اردو ترجمہ · Urdu

حضرت ابوہریرہ رضی اللہ عنہ سے روایت ہے کہ بے شک رسول ﷺ نے فرمایا :’’ قسم اس ذات کی جس کے ہاتھ میں میری جان ہے ! یقیناً میں چاہتا ہوں کہ اللہ کی راہ میں لڑوں پھر قتل کر دیا جاؤں ، پھر زندہ کیا جاؤں پھر قتل ( شہید ) کر دیا جاؤں ، پھر زندہ کیا جاؤں پھر قتل کر دیا جاؤں ۔‘‘ حضرت ابوہریرہ رضی اللہ عنہ ( یہ حدیث بیان کر کے ) تین بار فرماتے ہیں : میں اللہ کی قسم کھا کر گواہی دیتا ہوں کہ رسول اللہ ﷺ نے ایسا ہی فرمایا تھا ۔

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ یقیناً رسول اللہ ﷺ نے فرمایا :’’ اللہ تعالیٰ قیامت کے دن دو شخصوں پر مسکرائیں گے جن میں سے ایک شخص دوسرے شخص کو قتل کرتا ہے ( لیکن ) پھر ( بھی ) دونوں جنت میں داخل ہو جاتے ہیں ، ( اسی طرح کہ ) یہ ( دوسرا شخص ) اللہ کی راہ میں لڑتا ہے تو ( پہلے شخص کے ہاتھوں ) قتل کر دیا جاتا ہے ، پھر اللہ تعالیٰ اس قاتل پر شفقت فرماتے ہیں ( اور اسے توبہ کی توفیق دے کر اسلام کی نعمت عطا کرتے ہیں ) پھر وہ بھی ( راہ الٰہی میں ) لڑتا ہے تو شہید کر دیا جاتا ہے ۔

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ بلاشبہ رسول اللہ ﷺ نے فرمایا :’’ قسم اس ذات کی جس کے ہاتھ میں میری جان ہے ! جو کوئی بھی اللہ کی راہ میں زخمی کر دیا جائے - اور اللہ ہی بہتر جانتا ہے کہ کون اس کی راہ میں زخمی ہوتا ہے تو ضرور وہ قیامت کے دن اس حال میں آئے گا کہ اس کا زخم ( تازہ ) خون بہہ رہا ہو گا ، ( اس کا ) رنگ تو خون ہی کا ہو گا لیکن اس کی خوشبو کستوری کی ہو گی ۔

اردو ترجمہ · Urdu

زید بن اسلم رحمہ اللہ سے روایت ہے کہ بے شک حضرت عمر بن خطاب رضی اللہ عنہ یہ ( دعائیہ کلمات ) کہا کرتے تھے : اے اللہ ! میرا قتل ایسے آدمی کے ہاتھ سے نہ کرانا جس نے تیرے لیے ایک بھی سجدہ کیا ہو کہ ( پھر ) وہ اس سجدے کی وجہ سے قیامت کے دن تیرے پاس مجھ سے جھگڑا کرنے لگے ۔

اردو ترجمہ · Urdu

عبداللہ بن ابی قتادہ رحمہ اللہ اپنے والد ( حضرت ابوقتادہ رضی اللہ عنہ ) سے روایت کرتے ہیں ، انھوں نے کہا کہ ایک شخص رسول اللہ ﷺ کی خدمت میں حاضر ہوا ، پھر کہنے لگا کہ اے اللہ کے رسول ! اگر میں اللہ کی راہ میں قتل کر دیا جاؤں اس حال میں کہ ( صبر اور ) ثابت قدمی دکھانے والا ہوں ، ثواب کی امید رکھنے والا ہوں آگے بڑھنے والا ہوں ، پیٹھ پھیرنے والا نہ ہوں تو کیا اللہ تعالیٰ مجھ سے میرے گناہوں کو مٹا دیں گے ؟ تو رسول اللہ ﷺ نے فرمایا :’’ ہاں ‘‘ پھر جب وہ شخص پیٹھ پھیر کر جانے لگا تو اسے ( آپ ﷺ نے خود ) آواز دی یا اس کے متعلق ( کسی کو ) حکم فرمایا تو اسے آپ ﷺ کی طرف ( آنے کی ) آواز دی گئی ، چنانچہ رسول اللہ ﷺ نے فرمایا :’’ تم نے ( ابھی ابھی سوال کرتے ہوئے ) کیسے کہا تھا ؟‘‘ اُس نے آپ ﷺ کے سامنے اپنی بات دہرا دی تو رسول اللہ ﷺ نے فرمایا :’’ ہاں ‘‘ ، اللہ ـ ( سب گناہ ختم کر دے گا ) سوائے قرض کے ، جبریل علیہ السلام نے ( ابھی ابھی ) مجھ سے ایسے ہی کہا ہے ۔‘‘

