدد طلب کرتے ہیں ) تو اللہ فرماتے ہیں کہ یہ ( آیت ) میرے اور میرے بندے کے درمیان ( ایک معاہدہ بھی ہے اور اسی میں تقسیم بھی شروع ہو گئی ) ہے ( کہ میری شان بیان کرتے کرتے اب اُس نے مجھ سے مانگنا شروع کر دیا ہے ) اور میرے بندے کے لیے وہ ( سب کچھ عطا ہو گیا ) ہے جو اُس نے مانگا ، ( پھر ) بندہ کہتا ہے : اِھْدِنَا الصِّرَاطَ الْمُسْتَقِیْمَ صِرَاطَ الَّذِیْنَ اَنْعَمْتَ عَلَیْھِمْ غَیْرِ الْمَغْضُوْبِ عَلَیْھِمْ وَلَا الضَّالِّیْنَ ( ہمیں سیدھا راستہ دکھا اور اس پر مضبوطی عطا فرما ، ( یعنی ) اُن لوگوں کا راستہ جن پر تو نے انعام فرمایا ( جو کہ انبیاء ، صدیقین ، شہداء اور نیک لوگ ہیں ) نہ اُن پر غضب کیا گیا ہے اور نہ وہ گمراہ ہیں ، تو اللہ تعالیٰ فرماتے ہیں : ) یہ کلمات میرے بندے کے لیے ہیں اور میرے بندے کے لیے وہ سب کچھ ( پکا ہو گیا اور میری طرف سے عطا ہو گیا ) ہے جو اس نے مانگا ہے ۔‘‘

اردو ترجمہ · Urdu

ہشام بن عروہ رحمہ اللہ اپنے باپ عروہ رحمہ اللہ سے روایت کرتے ہیں کہ وہ امام کے پیچھے اس نماز میں قراءت کر لیتے تھے جس میں امام بآوازِ بلند قراءت نہیں کرتا تھا ( یعنی سِرّی نمازوں میں ) ۔

اردو ترجمہ · Urdu

ربیعہ بن ابی عبدالرحمن رحمہ اللہ سے روایت ہے کہ بے شک قاسم بن محمد بن ابی بکر صدیق امام کے پیچھے اس نماز میں قراءت کرتے تھے جس میں امام بلند آواز سے قراءت نہیں کرتا تھا ۔

اردو ترجمہ · Urdu

نافع بن جبیر بن مطعم رحمہ اللہ سے روایت ہے کہ یقیناً وہ امام کے پیچھے اس نماز میں قراءت کرتے تھے جس میں امام جہراً قراءت نہیں کرتا تھا ۔