اردو ترجمہ · Urdu

سیدہ عائشہ رضی اللہ عنہا زوجہ رسول اللہ ﷺ سے روایت ہے ، کہتی ہیں کہ حضرت عمر بن خطاب رضی اللہ عنہ کے پاس سے زکاۃ کی بکریاں گزاری گئیں تو انھوں نے ان میں سے ایک بڑے تھنوں والی دودھیل بکری دیکھی ، سو حضرت عمر بن خطاب رضی اللہ عنہ نے پوچھا کہ یہ بکری کیسی ہے ؟ ( اس کا کیا معاملہ ہے ؟ ) تو لوگوں نے کہا کہ یہ زکاۃ سے حاصل ہونے والی بکری ہے ، چنانچہ حضرت عمر رضی اللہ عنہ فرمانے لگے : یہ بکری اس کے مالکوں نے خوشی سے نہیں دی ، ( بھلا کون ایسا دودھ دینے والا عمدہ جانور زکاۃ میں نکالتا ہے ) لوگوں کو فتنے میں نہ ڈالو ، لوگوں کے عمدہ مال نہ لیا کرو ، کھانے ( اور رزق کا باعث بننے والے ایسے جانور زکاۃ میں وصول کرنے ) سے باز رہو ۔

اردو ترجمہ · Urdu

محمد بن یحیی بن حبان رحمہ اللہ سے روایت ہے ، کہتے ہیں کہ اشجع قبیلے کے دو شخصوں نے مجھے بتایا کہ حضرت محمد بن مسلمہ انصاری رضی اللہ عنہ ان کے پاس زکاۃ اکٹھی کرنے کے لیے ( عامل اور ساعی بن کر ) آئے تھے ، چنانچہ وہ مال والے ( مالک ) سے کہتے کہ اپنے مال کی زکاۃ نکال کر میرے پاس لاؤ ، تو وہ ان کے پاس جو بھی ایسی بکری لاتا جس میں اس ( مال ) کے حق کی پوری ادائیگی ( ممکن محسوس ہوتی اور وہ زکاۃ کے لائق ) ہوتی تو وہ اسے ضرور قبول کر لیتے ۔