اردو ترجمہ · Urdu

حضرت ابوقتادہ انصاری رضی اللہ عنہ سے روایت ہے کہ بے شک وہ رسول اللہ ﷺ کے ہمراہ تھے یہاں تک کہ جب لوگ مکہ کی راہ میں کسی جگہ پر تھے تو وہ ( حضرت ابوقتادہ رضی اللہ عنہ ) اپنے ساتھیوں کے ہمراہ پیچھے رہ گئے جو کہ احرام باندھے ہوئے تھے اور وہ ( حضرت ابوقتادہ رضی اللہ عنہ ) محرم نہیں تھے ، انھوں ( حضرت ابوقتادہ رضی اللہ عنہ ) نے ایک جنگلی گدھا ( گورخر ) دیکھا تو وہ اپنے گھوڑے پر سوار ہو گئے ، پھر انھوں نے اپنے ساتھیوں سے درخواست کی کہ وہ انھیں ان کا کوڑا پکڑا دیں لیکن انھوں نے اس پر انکار کر دیا ، پھر انھوں نے اُن سے اپنا نیزہ مانگا تو انھوں نے انکار کر دیا ( نہ کوڑا پکڑایا ، اور نہ ہی نیزہ ) ، چنانچہ انھوں نے ( خود ہی نیچے اتر کر ) اسے پکڑا ، پھر گدھے پر حملہ کر دیا اور اسے مار ڈالا ، تو رسول اللہ ﷺ کے بعض صحابہ رضی اللہ عنہم نے اس میں سے کھا لیا اور بعض نے انکار کر دیا ، پھر جب انھوں نے رسول اللہ ﷺ کو پایا تو آپ سے اس بارے میں پوچھا تو آپ نے فرمایا :’’ یہ ایک ( خاص ) کھانا تھا جو اللہ نے تمھیں کھلایا ۔‘‘

اردو ترجمہ · Urdu

ہشام بن عروہ رحمہ اللہ اپنے والد ( عروہ بن زبیر رحمہ اللہ ) سے روایت کرتے ہیں کہ ( اُن کے والد ) حضرت زُبیر بن عوام رضی اللہ عنہ ہرنیوں کے خشک کیے ہوئے گوشت کے ٹکڑے حالت احرام میں زاد راہ کے طور پر ساتھ رکھتے تھے ۔

اردو ترجمہ · Urdu

زید بن اسلم رحمہ اللہ سے روایت ہے ، انھیں عطاء بن یسار رحمہ اللہ نے جنگلی گدھے کے متعلق حضرت ابوقتادہ رضی اللہ عنہ سے اسی طرح ہی بیان کیا جو ( اس باب کی پہلی حدیث میں امام مالک رحمہ اللہ کے شیخ ) ابونضر رحمہ اللہ کی حدیث میں ہے ، سوائے اس کے کہ زید بن اسلم رحمہ اللہ کی ( اس ) روایت میں یہ بھی ہے کہ رسول اللہ ﷺ نے فرمایا تھا :’’ کیا تمھارے پاس اس گدھے کے گوشت میں سے کچھ ہے ؟‘‘

