اردو ترجمہ · Urdu

حمید بن نافع رحمہ اللہ سے روایت ہے کہ حضرت زینب بنت ابی سلمہ رضی اللہ عنہا نے انھیں تین احادیث کی خبر دی : ( 1 ) حضرت زینب رضی اللہ عنہا فرماتی ہیں کہ میں سیدہ ام حبیبہ رضی اللہ عنہا زوجہ رسول ﷺ کے پاس اس وقت گئی جب ان کے والد حضرت ابوسفیان بن حرب رضی اللہ عنہ فوت ہوئے تھے ، چنانچہ سیدہ ام حبیبہ رضی اللہ عنہا نے خوشبو منگوائی جس میں خلوق خوشبو کی یا کسی اور چیز کی زرد رنگت شامل تھی ، پھر انھوں نے وہ خوشبو ایک لونڈی کو ( تیل کی طرح ) لگائی پھر اپنے رخساروں پر ( خوشبو والے ) ہاتھوں کو پھیر لیا ۔ پھر کہا کہ اللہ کی قسم ! مجھے خوشبو لگانے کی بالکل حاجت نہ تھی مگر میں نے رسول اللہ ﷺ کو یہ فرماتے سنا تھا :’’ وہ عورت جو اللہ اور آخرت کے دن پر ایمان رکھتی ہے ، اس کے لیے یہ جائز نہیں کہ وہ کسی میت پر تین راتوں سے زیادہ سوگ منائے ، سوائے خاوند کے کہ وہ اس پر چار ماہ دس دن سوگ منائے گی ۔ ( 2 ) سیدہ زینب رضی اللہ عنہا نے فرمایا کہ پھر ( ایک اور موقع پر ) میں سیدہ زینب بنت جحش رضی اللہ عنہا زوجہ رسول ﷺ کے پاس اس وقت داخل ہوئی جب ان کے بھائی فوت ہوئے تو انھوں نے بھی ایک خوشبو منگوائی ، پھر اس میں سے کچھ لگا لی ، پھر کہا کہ اللہ کی قسم ! مجھے خوشبو کی بالکل حاجت نہ تھی مگر میں نے رسول اللہ ﷺ کو منبر پر یہ فرماتے سنا تھا :’’ وہ عورت جو اللہ اور یوم آخرت پر ایمان رکھتی ہے اس کے لیے حلال نہیں کہ وہ کسی میت پر تین راتوں سے زیادہ سوگ منائے ، سوائے خاوند کے کہ جس پر وہ چار ماہ دس دن عدت گزارے گی ( 3 ) حضرت زینب ( بنت ابی سلمہ رضی اللہ عنہا ) فرماتی ہیں کہ میں نے اپنی والدہ سیدہ ام سلمہ رضی اللہ عنہا زوجہ رسول ﷺ کو یہ کہتے سنا کہ ایک عورت رسول اللہ ﷺ کے پاس آئی ، اور کہنے لگی کہ اے اللہ کے رسول ! میری بیٹی کا خاوند فوت ہو گیا ہے اور اس کی آنکھوں میں تکلیف ہے تو کیا ہم اسے سرمہ لگا سکتے ہیں ؟ تو رسول اللہ ﷺ نے دو بار یا تین بار فرمایا :’’ نہیں ‘‘ ہر بار میں ’’ نہیں ، نہیں ‘‘ فرماتے رہے ، پھر ارشاد فرمایا :’’ یقیناً وہ ( اسلام میں عدت وفات ) تو صرف چار ماہ دس دن ہی ہیں ( تو کیا تم یہ بھی نہیں گزار سکتیں ) اور دور جاہلیت میں تم میں سے کوئی عورت سال کے اختتام پر اونٹ کی مینگنی پھینکا کرتی تھی ۔‘‘ ( حدیث کے راوی ) حمید کہتے ہیں کہ میں نے حضرت زینب بنت ابی سلمہ رضی اللہ عنہا سے پوچھا کہ اس کا کیا مطلب ہے کہ وہ سال کے اختتام پر اونٹ کی مینگنی پھینکا کرتی تھی ؟‘‘ تو حضرت زینب رضی اللہ عنہا نے فرمایا کہ جب کسی عورت کا خاوند فوت ہو جاتا تو وہ ایک گھٹیا قسم کے مکان میں داخل ہو جاتی اور اپنے سب سے برے کپڑے پہن لیتی ، اور نہ خوشبو لگاتی اور نہ کچھ اور ( زینت اختیار کرتی ) یہاں تک کہ اس پر سال گزر جاتا ، پھر اس کے پاس ایک گدھا یا بکری یا پرندہ لایا جاتا ، پھر وہ اس جانور کو اپنے جسم کے ساتھ رگڑتی ( اور غسل کرتی ) اور ایسا کم ہی ہوتا تھا کہ وہ جس چیز کو رگڑتی ہو وہ مرتی نہ ہو ۔ پھر اس کے پاس اونٹ کی ایک مینگنی لائی جاتی جسے وہ پھینکتی ، پھر وہ اس کے بعد خوشبو وغیرہ میں سے جو چاہتی استعمال کر لیتی ۔ امام مالک رحمہ اللہ نے فرمایا کہ اس روایت کے لفظ ’’ اَلْحِفْش ‘‘ سے مراد گھٹیا سا گھر ہے اور ’’ تَفْتَضُّ ‘‘ کے معنی یہ ہیں کہ وہ اسے ’’ نُشْرَہ ‘‘ ( بیمار یا آسیب زدہ شخص کے تعویذ ) کی طرح اپنے جسم پر ملتی تھی ۔

