اردو ترجمہ · Urdu

یحیی بن سعید انصاری رحمہ اللہ سے روایت ہے کہ رسول اللہ ﷺ یہ ارادہ فرما چکے تھے کہ دو لکڑیاں لے لیں ، جن کو ( ایک دوسری کے ساتھ ) ضرب لگائی جائے ( جس سے آواز پیدا ہو کر لوگوں تک پہنچے ) تاکہ لوگ نماز کے لیے اکٹھے ہو جائیں ، ( لیکن ہوا یوں کہ اتنے میں ) حضرت عبداللہ بن زید ( بن عبد رَبِّہ ) انصاری رضی اللہ عنہ جو بنو حارث بن خزرج ، خاندان سے تھے ، اُنھیں خواب میں دو لکڑیاں دکھائی گئیں تو انھوں نے کہا : بے شک یہ دونوں تو بالکل اسی طرح کی ہیں جن کا رسول اللہ ﷺ ارادہ رکھتے ہیں ، تو کہا گیا کیا تم نماز کے لیے اذان نہیں کہتے ؟ چنانچہ وہ رسول اللہ ﷺ کے پاس اُس وقت آئے جبکہ بیدار ہوئے ، پھر آپ ﷺ کے سامنے اس ( مکمل خواب ) کا تذکرہ کیا تو رسول اللہ ﷺ نے لوگوں کو اذان کا حکم فرما دیا ۔

اردو ترجمہ · Urdu

حضرت ابوسعید خدری رضی اللہ عنہ سے روایت ہے کہ یقیناً رسول اللہ ﷺ نے فرمایا :’’ جب تم اذان سنو تو اسی طرح کہا کرو جس طرح مؤذن کہتا ہے ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ اگر لوگوں کو وہ ( اجر و ثواب اور فضیلت ) معلوم ہو جائے جو اذان دینے اور صفِ اول ( میں کھڑے ہو کر نماز ادا کرنے ) میں ہے ، پھر وہ ( اس فضیلت کے حصول کے لیے اور کوئی طریقہ ) نہ پائیں سوائے اس کے کہ اُن کو قرعہ اندازی کرنا پڑے تو ضرور وہ قرعہ بھی ڈال لیں ، اور اگر لوگوں کو وہ ( اجر و ثواب ) معلوم ہو جائے جو ظہر کی نماز کی طرف چلنے ( یا نمازوں کو اول وقت میں ادا کرنے ) میں ہے تو وہ اس کی طرف ایک دوسرے سے سبقت کرنے لگیں ، اور اگر لوگ اس ( عظیم ثواب ) کو جان لیں جو نمازِ عشاء اور نمازِ فجر ( باجماعت ادا کرنے ) میں ہے تو وہ ضرور ان دونوں میں پہنچیں ، اگرچہ اُن کو گھٹنوں ( یا سُرینوں ) کے بل ( گھسٹ کر ) آنا پڑے ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ جب نماز کے لیے اقامت کہی جائے تو نماز کی طرف اس حالت میں نہ آؤ کہ تم دوڑ رہے ہو بلکہ اس طرح نماز کو آؤ کہ تم سکینت و اطمینان کو لازم پکڑے ہوئے ہو ، پھر تم جو ( حصہ نماز امام کے ساتھ ) پا لو اُسے ( جماعت کے ساتھ ) پڑھ لو اور جو کچھ تم سے رہ جائے اُسے ( بعد میں ) پورا کر لو ، ( نماز کی طرف دوڑ کر آنا ممنوع ہے ) کیونکہ بلاشبہ جب تم میں سے کوئی نماز کی طرف ( آنے اور جماعت کے ساتھ نماز پڑھنے ) کا قصد کر لیتا ہے تو وہ نماز ہی میں ( شمار ) ہوتا ہے ۔‘‘

اردو ترجمہ · Urdu

عبداللہ بن عبدالرحمن بن ابی صعصعہ انصاری رحمہ اللہ سے روایت ہے کہ حضرت ابوسعید خدری رضی اللہ عنہ نے اُن سے فرمایا : میں دیکھ رہا ہوں کہ تم بکریوں اور جنگل ( کی زندگی ) سے محبت رکھتے ہو ، لہٰذا جب تم اپنی بکریوں یا جنگل میں ہو اور نماز کے لیے اذان دینے لگو تو اذان کے ساتھ اپنی آواز کو ( خوب ) بلند کیا کرو ، کیونکہ مؤذن کی آواز کی انتہا تک جو کوئی جن اور انسان یا کوئی بھی دوسری چیز اُسے سنتی ہے وہ ضرور قیامت کے دن اُس کے حق میں گواہی دے گی ۔ پھر حضرت ابوسعید خدری رضی اللہ عنہ نے کہا کہ میں نے یہ حدیث رسول اللہ ﷺ سے سنی تھی ۔