اردو ترجمہ · Urdu

حضرت ( زید بن کعب ) بہزی رضی اللہ عنہ سے روایت ہے کہ بے شک رسول اللہ ﷺ ( حجۃ الوداع کے لیے ) مکہ کا ارادہ کرتے ہوئے اس حال میں نکلے کہ آپ احرام باندھے ہوئے تھے ، یہاں تک کہ جب آپ ﷺ روحاء کے مقام پر پہنچے تو اچانک ( وہاں ) ایک زخمی جنگلی گدھا ( موجود ) تھا ، چنانچہ رسول اللہ ﷺ کے سامنے اس کا تذکرہ کیا گیا تو آپ ﷺ نے فرمایا :’’ اُسے چھوڑ دو ، کیونکہ یقیناً امید ہے کہ اس ( کو زخمی کرنے والا اس ) کا مالک آ ہی جائے ۔‘‘ تو حضرت بہزی رضی اللہ عنہ جو کہ اس کے مالک تھے ، رسول اللہ ﷺ کی خدمت میں حاضر ہوئے ، پھر عرض کیا کہ اے اللہ کے رسول ! آپ اس گدھے کے متعلق اپنے معاملے کو لازم پکڑیں ( میں اسے آپ کی خدمت میں ہدیہ کر رہا ہوں ۔ اب آپ جو چاہیں اس کے متعلق فیصلہ فرما دیجیے ) چنانچہ آپ ﷺ نے حضرت ابوبکر رضی اللہ عنہ کو حکم فرمایا تو انھوں نے اسے ( یعنی اس کے گوشت کو ) سفر کے سب رفقاء کے درمیان تقسیم کر دیا ، پھر آپ ﷺ آگے بڑھے یہاں تک کہ جب اُثایا نامی جگہ پر پہنچے جو کہ رُوَیثہ اور عرج کے درمیان میں ہے تو اچانک ایک ہرن اپنا سر جھکائے ( اپنی ٹانگوں میں منہ ڈالے ہوئے ) سائے میں ( کھڑا ) تھا ، اس میں ایک تیر ( بھی پیوست ) تھا ، حضرت بہزی رضی اللہ عنہ کہتے ہیں کہ رسول اللہ ﷺ نے ایک شخص کو حکم فرمایا کہ اس کے پاس کھڑا رہے ( تاکہ ) لوگوں میں سے کوئی بھی اسے نہ چھیڑے یہاں تک کہ وہ سب اس کے پاس سے آگے گزر جائیں ۔

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ وہ بحرین سے ( مدینہ کی طرف ) روانہ ہوئے یہاں تک کہ جب وہ ( مدینہ کے قریب ) رَبَذَۃ مقام پر پہنچے تو اہل عراق کے ایک شتر سوار قافلے کو ( وہاں ) پایا جو حالت احرام میں تھے ، انھوں نے آپ سے شکار کے گوشت کے متعلق سوال کیا جسے انھوں نے ربذہ کے ( رہنے ) والوں کے پاس پایا تھا تو حضرت ابوہریرہ رضی اللہ عنہ نے انھیں اسے کھا لینے کا حکم دے دیا ، حضرت ابوہریرہ رضی اللہ عنہ کہتے ہیں کہ پھر یقیناً مجھے اس میں شک سا گزرا جو میں نے انھیں حکم دیا تھا ، چنانچہ جب میں مدینہ منورہ آیا تو میں نے حضرت عمر بن خطاب رضی اللہ عنہ کے سامنے اس کا تذکرہ کیا ، انھوں نے فرمایا کہ تم نے انھیں کیا حکم دیا تھا ؟ انھوں نے بتایا کہ میں نے انھیں اسے کھا لینے کا حکم دیا تھا تو حضرت عمر رضی اللہ عنہ فرمانے لگے : اگر تم نے انھیں اس کے علاوہ کوئی اور حکم دیا ہوتا تو میں تمھارے ساتھ ( ایسا ایسا ) کرتا ، وہ اس لفظ کے ساتھ انھیں ڈرا رہے تھے ۔

