اردو ترجمہ · Urdu

سیدہ حبیبہ بنت سہل انصاریہ رضی اللہ عنہا سے روایت ہے ، بے شک وہ سیدنا ثابت بن قیس بن شماس رضی اللہ عنہ کے نکاح میں تھیں ۔ یقیناً ( ایک دن ) رسول اللہ ﷺ نماز فجر کی طرف نکلے تو آپ نے سیدہ حبیبہ بنت سہل رضی اللہ عنہا کو ( صبح کے ) اندھیرے ہی میں اپنے دروازے کے پاس پایا ، سو رسول اللہ ﷺ نے فرمایا :’’ یہ کون ہے ؟‘‘ وہ بولیں کہ اے اللہ کے رسول ! میں حبیبہ بنت سہل ہوں ، آپ نے فرمایا :’’ تمھیں کیا ہوا ہے ؟‘‘ وہ اپنے خاوند کا نام لے کر بولیں کہ نہ میں اور نہ ثابت بن قیس ( اب ہم اکٹھے نہیں رہ سکتے ) ، پھر جب ان کے خاوند سیدنا ثابت بن قیس رضی اللہ عنہ آئے تو رسول اللہ ﷺ نے ان سے فرمایا :’’ یہ جو ( تمھاری بیوی ) حبیبہ بنت سہل ہے ، اس نے وہ کچھ باتیں ذکر کی ہیں جو اللہ نے چاہا کہ وہ ذکر کرے ۔‘‘ سیدہ حبیبہ بنت سہل رضی اللہ عنہا کہنے لگیں کہ اے اللہ کے رسول ! انھوں نے جو کچھ بھی ( حق مہر میں ) مجھے دیا تھا وہ میرے پاس موجود ہے ، ( وہ سب انھیں دے دیجیے اور میری جان چھڑا دیجیے ) تو رسول اللہ ﷺ نے سیدنا ثابت بن قیس رضی اللہ عنہ سے فرمایا :’’ اسے وصول کر لو ‘‘ چنانچہ انھوں نے ان سے لے لیا اور وہ اپنے خاندان کے گھر میں ( اپنے میکے میں ) بیٹھ گئیں ۔

اردو ترجمہ · Urdu

( سیدنا ابن عمر رضی اللہ عنہما کی زوجہ ) صفیہ بنت ابی عبید کی آزاد کردہ لونڈی سے روایت ہے کہ اس نے اپنے خاوند سے ہر اس چیز کے بدلے میں خلع لیا جو اس کے پاس تھی تو سیدنا عبداللہ بن عمر رضی اللہ عنہما نے اس کا انکار نہ کیا ( اور اسے غلط نہ جانا ) ۔