اردو ترجمہ · Urdu

ابونضر رحمہ اللہ ( سالم بن ابی اُمیہ ) جو کہ عمر بن عبیداللہ رحمہ اللہ کے آزاد کردہ غلام ہیں ، سے روایت ہے ، انھیں یہ خبر پہنچی کہ بلاشبہ رسول اللہ ﷺ نے شہدائے احد کے متعلق فرمایا :’’ یہ وہ لوگ ہیں جن کے متعلق میں ( خود ) گواہی دوں گا ۔‘‘ حضرت ابوبکر صدیق رضی اللہ عنہ عرض کرنے لگے کہ اے اللہ کے رسول ! کیا ہم بھی ان کے بھائی نہیں ہیں ، ہم بھی اسی طرح اسلام لائے جس طرح وہ اسلام لائے اور ہم نے بھی اسی طرح جہاد کیا جس طرح انھوں نے جہاد کیا ؟ تو رسول اللہ ﷺ نے فرمایا :’’ کیوں نہیں ( تم بھی ان کے بھائی ہی ہو ) اور ( لیکن ) میں نہیں جانتا کہ تم میرے بعد کیا کرو گے ؟‘‘ راوی کہتے ہیں کہ پھر ( یہ سن کر ) حضرت ابوبکر رضی اللہ عنہ رونے لگے پھر ( اور ) روئے ، پھر کہنے لگے کہ کیا ہم آپ کے بعد ( زندہ ) رہنے والے ہیں ؟

اردو ترجمہ · Urdu

یحیی بن سعید رحمہ اللہ سے روایت ہے کہ رسول اللہ ﷺ تشریف فرما تھے اور مدینہ منورہ میں ایک قبر کھودی جا رہی تھی کہ ( اتنے میں ) ایک شخص نے قبر میں جھانکا ، پھر کہنے لگا کہ مومن کی یہ آرام گاہ بری ہے ، یہ سن کر رسول اللہ ﷺ نے فرمایا :’’ تو نے جو کہا وہ برا ہے ۔ ‘‘ وہ آدمی کہنے لگا کہ اے اللہ کے رسول ﷺ ! میں یہ مراد نہیں لے رہا تھا ، یقیناً میں نے تو صرف اور صرف اللہ کی راہ میں قتل ( کے ساتھ موازنہ ) مراد لیا ہے ( کہ اس کے مقابلے میں عام موت کا درجہ بہت کم ہے ) ، تو رسول اللہ ﷺ نے فرمایا :’’ ( واقعی ) اللہ کی راہ میں قتل ہونے جیسی چیز کوئی اور نہیں ہے ( لیکن اس کے ساتھ ساتھ مدینہ منورہ میں موت آنے کے حوالے سے یہ بات بھی برحق ہے کہ پوری ) زمین پر کوئی ایسا مقام نہیں ہے کہ جو میرے نزدیک مدینہ سے بڑھ کر زیادہ محبوب ہو ( اس معاملے میں ) کہ میری قبر وہاں ہو ۔‘‘ ( آپ ﷺ نے ) تین بار ( یہی فرمایا کہ مدینہ میں قبر کا ملنا مجھے پوری روئے زمین سے زیادہ محبوب ہے ۔ )