اردو ترجمہ · Urdu

سیدہ عائشہ رضی اللہ عنہا زوجہ رسول ﷺ سے روایت ہے ، انھوں نے رسول اللہ ﷺ کو آپ کی وفات سے پہلے فرماتے ہوئے سنا ، اس حال میں کہ آپ ﷺ سیدہ عائشہ رضی اللہ عنہا کے سینے کے ساتھ سہارا لگائے ہوئے تھے ، انھوں نے آپ ﷺ کی طرف کان لگائے تو آپ یہ فرما رہے تھے :’’ اے اللہ ! مجھے معاف فرما ، مجھ پر رحم فرما اور مجھے سب سے بلند رفیق کے ساتھ ملا ۔‘‘

اردو ترجمہ · Urdu

حضرت عائشہ رضی اللہ عنہا زوجہ پیغمبر ﷺ سے روایت ہے کہ رسول اللہ ﷺ نے فرمایا :’’ کسی بھی پیغمبر کو موت نہیں آتی یہاں تک کہ اسے اختیار دے دیا جاتا ہے ( کہ آپ دنیا میں زندہ رہنا چاہتے ہیں یا رب کے پاس جانا چاہتے ہیں ، سیدہ عائشہ رضی اللہ عنہا کہتی ہیں کہ میں نے آپ ﷺ کو ( آپ کی وفات کے قریب ) یہ فرماتے ہوئے سنا ’’ اے اللہ ( میں ) سب سے بلند رفیق ( کا انتخاب کرتا ہوں ) ‘‘ ، تو میں پہچان گئی کہ بے شک آپ ﷺ ( اب ) جانے ہی والے ہیں ( اور آپ ﷺ کو بھی اختیار دے دیا گیا ہے ) ۔

اردو ترجمہ · Urdu

حضرت عبداللہ بن عمر رضی اللہ عنہما سے روایت ہے کہ رسول اللہ ﷺ نے فرمایا :’’ بے شک تم میں سے کوئی شخص جب مرتا ہے تو صبح و شام اس پر اس کا ( آخری ) ٹھکانہ ( پیش کیا جاتا اور ) دکھایا جاتا رہتا ہے ، اگر وہ اہل جنت میں سے ہو تو اہل جنت ( کے ٹھکانوں ) میں سے ( دکھایا جاتا ہے ) اور اگر جہنم والوں میں سے ہو تو اہل جہنم ( کے ٹھکانوں ) میں سے ( اس کا ٹھکانہ دکھایا جاتا رہتا ہے اور اسے اس کا مقام دکھا کر ) کہا جاتا ہے کہ یہ تیرا ( آخری مقام اور ) ٹھکانہ ہے ( اسے دیکھ کر تسلی و خوشی یا حسرت و خوف محسوس کرتے رہو ) یہاں تک کہ ( آخر کار ) اللہ تعالیٰ قیامت کے دن تجھے اس کی طرف بھیج دے گا ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ ابن آدم کے پورے جسم کو زمین کھا جاتی ہے ، سوائے ریڑھ کی ہڈی کے آخری حصے کے ، اسی سے وہ پیدا کیا گیا اور اسی سے اس کو ( دوبارہ ) جوڑا جائے گا ۔‘‘

