اردو ترجمہ · Urdu

حضرت عبداللہ بن عمر رضی اللہ عنہ سے روایت ہے ، وہ کہا کرتے تھے کہ جس شخص نے کوئی قسم کھائی اور اس میں تاکید پیدا کی ( یعنی اُسے دو تین بار کہا ) پھر اُسے توڑ دیا تو اس پر ایک گردن آزاد کرنا یا دس مسکینوں کو کپڑے پہنانا لازم ہے اور جس کسی نے قسم کھائی لیکن اس میں تاکید پیدا نہ کی پھر اسے توڑ ڈالا تو اس پر دس مسکینوں کو کھانا کھلانا لازم ہے ، ہر مسکین کے لیے گندم کا ایک ایک مُدّ ( 525 گرام لازم ) ہے پھر جو شخص ( ان مذکورہ کفاروں میں سے کسی کی طاقت ) نہ پائے تو ( اس پر ) تین دن کے روزے ( لازم ) ہیں ۔

اردو ترجمہ · Urdu

سلیمان بن یسار رحمہ اللہ سے روایت ہے ، کہتے ہیں کہ میں نے لوگوں کو اس حال میں پایا کہ جب وہ قسم کا کفارہ دیتے تو چھوٹے مُدّ کے حساب سے گندم کا ایک مُدّ دیتے تھے ، اور وہ سمجھتے تھے کہ یہ اُن سے کفایت کر جائے گا ۔

اردو ترجمہ · Urdu

نافع رحمہ اللہ حضرت عبداللہ بن عمر رضی اللہ عنہ سے روایت کرتے ہیں کہ بے شک وہ اپنی قسم ( کو پختہ اور مؤکد نہ کرتے تو اس ) کا کفارہ دس مسکینوں کو کھانا کھلا کر دیتے تھے ، ہر مسکین کے لیے گندم کا ایک مُدّ ہوتا تھا ، وہ بہت دفعہ ( کفارے میں غلام ) آزاد بھی کرتے تھے جس وقت کہ انھوں نے قسم میں تاکید کی ہوتی تھی ۔