اردو ترجمہ · Urdu

حضرت ابوسعید خدری رضی اللہ عنہ سے روایت ہے ، کہتے ہیں کہ رسول اللہ ﷺ ماہِ رمضان کے درمیانی عشرے ( دس دنوں ) کا اعتکاف فرمایا کرتے تھے ، ایک سال آپ ﷺ نے ( اسی عشرے کا ) اعتکاف فرمایا ، یہاں تک کہ جب اکیسویں رات آئی اور یہ وہ رات تھی جس کی صبح کو آپ ﷺ اپنے اعتکاف سے نکل جایا کرتے تھے ، ( لیکن اس دفعہ ) فرمایا :’’ جو شخص میرے ساتھ اعتکاف کر چکا ہے وہ آخری دس راتوں کا بھی اعتکاف کرے ، اور میں نے اس رات کو دیکھ ( کر جان ) لیا تھا لیکن پھر مجھے یہ رات بھلا دی گئی اور میں نے ( خواب میں لیلۃ القدر دکھائے جانے کے موقع پر ) خود کو دیکھا کہ میں لیلۃ القدر کی صبح کو پانی اور مٹی ( بارش کے کیچڑ ) میں سجدہ کر رہا ہوں لہٰذا تم اسے آخری دس راتوں میں تلاش کرو اور ( ان میں سے بھی ) طاق راتوں میں اسے ڈھونڈا کرو ۔‘‘ حضرت ابوسعید خدری رضی اللہ عنہ کہتے ہیں کہ اسی ( اکیسویں ) رات آسمان برس پڑا اور مسجد ایک چھپر پر تھی ( مسجد کی چھت کھجور کے پتوں اور شاخوں سے بنے ہوئے ایک چھپر کی شکل میں تھی ) چنانچہ مسجد ٹپکنے لگی ، حضرت ابوسعید خدری رضی اللہ عنہ کہتے ہیں کہ میری دونوں آنکھوں نے رسول اللہ ﷺ کو دیکھا کہ آپ اکیسویں رات کو ( نماز فجر سے فارغ ہو کر ) پھرے تو آپ ﷺ کی مبارک پیشانی اور ناک پر ( کیچڑ میں سجدہ کرنے کی وجہ سے ) پانی اور مٹی کا نشان تھا ۔

اردو ترجمہ · Urdu

ہشام بن عروہ رحمہ اللہ اپنے والد ( عروہ رحمہ اللہ ) سے روایت کرتے ہیں کہ رسول اللہ ﷺ نے فرمایا :’’ لیلۃ القدر کو رمضان کی آخری دس راتوں میں تلاش کیا کرو ۔‘‘

اردو ترجمہ · Urdu

حضرت عبداللہ بن عمر رضی اللہ عنہما سے روایت ہے کہ رسول اللہ ﷺ نے فرمایا :’’ لیلۃ القدر کو رمضان کی آخری سات راتوں میں تلاش کرو ۔‘‘

اردو ترجمہ · Urdu

ابونضر رحمہ اللہ جو کہ عمر بن عبیداللہ رحمہ اللہ کے آزاد کردہ غلام ہیں ، سے روایت ہے کہ حضرت عبداللہ بن انیس جہنی رضی اللہ عنہ نے رسول اللہ ﷺ سے عرض کیا کہ اے اللہ کے رسول ! بے شک میرا گھر ( کافی ) دور ہے ، آپ مجھے کسی ایک رات کے بارے میں بتا دیجیے جس میں میں ( مسجد میں ) پڑاؤ ڈالوں ، تو رسول اللہ ﷺ نے اس سے فرمایا :’’ رمضان کی تئیسویں تاریخ کو آ جانا ۔‘‘

اردو ترجمہ · Urdu

حضرت انس بن مالک رضی اللہ عنہ سے روایت ہے ، کہتے ہیں کہ رسول اللہ ﷺ ( ماہ رمضان میں گھر سے نکلے اور ) ہمارے پاس تشریف لائے اور فرمایا :’’ بے شک مجھے ماہ رمضان کی یہ رات ( لیلۃ القدر ) دکھا دی گئی تھی ، پھر دو شخص باہم جھگڑ پڑے تو ( اس جھگڑے کی نحوست سے ) اس رات ( کی تعیین ) کو اٹھا لیا گیا ، لہٰذا تم اسے ( آخر سے ) نویں ، ساتویں اور پانچویں رات میں تلاش کرو ۔‘‘

اردو ترجمہ · Urdu

حضرت عبداللہ بن عمر رضی اللہ عنہ بیان کرتے ہیں کہ اصحاب رسول میں سے چند آدمیوں کو خواب میں لیلۃ القدر کے متعلق یہ دکھایا گیا کہ وہ آخری سات راتوں میں ہے تو رسول اللہ ﷺ نے فرمایا :’’ یقیناً میں دیکھ رہا ہوں کہ تمھارے خواب آخری سات راتوں کے متعلق متفق ہو گئے ہیں ، لہٰذا جو شخص اس رات کو تلاش کرنا چاہے اسے چاہیے کہ آخری سات راتوں میں اسے ڈھونڈے ۔‘‘

اردو ترجمہ · Urdu

امام مالک رحمہ اللہ نے اہل علم میں سے ایک ثقہ و معتبر شخص کو سنا جو کہہ رہے تھے کہ یقیناً رسول اللہ ﷺ کو آپ ﷺ سے پہلے لوگوں کی عمریں دکھائی گئیں یا ان میں سے جو اللہ نے چاہا دکھایا تو ( ان کے مقابلے میں ) گویا رسول اللہ ﷺ نے اپنی امت کی عمروں کو چھوٹا خیال کیا کہ وہ اس بات سے قاصر رہ جائیں گے کہ آپ کے امتی اس جیسے عمل کو پہنچ سکیں جس کو ان کے علاوہ پہلی ( امتوں کے ) لوگ لمبی عمر کی وجہ سے پہنچے تھے تو ( آپ ﷺ کی یہ پریشانی دیکھ کر ) اللہ تعالیٰ نے آپ کو لیلۃ القدر عطا فرما دی جو ہزار مہینے سے بھی بہتر ہے ۔

اردو ترجمہ · Urdu

امام مالک رحمہ اللہ کو یہ خبر پہنچی کہ سعید بن مسیب رحمہ اللہ فرمایا کرتے تھے : جو شخص لیلۃ القدر میں سے صرف عشاء کی نماز کو حاضر ہو گیا تو اس نے لیلۃ القدر میں سے اپنا حصہ پا لیا ۔