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ بلاشبہ رسول اللہ ﷺ نے فرمایا :’’ جب نماز کے لیے اذان دی جاتی ہے تو شیطان پیٹھ پھیر کر اس حال میں بھاگتا ہے کہ اس کی ہوا آواز کے ساتھ نکل رہی ہوتی ہے ، ( پھر اتنی دور جگہ چلا جاتا ہے ) یہاں تک کہ اذان کی آواز اُسے سنائی نہیں دیتی ، پھر جب اذان پوری ہو جاتی ہے تو وہ واپس آ جاتا ہے ، یہاں تک کہ جب نماز کے لیے اقامت کہی جاتی ہے وہ ( پھر ) پیٹھ پھیر کر بھاگ جاتا ہے ، حتیٰ کہ جب اقامت پوری ہو جاتی ہے تو وہ ( آ جاتا ہے اور ) آدمی اور اس کے دل کے درمیان ( حائل ہو کر ) وسوسہ ڈالنے لگتا ہے ، آدمی سے کہتا ہے کہ فلاں چیز کو یاد کر ، فلاں چیز کو یاد کر ، اُن چیزوں کے بارے میں ( وسوسے ڈالتا اور یاد کراتا ہے ) جو آدمی کو یاد نہیں ہوتیں ، حتیٰ کہ آدمی ( کا حال ) ایسا ہو جاتا ہے کہ وہ یہ بھی نہیں جانتا ( اور یہ بھی یاد نہیں رکھ پاتا ) کہ اُس نے کتنی رکعتیں پڑھی ہیں ۔‘‘

اردو ترجمہ · Urdu

حضرت سہل بن سعد ساعدی رضی اللہ عنہ سے روایت ہے کہ انھوں نے کہا : دو گھڑیاں ( دو اوقات ) ایسے ہیں کہ اُن میں آسمان کے دروازے کھول دیے جاتے ہیں اور بہت کم ( نہ ہونے کے برابر ) ہیں ایسے دعا مانگنے والے کہ ( ان ساعتوں میں بھی ) اُن کی دعا اُن پر رد کر دی جاتی ہو ، ایک تو نماز کے لیے ( دی جانے والی ) اذان کا وقت ہے اور دوسرا اللہ کی راہ میں ( جہاد کے لیے ) صف بندی ( کا وقت ) ۔‘‘

اردو ترجمہ · Urdu

امام مالک رحمہ اللہ کو یہ خبر پہنچی کہ بے شک مؤذن حضرت عمر بن خطاب رضی اللہ عنہ کے پاس آیا ، وہ انھیں نمازِ فجر کی اطلاع دینا چاہتا تھا ، اُس نے اُنھیں سوئے ہوئے پایا تو کہنے لگا : اے امیر المؤمنین ! نماز نیند سے بہتر ہے تو حضرت عمر رضی اللہ عنہ نے اُسے حکم دیا کہ اسے ( یعنی اَلصَّلَاۃُ خَیْرٌ مِّنَ النَّوْم کی صدا کو ) صبح کی اذان ہی میں رہنے دو ۔‘‘

اردو ترجمہ · Urdu

امام مالک رحمہ اللہ اپنے چچا ابو سہیل رحمہ اللہ بن مالک سے اور وہ اپنے باپ مالک رحمہ اللہ ( بن ابی عامر اصبحی رحمہ اللہ ) سے روایت کرتے ہیں کہ انھوں نے کہا : جن چیزوں پر میں نے لوگوں ( یعنی صحابہ کرام رضی اللہ عنہم ) کو ( عمل کرتے ہوئے ) پایا تھا ، میں اُن میں سے کسی چیز کو ( اب اس کی اصلی حالت پر باقی ) نہیں دیکھ رہا سوائے نماز کی پکار ( یعنی اذان ) کے ۔

اردو ترجمہ · Urdu

نافع رحمہ اللہ سے روایت ہے کہ حضرت عبداللہ بن عمر رضی اللہ عنہما نے ( مسجد کی طرف آتے ہوئے ) اقامت کی آواز سنی ، اس وقت وہ بقیع ( جگہ ) میں تھے ( جو مسجد سے تھوڑا سا پیچھے ہے ) تو انھوں نے مسجد کی طرف تیز چلنا شروع کر دیا ۔