اردو ترجمہ · Urdu

ابن محیریز رحمہ اللہ سے روایت ہے ، کہتے ہیں کہ میں مسجد ( نبوی ) میں داخل ہوا تو میں نے حضرت ابوسعید خدری رضی اللہ عنہ کو دیکھا ، چنانچہ میں ان کے پاس آ کر بیٹھ گیا ، پھر میں نے ان سے عزل کے متعلق سوال کیا تو حضرت ابوسعید خدری رضی اللہ عنہ فرمانے لگے : ہم رسول اللہ ﷺ کے ہمراہ غزوئہ بنی مصطلق میں نکلے تو ہم نے عرب قیدیوں میں سے کچھ قیدی عورتیں پائیں ، پھر ہمیں عورتوں سے ( جنسی ) خواہش محسوس ہوئی اور عورتوں سے دوری ہم پر بہت گراں گزری اور ہمیں ( ان قیدی عورتوں کا فدیہ یعنی ) قیمت بھی محبوب تھی ( اور اگر وہ حاملہ ہو جاتیں تو ان کو بیچنا درست نہ ہوتا ) ، سو ہم نے ان سے عزل کرنے کا ارادہ کر لیا ، پھر ہم نے کہا کہ ہم عزل کرتے رہیں حالانکہ رسول اللہ ﷺ ہمارے درمیان موجود ہیں ( لیکن ہم ) آپ سے پوچھے بغیر ہی ( عزل کریں تو یہ نامناسب کام ہے ) ، چنانچہ ہم نے آپ ﷺ سے اس بارے میں پوچھ لیا تو آپ ﷺ نے فرمایا :’’ اگر تم ایسا نہ کرو تو تم پر کوئی حرج نہیں ( تم عزل نہ کرو گے تو کچھ بھی نہ بگڑے گا اور جس حمل کو تم روکنا چاہتے ہو تو اس بارے میں سنو ) جو کوئی جان ( روح ) قیامت تک پیدا ہونے والی ہے وہ ضرور ہو کر رہے گی ۔‘‘

اردو ترجمہ · Urdu

عامر بن سعد بن ابی وقاص رحمہ اللہ اپنے والد ( حضرت سعد بن ابی وقاص رضی اللہ عنہ ) سے روایت کرتے ہیں کہ وہ عزل کر لیا کرتے تھے ۔

اردو ترجمہ · Urdu

حضرت ابوایوب انصاری رضی اللہ عنہ کی ام ولد سے روایت ہے کہ وہ ( حضرت ابوایوب رضی اللہ عنہ ) عزل کر لیتے تھے ۔

اردو ترجمہ · Urdu

حضرت عبداللہ بن عمر رضی اللہ عنہما سے روایت ہے کہ وہ عزل کو مکروہ جانتے تھے اور عزل نہیں کرتے تھے ۔

اردو ترجمہ · Urdu

حضرت حجاج بن عمرو بن غزیہ رضی اللہ عنہ سے روایت ہے کہ وہ حضرت زید بن ثابت رضی اللہ عنہ کے ہمراہ بیٹھے تھے ، ( اتنے میں ) ان کے پاس حضرت ابن قہد رضی اللہ عنہ آئے جو کہ اہل یمن میں سے ایک شخص تھے ، وہ ( حضرت زید بن ثابت رضی اللہ عنہ کو ان کی کنیت سے مخاطب کرتے ہوئے ) کہنے لگے کہ اے ابوسعید ! میرے پاس میری کچھ ایسی لونڈیاں ہیں کہ میری بیویاں جنھیں میں اپنے پاس ( چھپا کر ) محفوظ رکھتا ہوں ، وہ بھی میرے نزدیک ان ( لونڈیوں ) سے زیادہ پیاری نہیں ہیں اور وہ ساری ایسی نہیں ہیں کہ مجھ سے ان کا حاملہ ہونا مجھے پسند ہو ( کیونکہ میں انھیں بیچنا بھی چاہتا ہوں ) تو کیا میں ان سے عزل کر لوں ؟ تو حضرت زید رضی اللہ عنہ فرمانے لگے کہ اے حجاج ! آپ انھیں فتویٰ دیجیے ، میں نے ان سے کہا کہ اللہ آپ کی مغفرت فرمائے ، ہم تو خود آپ کے پاس صرف اس لیے بیٹھتے ہیں کہ آپ سے علم حاصل کریں ، انھوں نے پھر کہا کہ حجاج ! انھیں فتویٰ دو ۔ حضرت حجاج بن عمرو بن غزیہ رضی اللہ عنہ فرماتے ہیں کہ میں نے ان سے کہا کہ لونڈیاں آپ کی کھیتی ہیں ۔ اگر آپ چاہیں تو اپنی کھیتی کو پانی پلا لیں اور اگر آپ چاہیں تو اسے پیاسا ہی رکھ لیں ۔ حضرت حجاج رضی اللہ عنہ کہتے ہیں کہ میں حضرت زید بن ثابت رضی اللہ عنہ سے یہی فتویٰ سنتا رہتا تھا ، پھر حضرت زید رضی اللہ عنہ نے ( حضرت ابن قہد رضی اللہ عنہ سے ) فرمایا کہ حجاج نے سچ کہا ہے ۔

اردو ترجمہ · Urdu

حمید بن قیس مکی اس شخص سے روایت کرتے ہیں جسے ذفیف کہا جاتا تھا ، وہ کہتے ہیں کہ حضرت ابن عباس رضی اللہ عنہما سے عزل کے متعلق سوال کیا گیا تو انھوں نے اپنی لونڈی کو بلایا اور اس سے کہا کہ ان کو ( اس مسئلے کے حوالے سے ) خبر دے ، وہ تو گویا حیا کرنے لگے تو حضرت ابن عباس رضی اللہ عنہما فرمانے لگے : وہ یہی حکم ہے ( یعنی وہ جائز ہے اور میں اس لونڈی سے عزل کرتا ہوں تبھی تو یہ بولنے سے شرما رہی ہے ، پھر فرمایا : ) رہا میں ، تو میں یہ کام کرتا ہوں ، وہ یہ مراد لے رہے تھے کہ وہ عزل کرتے ہیں ۔