اردو ترجمہ · Urdu

سیدہ عائشہ اور سیدہ حفصہ رضی اللہ عنہما ازواج رسول ﷺ سے روایت ہے کہ رسول اللہ ﷺ نے فرمایا :’’ وہ عورت جو اللہ اور آخرت کے دن پر ایمان رکھتی ہے اس کے لیے یہ حلال نہیں کہ وہ کسی میت پر تین رات سے زیادہ سوگ منائے سوائے خاوند کے ۔‘‘

اردو ترجمہ · Urdu

امام مالک رحمہ اللہ کو یہ خبر پہنچی کہ سیدہ ام سلمہ رضی اللہ عنہا زوجہ رسول ﷺ نے ایک عورت سے فرمایا جو اپنے خاوند پر سوگ منا رہی تھی ، اس کی آنکھیں خراب تھیں اور اس بیماری کی خبر اسے پہنچتی ، ( سیدہ ام سلمہ رضی اللہ عنہا نے فرمایا کہ وہ ) نظر بڑھانے والا سرمہ ( اثمد ) رات کو لگا لے اور دن کو اسے صاف کر دے ۔

اردو ترجمہ · Urdu

سالم بن عبداللہ اور سلیمان بن یسار رحمۃ اللہ علیہما سے روایت ہے ، وہ دونوں اس عورت جس کا خاوند فوت ہو جائے ، ( اس کی عدت ) کے متعلق فرمایا کرتے تھے : جب وہ اپنی نظر کے متعلق آشوبِ چشم ( آنکھ پھولنے ، آنکھ دکھنے ) کا خطرہ محسوس کرے یا اسے ( آنکھ میں ) کوئی اور بیماری لگ جائے تو بلاشبہ وہ سرمہ بھی لگا سکتی ہے اور کسی دوسری دوائی یا سرمہ کے ساتھ علاج بھی کرا سکتی ہے ، خواہ اس میں خوشبو بھی ہو ۔

اردو ترجمہ · Urdu

صفیہ بنت ابی عبید سے روایت ہے کہ ان کی آنکھ دکھنے لگی ، اس حال میں کہ وہ اس وقت اپنے خاوند حضرت عبداللہ بن عمر رضی اللہ عنہما ( کی وفات ) پر سوگ ( عدت ) گزار رہی تھیں ، چنانچہ انھوں نے ( باوجود تکلیف کے ) سرمہ نہ لگایا یہاں تک کہ قریب تھا کہ ان کی آنکھوں سے سفید میل نکلنے لگتی ۔

اردو ترجمہ · Urdu

امام مالک رحمہ اللہ کو یہ خبر پہنچی کہ رسول اللہ ﷺ سیدہ ام سلمہ رضی اللہ عنہا زوجہ پیغمبر ﷺ کے پاس گئے ، وہ اس وقت ( اپنے گزشتہ شوہر ) حضرت ابوسلمہ رضی اللہ عنہ ( کی وفات کے بعد دورانِ عدت ان ) پر سوگ میں تھیں اور انھوں نے اپنی آنکھوں پر ایلوا لگا رکھا تھا تو آپ ﷺ نے فرمایا :’’ ام سلمہ ! یہ کیا ( لگا رکھا ہے ) ؟‘‘ وہ بولیں کہ اے اللہ کے رسول ! یہ تو صرف ایلوا ہے ، تو آپ ﷺ نے فرمایا :’’ اسے رات کو لگا لو اور دن کو صاف کر ڈالو ۔‘‘

اردو ترجمہ · Urdu

امام مالک رحمہ اللہ کو یہ خبر پہنچی کہ بے شک سیدہ ام سلمہ رضی اللہ عنہا زوجہ رسول ﷺ فرمایا کرتی تھیں : سوگ گزارنے والی عورت اپنے سر ( کے بالوں ) کو بیری اور زیتون کے تیل کے ساتھ اکٹھا کر سکتی ہے ۔