اردو ترجمہ · Urdu

عطاء بن یسار رحمہ اللہ سے روایت ہے کہ رسول اللہ ﷺ نے نمازوں میں سے کسی نماز میں تکبیر تحریمہ کہہ ڈالی ، پھر لوگوں کو اپنے ہاتھ سے اشارہ کیا کہ ( اپنی جگہوں پر ) ٹھہرے رہو ، پھر آپ ﷺ گھر چلے گئے ، پھر اس حال میں واپس آئے کہ آپ کے بدن مبارک پر پانی کا نشان تھا ۔

اردو ترجمہ · Urdu

زُیید بن صلت رحمہ اللہ سے روایت ہے ، کہتے ہیں کہ میں حضرت عمر بن خطاب رضی اللہ عنہ کے ہمراہ جُرُف نامی جگہ کی طرف نکلا ، حضرت عمر رضی اللہ عنہ کی ( کپڑوں پر ) نظر پڑی تو دیکھا کہ ان کو تو احتلام ہو چکا ہے اور انھوں نے بغیر غسل کیے نماز بھی ادا کر لی ہے ، تو وہ فرمانے لگے : اللہ کی قسم ! میں اپنے متعلق خیال نہیں کرتا مگر یہی کہ مجھے احتلام ہو چکا ہے اور مجھے اس کی خبر نہ ہو سکی ، ( خواب ہی نہ آیا یا خواب یاد ہی نہ رہا ) اور میں بغیر غسل کیے نماز بھی پڑھ چکا ہوں ۔ زُیید بن صلت رحمہ اللہ کہتے ہیں کہ پھر انھوں نے غسل کیا اور اپنے کپڑے میں جس نشان کو دیکھا اُسے دھو ڈالا اور جو نظر نہ آیا وہاں چھینٹے مار دیے ، پھر اذان یا اقامت کہی ، پھر نماز ادا کی ، ( اور یہ سارے کام ) چاشت کے ( وقت سورج کے ) بلند ہو جانے کے بعد اطمینان سے ( ادا کیے ) ۔‘‘

اردو ترجمہ · Urdu

سلیمان بن یسار رحمہ اللہ سے روایت ہے کہ حضرت عمر بن خطاب رضی اللہ عنہ صبح کے وقت جُرُف نامی جگہ میں اپنی زمین پر گئے ( وہاں ) انھوں نے اپنے کپڑے میں احتلام ( کا نشان ) دیکھا تو کہنے لگے : یقیناً میں احتلام ( کے مرض ) میں مبتلا ہو گیا ہوں جب سے کہ لوگوں کے معاملے کا متولی یعنی خلیفہ بنایا گیا ہوں ، چنانچہ انھوں نے غسل کیا اور اپنے کپڑے میں موجود احتلام کے نشان کو دھویا ، پھر سورج طلوع ہونے کے بعد نماز فجر پڑھی ۔

اردو ترجمہ · Urdu

سلیمان بن یسار رحمہ اللہ سے روایت ہے کہ حضرت عمر بن خطاب رضی اللہ عنہ نے ( مدینہ میں ) لوگوں کو صبح کی نماز پڑھائی ، پھر جُرُف مقام پر اپنی زمین میں آئے تو انھوں نے اپنے کپڑے میں احتلام کا نشان دیکھا ، کہنے لگے کہ جب سے ہم چربی پانے ( اور کھانے ) لگے ہیں ہماری تو رگیں ہی نرم ہو گئی ہیں ، پھر انھوں نے غسل کیا اور اپنے کپڑے سے احتلام کا نشان دھویا اور اپنی نماز کو دوبارہ پڑھ لیا ۔

اردو ترجمہ · Urdu

’’ یحیی بن عبدالرحمن بن حاطب رحمہ اللہ سے روایت ہے کہ وہ ( یحیی کے والد ) ایک شُتر سوار قافلے میں حضرت عمر بن خطاب رضی اللہ عنہ کے ہمراہ عمرہ ادا کرنے کے لیے گئے ، اُن میں حضرت عمرو بن عاص رضی اللہ عنہ بھی تھے ، حضرت عمر رضی اللہ عنہ نے ایک رات راستے میں کسی جگہ کسی چشمے کے قریب پڑاؤ کیا تو ان کو احتلام ہو گیا ، قریب تھا کہ صبح ہو جاتی لیکن اُن کو قافلے میں پانی نہ ملا ، چنانچہ وہ سوار ہو کر چشمے پر گئے ( وہاں غسل کیا ) اور اپنے کپڑے سے اس احتلام کا نشان دھونے لگے ، یہاں تک کہ کافی روشنی ہو گئی تو ان سے حضرت عمرو بن عاص رضی اللہ عنہ کہنے لگے کہ آپ نے ( کپڑے دھوتے دھوتے اتنی ) صبح کر دی ہے حالانکہ ہمارے پاس کئی کپڑے موجود ہیں ، آپ اپنے کپڑے کو چھوڑ دیجیے ، اسے دھو دیا جائے گا ، تو حضرت عمر رضی اللہ عنہ کہنے لگے : اے عاص کے بیٹے ! تجھ پر تعجب ہے ، اگر تو کپڑے رکھتا ہے تو کیا لوگوں میں سے ہر کسی کے پاس ( مزید ) کپڑے ہیں ؟ اللہ کی قسم ! اگر میں ایسا کرتا تو یہ ( میرے ماتحتوں اور رعایا کے لیے ) ایک سنت ( اور جاری ہو جانے والا طریقہ ) بن جاتا ( اور کتنے ہی لوگوں کو مشقت کا سامنا کرنا پڑتا ، اس لیے میں نیا کپڑا نہ لوں گا ) بلکہ ( اسی پہنے ہوئے کپڑے سے ) میں اُس نشان کو دھو ڈالوں گا جسے کہ دیکھ لوں گا اور جسے دیکھ نہ پاؤں گا اُس پر چھینٹے مار لوں گا ۔