اردو ترجمہ · Urdu

زینب بنت کعب بن عجرہ رحمہ اللہ سے روایت ہے کہ حضرت فریعہ بنت مالک بن سنان رضی اللہ عنہا جو حضرت ابوسعید خدری رضی اللہ عنہ کی ہمشیرہ تھیں ، نے انھیں بتایا کہ وہ رسول اللہ ﷺ کی خدمت میں حاضر ہوئیں ، وہ آپ ﷺ سے یہ پوچھنا چاہتی تھیں کہ اپنے گھر والوں ( اپنے میکے ) کی طرف یعنی بنو خدرہ میں لوٹ جائیں ، کیونکہ ( ہوا یوں تھا کہ ) بلاشبہ ان کے خاوند اپنے کچھ غلاموں کی تلاش میں نکلے جو بھاگ گئے تھے ، یہاں تک کہ جب وہ ( بھگوڑے غلام مدینہ سے چھ سات میل دور ) قدوم کے کنارے تک پہنچے تو انھوں نے ( یعنی ان کے خاوند اور غلاموں کے آقا نے ) انھیں پا لیا ( لیکن ) پھر ان غلاموں نے انھیں قتل کر ڈالا ، وہ کہتی ہیں کہ میں نے رسول اللہ ﷺ سے پوچھا کہ ( کیا ) میں بنو خدرہ میں اپنے گھر والوں کی طرف لوٹ جاؤں ؟ کیونکہ یقیناً میرے خاوند نے مجھے کسی ایسی رہائش گاہ میں نہیں چھوڑا جس کے وہ خود مالک ہوں اور نہ ہی نفقہ چھوڑا ہے ۔ وہ کہتی ہیں کہ ( یہ سن کر ) رسول اللہ ﷺ نے فرمایا :’’ ہاں ( چلی جاؤ ) ‘‘ وہ کہتی ہیں کہ میں واپس پھری ، یہاں تک کہ جب میں ( ابھی ) حجرہ مبارک ہی میں تھی ( اور باہر بھی نہ پہنچی تھی ) کہ رسول اللہ ﷺ نے مجھے آواز دی اور میرے متعلق ( یعنی مجھے بلانے کا ) حکم صادر فرمایا ، چنانچہ مجھے آپ ﷺ ( کے پاس واپس آنے ) کے لیے آواز لگائی گئی ، پھر آپ ﷺ نے فرمایا :’’ تم نے کس طرح سوال کیا تھا ؟‘‘ ( ذرا اسے دہراؤ ) میں نے آپ ﷺ کے سامنے وہ سارا قصہ دہرا دیا جس کا میں اپنے خاوند کے حوالے سے آپ ﷺ کے حضور تذکرہ کر چکی تھی ، تو آپ ﷺ نے فرمایا :’’ اپنے ( خاوند والے عارضی ) گھر ہی میں ٹھہری رہو ، یہاں تک کہ ( اللہ کی ) کتاب ( میں لکھی ہوئی عدت ) اپنی مقررہ مدت کو پہنچ جائے ‘‘ وہ کہتی ہیں کہ پھر میں نے اسی گھر میں چار ماہ دس دن عدت گزاری ، وہ بیان کرتی ہیں کہ پھر جب حضرت عثمان بن عفان رضی اللہ عنہ ( مسند خلافت پر متمکن ) تھے انھوں نے میری طرف پیغام بھیجا اور مجھ سے اس کے متعلق سوال کیا تو میں نے انھیں یہ سب کچھ بتا دیا ، پھر انھوں نے بھی اس کی اتباع کی اور اسی کے مطابق فیصلہ فرمایا ۔

اردو ترجمہ · Urdu

سعید بن مسیب رحمہ اللہ سے روایت ہے کہ حضرت عمر بن خطاب رضی اللہ عنہ ان عورتوں کو بیداء مقام سے واپس بھیج دیا کرتے تھے جن کے خاوند فوت ہو چکے ہوتے تھے ۔ ( اور وہ ابھی عدت گزار رہی ہوتی تھیں ) ، وہ انھیں حج ( پر جانے ) سے منع کر دیتے تھے ۔

اردو ترجمہ · Urdu

یحیی بن سعید سے روایت ہے کہ حضرت سائب بن خباب رضی اللہ عنہ فوت ہو گئے تو ان کی اہلیہ حضرت عبداللہ بن عمر رضی اللہ عنہما کے پاس آئیں اور انھوں نے ان کے سامنے اپنے خاوند کی وفات کا تذکرہ کیا اور انھیں اپنے گھر والوں کی اس کھیتی کے متعلق بتایا جو ( مدینہ کے قریب وادی ) ’’ قناۃ ‘‘ میں تھی اور ان سے پوچھا کہ کیا اس کے لیے یہ درست ہے کہ وہ وہاں رات گزارے تو انھوں نے ان کو اس سے منع فرما دیا ۔ چنانچہ وہ مدینہ منورہ سے سحری کے وقت نکل جاتیں ، اپنی کھیتی میں صبح کرتیں ، پھر سارا دن وہیں رہتیں ، پھر جب شام کرتیں تو مدینہ میں آ جاتیں اور اپنے گھر میں رات گزارتیں ۔

اردو ترجمہ · Urdu

ہشام بن عروہ رحمہ اللہ اپنے والد ( عروہ بن زبیر رحمہ اللہ ) سے روایت کرتے ہیں ، وہ ( صحراء میں رہنے والی ) اس بدوی عورت جس کا خاوند فوت ہو جائے ، کے متعلق فرمایا کرتے تھے کہ وہ وہیں پڑاؤ ڈالے گی جہاں اس کے خاندان والے پڑاؤ ڈالیں گے ۔

اردو ترجمہ · Urdu

حضرت عبداللہ بن عمر رضی اللہ عنہما سے روایت ہے ، وہ فرمایا کرتے تھے کہ جس عورت کا خاوند فوت ہو جائے ، اور جسے تین طلاقیں مل چکی ہوں ، وہ اپنے ( خاوند کے ) گھر کے علاوہ کہیں بھی رات نہ گزارے ۔