اردو ترجمہ · Urdu

سعید بن مسیب سے روایت ہے ، انھوں نے کہا کہ حضرت عمر بن خطاب رضی اللہ عنہ نے فرمایا : جس عورت کو طلاق دی جائے ، پھر وہ ایک یا دو حیض گزار لے ، پھر اس سے اس کا حیض اٹھا لیا جائے ، ( حیض کی بندش ہو جائے ) تو بلاشبہ وہ ( گزشتہ خون کو خون استحاضہ اور بندش حیض کو حمل شمار کر کے ) نو ماہ انتظار کرے گی ، پھر اگر تو اس کے ساتھ حمل ظاہر ہو جائے تو اس کا اعتبار ہو گا ( اور بچے کی پیدائش کے بعد عدت ختم ہو جائے گی ) ورنہ وہ نو ماہ ( انتظار ) کے بعد ( خود کو آئسہ ( حیض سے ناامید ، یعنی بوڑھی یا مریضہ عورت کی طرح ) تین ماہ عدت گزارے گی ، پھر وہ نئے نکاح کے لیے حلال ہو جائے گی ۔

اردو ترجمہ · Urdu

سعید بن مسیب رحمہ اللہ سے روایت ہے ، وہ فرمایا کرتے تھے کہ طلاق مردوں کے لیے ہے اور عدت عورتوں کے لیے ہے ۔

اردو ترجمہ · Urdu

سعید بن مسیب رحمہ اللہ سے روایت ہے کہ مستحاضہ کی عدت ایک سال ہے ۔

اردو ترجمہ · Urdu

امام مالک رحمہ اللہ کو یہ خبر پہنچی کہ بے شک حضرت علی بن ابی طالب رضی اللہ عنہ نے حکمین یعنی دو فیصلہ کرنے والوں کے بارے میں فرمایا : جن کے بارے میں اللہ تبارک و تعالیٰ فرماتے ہیں : { وَ اِنْ خِفْتُمْ شِقَاقَ بَیْنِہِمَا فَابْعَثُوْا حَکَمًا مِّنْ اَہْلِہٖ وَ حَکَمًا مِّنْ اَہْلِہَا اِنْ یُّرِیْدَا اِصْلَاحًا یُّوَفِّقِ اللّٰہُ بَیْنَہُمَا اِنَّ اللّٰہَ کَانَ عَلِیْمًا خَبِیْرًا } ( النساء : 35 ) ’’ اور اگر تمھیں ان دونوں ( میاں بیوی ) کے درمیان جھگڑے کا ڈر ہو تو ایک منصف شخص مرد کے کنبے سے اور ایک منصف عورت کے کنبے سے مقرر کرو ، اگر وہ دونوں صلح کرنا چاہیں گے تو اللہ ان دونوں ( میاں بیوی ) میں موافقت پیدا فرما دے گا ، بے شک اللہ بہت علم والا خوب خبر رکھنے والا ہے ۔‘‘ ( حضرت علی رضی اللہ عنہ نے فرمایا کہ ) یقیناً ان دونوں ( منصفوں ) کے پاس خاوند بیوی کے درمیان ( طلاق کی شکل میں ) جدائی ڈالنے اور ملاپ کرا دینے کا اختیار ہے ۔