اردو ترجمہ · Urdu

حضرت مغیرہ بن شعبہ رضی اللہ عنہ سے روایت ہے کہ یقیناً رسول اللہ ﷺ غزوۂ تبوک ( کے سفر ) میں قضائے حاجت کے لیے گئے ، مغیرہ رضی اللہ عنہ کہتے ہیں کہ میں بھی آپ ﷺ کے ہمراہ پانی لے کر گیا ، پھر جب آپ ﷺ ( فارغ ہو کر ) آئے تو میں نے آپ پر پانی انڈیلا ، چنانچہ آپ ﷺ نے اپنا چہرہ مبارک دھویا ، پھر آپ ﷺ شروع ہوئے ( اور ) اپنے ہاتھوں کو اپنے جبے کی آستینوں سے نکالنے لگے ، لیکن آستینوں کے تنگ ہونے کی وجہ سے ایسا نہ کر سکے ، تو آپ نے اپنے ہاتھوں کو جبہ کے نیچے سے نکال لیا ، پھر اپنے دونوں ہاتھوں ( یعنی بازوؤں کو دھویا ، پھر اپنے سر کا مسح کیا اور موزوں پر بھی مسح ہی کیا ، پھر رسول اللہ ﷺ ( لوگوں کے پاس ) اس حال میں آئے کہ حضرت عبدالرحمن بن عوف رضی اللہ عنہ لوگوں کی امامت کرا رہے تھے اور ان کو ایک رکعت پڑھا چکے تھے ، چنانچہ ( جماعت ختم ہونے کے بعد ) رسول اللہ ﷺ نے اپنی وہ رکعت ادا کی جو ( نماز فجر میں سے ) باقی رہتی تھی ، تو ( یہ صورتحال دیکھ کر ) لوگ گھبرا گئے ، پھر جب رسول اللہ ﷺ نے اپنی نماز پوری کر لی تو فرمایا :’’ تم نے اچھا کیا ۔‘‘

اردو ترجمہ · Urdu

نافع رحمہ اللہ اور عبداللہ بن دینار رحمہ اللہ سے روایت ہے کہ حضرت عبداللہ بن عمر رضی اللہ عنہما کوفہ میں حضرت سعد بن ابی وقاص رضی اللہ عنہ کے پاس آئے ، جو کوفہ کے امیر ( حاکم ) تھے ، حضرت عبداللہ بن عمر رضی اللہ عنہما نے ان کو دیکھا کہ وہ موزوں پر مسح کر رہے ہیں ، عبداللہ رضی اللہ عنہ نے ان پر اس فعل کا انکار ( کیا اور ان پر اعتراض ) کیا تو حضرت سعد رضی اللہ عنہ نے فرمایا کہ جب تم اپنے باپ ( حضرت عمر رضی اللہ عنہ ) کے پاس جاؤ تو اُن سے ( اس بارے میں ) پوچھنا ۔ عبداللہ رضی اللہ عنہ ( واپس مدینہ ) آئے تو حضرت عمر رضی اللہ عنہ سے اس بارے میں پوچھنا بھول گئے ، یہاں تک کہ حضرت سعد رضی اللہ عنہ بھی آ گئے تو انھوں نے عبداللہ بن عمر رضی اللہ عنہ سے پوچھا کہ کیا تو نے اپنے باپ سے سوال کیا ہے ؟ اس نے کہا نہیں ۔ پھر عبداللہ نے اپنے باپ سے پوچھا ، تو انھوں نے فرمایا : جب تم موزوں میں اپنے پاؤں اس حال میں داخل کرو کہ وہ باوضو ہوں تو ان پر مسح کر لیا کرو ، عبداللہ رضی اللہ عنہ کہنے لگے کہ خواہ ہم میں سے کوئی پاخانہ سے ( فارغ ہو کر ) آئے ( تو پھر بھی مسح کرے ) ؟ تو عمر رضی اللہ عنہ نے فرمایا : ہاں ، اگرچہ تم میں سے کوئی پاخانہ سے ہو کر آئے ۔

اردو ترجمہ · Urdu

نافع رحمہ اللہ سے روایت ہے کہ حضرت عبداللہ بن عمر رضی اللہ عنہما نے بازار میں پیشاب کیا ، پھر وضو کیا اور ( اس میں ) اپنے چہرے اور بازوؤں کو دھویا اور اپنے سر کا مسح کیا ، پھر جب وہ مسجد میں داخل ہوئے تو ان کو ایک جنازے کی طرف بلایا گیا تاکہ وہ اس پر نماز ادا کریں ، چنانچہ انھوں نے اپنے موزوں پر مسح کیا اور پھر اس ( میت ) پر نمازِ جنازہ پڑھی ۔

اردو ترجمہ · Urdu

سعید بن عبدالرحمن بن رُقیش اشعری رحمہ اللہ سے روایت ہے کہ انھوں نے حضرت انس بن مالک رضی اللہ عنہ کو دیکھا ، وہ قُبا میں آئے ، ( وہاں انھوں نے ) پیشاب کیا ، پھر ان کے پاس وضو کا پانی لایا گیا ، ( جس سے ) انھوں نے وضو کیا ، چنانچہ انھوں نے اپنے چہرے اور ہاتھوں کو کہنیوں سمیت دھویا ، اپنے سر کا مسح کیا اور موزوں پر بھی مسح کیا ، پھر مسجد قُبا میں آئے تو نماز ادا کی ۔