اردو ترجمہ · Urdu

عبداللہ بن ابی بکر رحمہ اللہ سے روایت ہے ، انھوں نے عروہ بن زبیر رحمہ اللہ کو یہ کہتے ہوئے سنا کہ میں مروان بن حکم رحمہ اللہ کے پاس گیا ، ہم نے آپس میں اُن چیزوں کا تذکرہ کیا جن سے وضو لازم ہو جاتا ہے ، چنانچہ مروان رحمہ اللہ نے کہا کہ عضو مخصوص کو چھو لینے سے بھی وضو کرنا پڑتا ہے ، عروہ رحمہ اللہ نے کہا کہ مجھے اس کا علم نہیں ہے ، تو مروان رحمہ اللہ بن حکم نے کہا کہ مجھے حضرت بُسرہ بنت صفوان رضی اللہ عنہا نے خبر دی کہ اس نے رسول اللہ ﷺ کو یہ فرماتے ہوئے سنا تھا :’’ جب تم میں سے کوئی اپنے عضو کو چھو لے تو اسے چاہیے کہ وضو کرے ۔‘‘

اردو ترجمہ · Urdu

مصعب رحمہ اللہ بن سعد بن ابی وقاص سے روایت ہے ، کہتے ہیں کہ میں قرآن مجید کا مصحف ( اپنے والد ) حضرت سعد بن ابی وقاص رضی اللہ عنہ کے لیے پکڑے رکھتا تھا ، ( میں قرآن پکڑ لیتا اور وہ اس سے دیکھ کر پڑھتے رہتے یا مطلب یہ ہے کہ وہ زبانی پڑھتے اور میں قرآن سے دیکھ کر سنتا رہتا تھا ) تو ( ایک روز ) میں نے خارش کی تو حضرت سعد رضی اللہ عنہ نے پوچھا کہ شاید تم نے اپنے عضو کو چھو لیا ہے ؟ میں نے کہا : جی ہاں ، تو انھوں نے فرمایا : اٹھو ، وضو کرو ، چنانچہ میں اٹھا ، پھر وضو کیا ، پھر واپس لوٹ آیا ۔

اردو ترجمہ · Urdu

نافع رحمہ اللہ سے روایت ہے کہ حضرت عبداللہ بن عمر رضی اللہ عنہما فرمایا کرتے تھے : جب تم میں سے کوئی اپنے عضو کو چھو لے تو یقیناً اس پر وضو واجب ہو گیا ۔

اردو ترجمہ · Urdu

ہشام بن عروہ رحمہ اللہ سے روایت ہے کہ ان کے والد عروہ بن زبیر رحمہ اللہ فرمایا کرتے تھے : جس نے اپنے عضو کو چھو لیا تو بلاشبہ اس پر وضو واجب ہو گیا ۔

اردو ترجمہ · Urdu

سالم بن عبداللہ رحمہ اللہ سے روایت ہے ، کہتے ہیں کہ میں نے اپنے والد حضرت عبداللہ بن عمر رضی اللہ عنہما کو دیکھا کہ وہ غسل کر رہے تھے ، پھر ( غسل سے فارغ ہو کر ) انھوں نے وضو کیا تو میں نے کہا کہ ابا جان ! کیا آپ کے لیے ( یہ وضو سمیت کیا ہوا ) غسل ( نئے ) وضو سے کفایت نہیں کرتا ؟ تو انھوں نے کہا کہ کیوں نہیں ( غسل ہی کافی ہوتا ہے اور نئے وضو کی ضرورت نہیں ہوتی ) لیکن کبھی کبھار ( غسل کے دوران یا بعد میں ) میرا ہاتھ عضو کو لگ جاتا ہے تو وضو کر لیتا ہوں ۔

اردو ترجمہ · Urdu

سالم بن عبداللہ رحمہ اللہ سے روایت ہے ، کہتے ہیں کہ میں ایک سفر میں ( اپنے والد ) حضرت عبداللہ بن عمر رضی اللہ عنہما کے ہمراہ تھا ۔ میں نے ان کو ( ایک دن ) سورج نکلنے کے بعد دیکھا کہ انھوں نے وضو کیا ، پھر نماز پڑھی ، میں نے اُن سے کہا کہ یقیناً یہ ایسی نماز ہے جسے آپ ( پہلے تو ) نہیں پڑھا کرتے تھے ، انھوں نے جواب دیا کہ بے شک نماز فجر کا وضو کر لینے کے بعد میرا ہاتھ شرمگاہ کو لگ گیا تھا ، پھر میں نیا وضو کرنا بھول گیا ، اس لیے میں نے ( اب ) وضو کیا اور اپنی نمازِ ( فجر ) کو لوٹایا ہے ۔