اردو ترجمہ · Urdu

ام المومنین سیدہ عائشہ رضی اللہ عنہا سے روایت ہے کہ حضرت فاطمہ بنت ابی حبیش رضی اللہ عنہا نے عرض کیا : اے اللہ کے رسول ! یقیناً میں تو پاک ہی نہیں ہوتی ، ( ہر وقت خون آتا ہی رہتا ہے ) تو کیا میں نماز کو بھی ( ہمیشہ کے لیے ) چھوڑے رکھوں ؟ تو رسول اللہ ﷺ نے اس سے فرمایا :’’ بے شک یہ تو صرف اور صرف ایک رگ ( کا خون ) ہے اور حیض نہیں ہے ( بلکہ استحاضہ ہے ، ) تو جب ( استحاضہ کے دوران ) حیض کا خون ( بھی ) آ جائے تو نماز کو چھوڑ دے ، پھر جب خونِ حیض کی مدت گزر جائے تو اپنے جسم سے اس خون کو دھو ڈال اور ( غسلِ حیض کر کے ) نماز پڑھ ۔‘‘

اردو ترجمہ · Urdu

زوجۂ رسول ﷺ سیدہ اُمِ سلمہ رضی اللہ عنہا سے روایت ہے کہ زمانۂ رسول ﷺ میں ایک عورت کا خون بہت بہتا تھا تو حضرت اُمِ سلمہ رضی اللہ عنہا نے اس کے لیے رسول اللہ ﷺ سے ( مسئلہ پوچھا اور ) فتویٰ طلب کیا تو آپ ﷺ نے فرمایا : اُسے چاہیے کہ اُن ( گزشتہ ) دنوں اور راتوں کی تعداد پر غور کرے جن میں وہ ہر مہینے کا حیض گزارتی تھی ، قبل اس کے کہ اس کو وہ بیماری پہنچتی جو کہ اسے لگ چکی ہے ، ( یعنی استحاضہ اور لیکوریا کی بیماری سے پہلے کے اپنے ایامِ مخصوصہ کو ذہن میں رکھ کر ) انھی کے بقدر ہر مہینے سے نماز کو چھوڑ دے ، پھر جب وہ ( اپنے مخصوص ایام والی مدت کے برابر ) اس مقدار کو پیچھے چھوڑ دے ( یعنی اتنے ہی دن گزر جائیں ) تو اسے چاہیے کہ ( حیض سے فراغت کا ) غسل کر لے ، پھر ( استحاضہ کے خون سے اپنے لباس کو بچانے کے لیے ) کسی کپڑے کے ساتھ لنگوٹ باندھ لے ، پھر اسی حالت میں نماز ادا کرتی رہے ۔‘‘

اردو ترجمہ · Urdu

حضرت زینب بنت ابی سلمہ رضی اللہ عنہما سے روایت ہے کہ انھوں نے زینب ( کی بہن اُمِ حبیبہ ) بنت جحش رضی اللہ عنہا کو دیکھا جو حضرت عبدالرحمن بن عوف رضی اللہ عنہ کے نکاح میں تھیں اور مرضِ استحاضہ میں مبتلا تھیں ، تو وہ غسل کرتی اور نماز پڑھتی تھیں ۔

اردو ترجمہ · Urdu

سمی رحمہ اللہ جو کہ ابوبکر بن عبدالرحمن رحمہ اللہ کے آزاد کردہ غلام تھے ، روایت کرتے ہیں کہ قعقاع بن حکیم رحمہ اللہ اور زید بن اسلم رحمہ اللہ نے اُسے سعید بن مسیب رحمہ اللہ کی طرف بھیجا کہ ( اُن کے پاس جا کر ) اُن سے یہ سوال کرے کہ مستحاضہ عورت کس طرح ( یعنی کب کب ) غسل کرے گی ؟ تو انھوں نے جواب دیا کہ وہ ظہر سے ظہر تک غسل کرے گی اور ہر نماز کے لیے ( الگ الگ ) وضو کرے گی ، پھر اگر اُس پر خونِ استحاضہ کا غلبہ ہو تو ( نیچے ) کپڑا باندھ لے گی ۔

اردو ترجمہ · Urdu

ہشام بن عروہ رحمہ اللہ اپنے باپ عروہ رحمہ اللہ سے روایت کرتے ہیں ، انھوں نے کہا کہ مستحاضہ عورت پر اس کے علاوہ اور کچھ لازم نہیں کہ وہ صرف ایک غسلِ ( حیض ) کر لے ، پھر وہ اس کے بعد ہر نماز کے لیے ( صرف ) وضو کرتی رہے ۔