اردو ترجمہ · Urdu

سالم بن عبداللہ رحمہ اللہ سے روایت ہے ، انھوں نے حضرت ابوہریرہ رضی اللہ عنہ کو سنا جو حضرت عبداللہ بن عمر رضی اللہ عنہ کو بیان فرما رہے تھے کہ بے شک اُن کے پاس سے ربذہ کے مقام پر کچھ لوگ گزرے ، انھوں نے آپ سے اس شکار کے گوشت کے بارے میں فتوی طلب کیا کہ انھوں نے کچھ غیر محرم لوگوں کو اسے کھاتے ہوئے پایا تھا ، تو آپ رضی اللہ عنہ نے انھیں اسے کھا لینے کا فتویٰ دے دیا ، حضرت ابوہریرہ رضی اللہ عنہ کہتے ہیں کہ پھر میں حضرت عمر بن خطاب رضی اللہ عنہ کے پاس مدینہ آیا تو میں نے ان سے اس کے متعلق دریافت کیا ، انھوں نے پوچھا کہ تم نے انھیں کیا فتویٰ دیا تھا ؟ وہ کہتے ہیں کہ میں نے جواب دیا کہ میں نے انھیں اسے کھا لینے کا فتویٰ دیا تھا ، وہ کہتے ہیں کہ ( یہ سن کر ) حضرت عمر رضی اللہ عنہ فرمانے لگے کہ اگر تم نے انھیں اس کے علاوہ فتویٰ دیا ہوتا تو میں ضرور تمھیں سزا دیتا ۔

اردو ترجمہ · Urdu

عطاء بن یسار رحمہ اللہ سے روایت ہے کہ کعب احبار رحمہ اللہ ایک شُتر سوار قافلے میں ملک شام سے روانہ ہوئے ، وہ سب ( اہل قافلہ ) حالت احرام میں تھے ، یہاں تک کہ جب وہ راستے میں ( مدینہ کے پاس سے گزرنے سے بھی پہلے ) کسی جگہ پر تھے تو انھوں نے وہاں شکار کا گوشت پا لیا ، کعب رحمہ اللہ نے انھیں اسے کھا لینے کا فتویٰ دے دیا ۔ عطاء بن یسار رحمہ اللہ کہتے ہیں کہ پھر جب وہ مدینہ میں حضرت عمر بن خطاب رضی اللہ عنہ کے پاس آئے تو ان کے سامنے اس کا تذکرہ کیا ، انھوں نے پوچھا کہ کس نے تمھیں یہ فتویٰ دیا تھا ؟ انھوں نے کہا کہ کعب رحمہ اللہ نے ، حضرت عمر رضی اللہ عنہ فرمانے لگے کہ یقیناً ً میں نے اسے تم پر امیر مقرر کر دیا ہے یہاں تک کہ تم ( یہاں سے مکہ جا کر حج سے فارغ ہو کر پھر میرے پاس ) لوٹ آؤ ( تاکہ یہ تمھارے امام اور مفتی بنے رہیں ) ، پھر ( مدینہ سے آگے مکہ کی طرف جاتے ہوئے ) جب وہ مکہ کے راستے میں کسی جگہ پر تھے تو ان کے پاس سے ٹڈیوں کا لشکر ( ٹڈی دل ) گزرا ، تو کعب احبار رحمہ اللہ نے انھیں حکم دیا کہ انھیں پکڑو اور کھا لو ۔ عطاء بن یسار رحمہ اللہ کہتے ہیں کہ پھر جب وہ ( اہل قافلہ ) حضرت عمر بن خطاب رضی اللہ عنہ کے پاس ( واپسی کے سفر میں ) آئے تو انھوں نے ان کے سامنے اس ( ٹڈیوں کے واقعے ) کا تذکرہ کیا ، حضرت عمر رضی اللہ عنہ نے ( کعب رحمہ اللہ سے ) پوچھا : تمھیں کس چیز نے آمادہ کیا کہ تم نے انھیں یہ فتویٰ دے دیا ؟ تو وہ کہنے لگے کہ یہ سمندر کا شکار ہے ( اور سمندر کا شکار محرم کے لیے جائز ہے ) حضرت عمر رضی اللہ عنہ نے پوچھا کہ تمھیں ( یہ ) کیسے معلوم ہوا ؟ وہ کہنے لگے کہ اے امیر المؤمنین ! اس ذات کی قسم جس کے ہاتھ میں میری جان ہے ! یہ ٹڈی دل مچھلی کی چھینک کے سوا کچھ نہیں جسے وہ ہر سال دو بار چھینک مار کر نکالتی ہے ۔