اردو ترجمہ · Urdu

حضرت سہل بن سعد ساعدی رضی اللہ عنہ سے روایت ہے کہ بے شک رسول اللہ ﷺ کے پاس ایک عورت آئی اور کہنے لگی کہ اے اللہ کے رسول ! بلاشبہ میں نے خود کو آپ کے لیے ہبہ کر دیا ہے ، پھر وہ کافی دیر تک کھڑی رہی ۔ ( آپ ﷺ نے اسے اوپر سے نیچے تک دیکھا پھر سر مبارک جھکا لیا ، جب عورت نے دیکھا کہ آپ ﷺ نے اس کے متعلق کوئی فیصلہ نہیں کیا تو وہ بیٹھ گئی ) تو ایک آدمی کھڑا ہوا اور کہنے لگا کہ اے اللہ کے رسول ! اگر آپ کو اس کی حاجت نہیں ہے تو مجھ سے اس کی شادی کر دیجیے ، چنانچہ رسول اللہ ﷺ نے فرمایا ’’ کیا تیرے پاس کوئی چیز ہے جو تو اسے حق مہر میں دے سکے ؟‘‘ وہ عرض کرنے لگا کہ میرے پاس میرے ازار ( تہبند والی چادر ) کے سوا کچھ نہیں ہے ، تو رسول اللہ ﷺ فرمانے لگے :’’ اگر تو نے اسے ازار دے دیا تو توُ اس حال میں بیٹھا رہے گا کہ تیرے پاس کوئی تہبند بھی نہ ہو گا ( اور اگر تو ہی اسے پہنے رکھے گا تو اسے اس میں سے کچھ نہ ملے گا ) لہٰذا ( اپنے گھر جاؤ اور ) کوئی ( اور ) چیز تلاش کرو ۔‘‘ ( وہ گیا ، پھر واپس آ کر ) اس نے کہا کہ میں کچھ بھی نہیں پا رہا ۔ آپ ﷺ نے فرمایا :’’ ڈھونڈو اگرچہ لوہے کی ایک انگوٹھی ہی ( ڈھونڈ لو ) ۔‘‘ ( وہ گھر گیا ) پھر اس نے تلاش کیا ( پھر آ کر کہنے لگا کہ اللہ کی قسم ! ) اسے کچھ نہیں ملا ، ( پھر وہ بیٹھ گیا ، جب کافی دیر بیٹھا رہا تو کھڑا ہوا اور منہ پھیر کر جانے لگا ، آپ ﷺ نے حکم دیا تو اسے بلا لیا گیا ، ) پھر رسول اللہ ﷺ نے اُسے فرمایا :’’ کیا تمھارے پاس قرآن مجید میں سے کچھ ہے ؟‘‘ ( تمھیں کوئی سورتیں یاد ہیں ؟ ) اس نے عرض کیا کہ جی ہاں ، فلاں سورت اور فلاں سورت ( یاد ہے ) اس نے کئی سورتوں کا نام لیا تو رسول اللہ ﷺ نے فرمایا :’’ یقیناً میں نے اس کے ساتھ تمھارا نکاح کر دیا ہے اُس قرآن کے عوض جو تمھارے پاس ہے ۔‘‘

اردو ترجمہ · Urdu

سعید بن مسیب رحمہ اللہ سے روایت ہے کہ حضرت عمر بن خطاب رضی اللہ عنہ نے فرمایا : جو کوئی مرد کسی ایسی عورت سے شادی کرے جس کو جنون ( دماغی خلل ) ، کوڑھ یا پھلبہری ( جیسا کوئی مرض لاحق ) ہو ، پھر وہ اس عورت سے مباشرت کر لے تو اس عورت کے لیے اس کا مکمل حق مہر ( واجب الادا ) ہو گا اور ( لیکن ) یہ ( حق مہر ) خاوند کے حق میں عورت کے ولی پر تاوان ہو گا ۔

اردو ترجمہ · Urdu

نافع رحمہ اللہ سے روایت ہے کہ بے شک ( حضرت عمر رضی اللہ عنہ کے لخت جگر ) عبیداللہ بن عمر رضی اللہ عنہ کی بیٹی - جس کی والدہ ( حضرت عمر رضی اللہ عنہ کے بھائی ) حضرت زید بن خطاب رضی اللہ عنہ کی بیٹی تھیں ۔ حضرت عبداللہ بن عمر رضی اللہ عنہ کے بیٹے کے نکاح میں تھیں ( عبیداللہ اور عبداللہ رضی اللہ عنہ دونوں بھائی ہیں اور انھوں نے اپنے بیٹے بیٹی کو رشتہ ازدواج میں جوڑ دیا تھا ) پھر وہ ( خاوند ) اس حال میں فوت ہوا کہ اس نے نہ تو عورت سے مباشرت کی تھی اور نہ ہی اس کے لیے حق مہر متعین کیا تھا ، اس لڑکی کی ماں نے حق مہر کا مطالبہ کر دیا تو حضرت عبداللہ بن عمر رضی اللہ عنہ فرمانے لگے کہ اس کے لیے کوئی حق مہر نہیں ہے اور اگر ( شریعت میں ) اس کا حق مہر ( لازم ) ہوتا تو ہم اسے نہ روکتے اور نہ اس پر ظلم کرتے ، اس لڑکی کی ماں نے یہ بات ماننے سے انکار کر دیا ، تو ( خاندان والے ) لوگوں نے ان کے درمیان حضرت زید بن ثابت رضی اللہ عنہ کو ( حَکَم اور فیصل ) مقرر کیا ، سو انھوں نے بھی یہی فیصلہ کیا کہ اس لڑکی کے لیے کوئی حق مہر نہیں ہے ( کیونکہ اس کی شرم گاہ حلال نہیں ہوئی تھی ) اور اس کے لیے وراثت ( میں سے حصہ ) ہے ( کیونکہ وہ لڑکے کی موت کے وقت اس کی بیوی تھی ) ۔

اردو ترجمہ · Urdu

امام مالک رحمہ اللہ کو یہ خبر پہنچی کہ بے شک حضرت عمر بن عبدالعزیز رحمہ اللہ نے اپنی خلافت کے دوران اپنے عُمّال ( حکومتی عہدیداروں ) میں سے کسی کی طرف لکھا کہ یقیناً ہر وہ تحفہ ( ہدیہ ، عطیہ ) یا تکریم ( پر دلالت کرنے والا کوئی گفٹ ) جس کی شرط نکاح کرنے والے نے لگائی ہو ( اور خاوند سے اس نکاح کے انعقاد میں اس کا مطالبہ کر رکھا ہو ) خواہ وہ ( نکاح کرنے والا ولی ) باپ ہو یا کوئی اور تو وہ ( تحفہ و تکریم میں ملنے والا مال ) عورت کو ملے گا اگر وہ اس کا مطالبہ کر دے ۔