اردو ترجمہ · Urdu

امام مالک رحمہ اللہ کو یہ خبر پہنچی کہ بے شک حضرت ابوبکر صدیق رضی اللہ عنہ نے فرمایا : اگر انھوں نے مجھے اونٹ باندھنے کی رسی ( جو زکاۃ میں پڑتی ہو لیکن انھوں نے ) نہ دی تو میں اس پر بھی ان سے جہاد کروں گا ۔

اردو ترجمہ · Urdu

زید بن اسلم رحمہ اللہ سے روایت ہے ، کہتے ہیں کہ حضرت عمر رضی اللہ عنہ نے ( ایک دفعہ خدمت میں لایا ہوا ) کچھ دودھ پیا تو وہ انھیں بہت اچھا لگا ، چنانچہ انھوں نے اس شخص سے دریافت کیا جس نے انھیں دودھ پلایا تھا کہ یہ دودھ کہاں سے آیا ؟ تو اس نے انھیں بتایا کہ بے شک وہ ایک پانی ( کے چشمے ) پر گیا تھا جس کا اس نے نام بھی لیا ( لیکن راوی کو بھول گیا یا اس نے اس کے بیان کرنے کی ضرورت نہ سمجھی ، اس شخص نے مزید کہا : ) تو اچانک میں نے دیکھا کہ وہاں زکاۃ کے جانوروں میں سے کچھ جانور تھے اور وہ چرواہے ان کو پانی پلا رہے تھے ، پھر انھوں نے میرے لیے ان کے دودھ میں سے کچھ دوہا تو میں نے اسے اپنے مشکیزے میں ڈال لیا تو وہ یہی تھا ( جو آپ نے پیا ہے ) تو ( یہ سنتے ہی ) حضرت عمر بن خطاب رضی اللہ عنہ نے اپنا ہاتھ اپنے منہ میں داخل کیا ، پھر اس دودھ کی قے کر دی ۔

اردو ترجمہ · Urdu

امام مالک رحمہ اللہ کو یہ خبر پہنچی کہ بے شک حضرت عمر بن عبدالعزیز رحمہ اللہ کے ایک عامل ( زکاۃ اکٹھی کرنے پر مقرر شخص ) نے ان کی طرف خط لکھا ، ( جس میں ) وہ یہ ذکر کر رہا تھا کہ ایک شخص نے اپنے مال کی زکاۃ روک لی ہے ( اور ادا نہیں کر رہا ) ، تو حضرت عمر بن عبدالعزیز رحمہ اللہ نے اس کی طرف یہ جواب لکھا کہ تم اسے چھوڑ دو اور مسلمانوں کے ساتھ اس سے زکاۃ نہ لو ، امام مالک رحمہ اللہ کہتے ہیں کہ اس شخص تک یہ بات پہنچ گئی تو اس پر بہت سخت ( اور گراں ) گزری اور اس کے بعد اس نے اپنے مال کی زکاۃ ادا کر دی ، چنانچہ عمر بن عبدالعزیز رحمہ اللہ کے عامل نے ان کی طرف ( پھر خط ) لکھا ( جس میں ) وہ ان کے لیے یہ صورت حال ذکر کر رہا تھا ، تو عمر رحمہ اللہ نے اس کی طرف لکھا کہ اس سے زکاۃ لے لو ۔