اردو ترجمہ · Urdu

زریق بن حیان رحمہ اللہ سے روایت ہے اور زریق رحمہ اللہ ، ولید ( بن عبدالملک ) ، سلیمان ( بن عبدالملک ) اور عمر بن عبدالعزیز رحمہ اللہ ( کی حکومتوں ) کے زمانے میں مصر کے راستے پر مقرر تھے ( جس پر وہ لوگوں سے زکاۃ اور محصول کی وصولی کرتے تھے ) انھوں نے بیان کیا کہ حضرت عمر بن عبدالعزیز رحمہ اللہ نے ان کی طرف یہ ( حکم نامہ ) لکھا کہ دیکھو مسلمانوں میں سے جو کوئی تمھارے پاس سے گزرے تو جو کچھ ان کے مالوں میں سے ظاہر ہو جن میں وہ تجارتی لین دین کرتے ہوں ، اس میں سے ہر چالیس دینار ( کے بقدر مال ) میں سے ایک دینار ( کی قیمت ) وصول کر لے ، پھر جو اس سے کم ہو تو اسی حساب سے ( چالیسواں حصہ وصول کرتا رہ ) یہاں تک کہ وہ بیس دینار کو پہنچ جائے ( تو اس میں سے چالیسواں حصہ یعنی نصف دینار وصول کرو اور نصاب کی یہی آخری حد ہے ) پھر اگر وہ ( سامان بیس دینار کی مقدار سے ) دینار کا تہائی حصہ بھی کم ہو تو اسے چھوڑ دینا اور اس سے کچھ بھی وصول نہ کرنا اور اہل ذمہ ( غیر مسلم اقلیتوں ) میں سے جو کوئی تمھارے پاس سے گزرے تو وہ جن مالوں میں تجارتی لین دین کرتے ہوں اس میں سے ہر بیس دینار ( کی مالیت ) میں سے ایک دینار ( کے بقدر ) وصول کرنا ( یعنی ان سے بیسواں حصہ ٹیکس لو ) پھر جو اس سے کم ہو تو اسی حساب سے ( بیسواں حصہ ) وصول کرتے رہو یہاں تک کہ وہ مال دس دینار ( کی مالیت ) تک پہنچ جائے ( تو اس میں سے نصف دینار لے لو لیکن ) اگر وہ ( تجارتی سامان دس دینار سے ) تہائی دینار بھی کم ہو تو اسے چھوڑ دو اور اس میں سے کچھ نہ لو اور جو کچھ تم نے ان سے وصول کیا ہو اس کی ایک تحریر ( رسید ) اگلے سال کی اسی تاریخ تک کے لیے انھیں لکھ کر دے دو ۔