اردو ترجمہ · Urdu

حضرت کعب بن مالک رضی اللہ عنہ بیان کیا کرتے تھے کہ رسول اللہ ﷺ نے فرمایا :’’ بے شک مومن کی روح تو ایک پرندہ ( بن جاتی ) ہے جو جنت کے درختوں میں سے کھاتا رہتا ہے ، یہاں تک کہ اللہ تعالیٰ اس روح کو اس کے جسم کی طرف اس دن واپس لوٹا دے گا جس میں وہ اسے ( دوبارہ زندہ کر کے ) اٹھائے گا ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ اللہ تبارک و تعالیٰ فرماتے ہیں : جب میرا بندہ میری ملاقات کو محبوب جانتا ہے تو میں بھی اس کی ملاقات کو محبوب جانتا ہوں اور جب وہ میری ملاقات کو ناپسند کرتا ہے تو میں بھی اس کی ملاقات کو ناپسند کرتا ہوں ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ ( تم سے پہلے گزر جانے والی امتوں میں سے ) ایک شخص جس نے کبھی بھی کوئی نیکی نہ کی تھی ، اپنے گھر والوں سے کہا کہ جب وہ مر جائے تو اسے آگ میں جلا دینا ، پھر اس کے نصف حصے کو ( آدھی راکھ کو ) خشکی میں اور دوسرے نصف حصے کو سمندر میں اڑا دینا ، پس اللہ کی قسم ! اگر اللہ نے اس ( کو جمع کرنے ) پر قدرت پا لی تو اسے ضرور ایسا سخت عذاب دے گا جو وہ جہانوں میں سے کسی کو بھی نہیں دیتا ، پھر جب وہ آدمی مر گیا تو گھر والوں نے وہی کچھ کیا جس کا اس نے انھیں حکم دیا تھا ، چنانچہ اللہ تعالیٰ نے خشکی کو حکم دیا تو اس نے وہ سب کچھ جمع کر دیا جو اس میں تھا ، اور اللہ نے سمندر کو حکم دیا تو اس نے بھی وہ سب اکٹھا کر دیا جو اس میں تھا ، پھر اللہ نے اس آدمی ( کو زندہ کر کے اس ) سے پوچھا : بتاؤ ، تم نے ایسا کیوں کیا ؟ وہ کہنے لگا کہ اے میرے رب ! تیرے ڈر ہی کی وجہ سے ( میں نے ایسا کیا تھا کہ کہیں تیرے عذاب میں گرفتار نہ ہو جاؤں ) اور تو بہتر جانتا ہے ۔‘‘ نبی ﷺ نے فرمایا :’’ تو ( یہ سن کر ) اللہ تعالیٰ نے اس کی بخشش فرما دی ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ ہر بچہ فطرت سلیمہ پر ( یعنی حالت اسلام میں مسلمان ) پیدا ہوتا ہے ، پھر اس کے ماں باپ اس کو یہودی بناتے ہیں یا اسے عیسائی بنا لیتے ہیں جس طرح کہ اونٹنی مکمل ( صحیح سلامت اور پورے اعضاء والا ) بچہ جنتی ہے ، کیا تم ( کسی جانور کے پیدا ہونے والے بچے کو ) کٹے ہوئے کان والا دیکھتے ہو ‘‘؟ لوگوں نے عرض کیا کہ اے اللہ کے رسول ! آپ ہمیں اس بچے کے بارے میں بتائیے جو صغر سنی ( بالکل چھوٹی عمر ) ہی میں مر جاتا ہے ، فرمایا ’’ اللہ بہتر جاننے والا ہے اس عمل کو جسے وہ ( بچے بڑے ہو کر ) کرنے والے تھے ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ قیامت قائم نہ ہو گی یہاں تک کہ ایک شخص دوسرے شخص کی قبر کے پاس سے گزرے گا تو ( تمنا کرتے ہوئے ) یہ کہے گا : اے کاش ! میں اس کی جگہ ( قبر میں پہنچ چکا ) ہوتا ۔‘‘

اردو ترجمہ · Urdu

حضرت ابوقتادہ بن ربعی رضی اللہ عنہ سے روایت ہے کہ رسول اللہ ﷺ کے پاس سے ایک جنازہ گزارا گیا تو آپ نے فرمایا :’’ یہ راحت پانے والا ہے یا اس سے راحت پائی گئی ہے ‘‘ لوگوں نے عرض کیا کہ اے اللہ کے رسول ! مستریح ( راحت پانے والے ) یا مستراح منہ ( جس سے راحت پائی گئی ہو ) سے کیا مراد ہے ؟ فرمایا :’’ مومن بندہ ( اپنی موت کے ساتھ ) دنیا کی تھکاوٹ اور تکلیف سے راحت پا کر اللہ کی رحمت کی طرف منتقل ہو جاتا ہے اور فاسق و فاجر شخص سے انسان ، شہر ( اور بستیاں ) ، درخت اور جانور راحت پاتے ہیں ۔‘‘

اردو ترجمہ · Urdu

ابونضر رحمہ اللہ جو کہ عمر بن عبیداللہ رحمہ اللہ کے آزاد کردہ غلام ہیں ، سے روایت ہے کہ جب حضرت عثمان بن مظعون رضی اللہ عنہ فوت ہوئے اور ان کا جنازہ آپ ﷺ کے پاس سے گزرا تو رسول اللہ ﷺ نے فرمایا :’’ تم دنیا سے اس حال میں چلے گئے کہ تم نے دنیا کی کسی چیز سے تعلق نہ رکھا ۔‘‘

اردو ترجمہ · Urdu

سیدہ عائشہ رضی اللہ عنہا زوجہ پیغمبر ﷺ سے روایت ہے کہ ایک رات رسول اللہ ﷺ ( اپنے بستر سے ) اٹھے ، اپنے کپڑے زیب تن کیے ، پھر باہر تشریف لے گئے ، سیدہ عائشہ رضی اللہ عنہا کہتی ہیں کہ میں نے اپنی ( آزاد کردہ ) لونڈی حضرت بریرہ رضی اللہ عنہا سے کہا کہ وہ آپ ﷺ کے پیچھے پیچھے جائے ، چنانچہ وہ آپ ﷺ کے پیچھے چلی گئی ، ( آپ ﷺ چلتے رہے ) یہاں تک کہ بقیع قبرستان میں آئے ، آپ ﷺ ( مسجد نبوی کی جانب والی ) قبرستان کی قریب ترین جگہ میں ، جب تک اللہ نے چاہا کھڑے رہے ، پھر واپس لوٹ آئے ، بریرہ رضی اللہ عنہا آپ ﷺ سے پہلے واپس آ گئی اور اس نے مجھے بتا دیا ، پھر میں نے ( رات بھر تو ) آپ ﷺ کے سامنے کسی چیز کا ذکر نہ کیا یہاں تک کہ آپ نے صبح کی تو میں نے اس ( واقعے ) کا تذکرہ کر دیا ، چنانچہ آپ ﷺ نے فرمایا :’’ مجھے بقیع قبرستان والوں کی طرف بھیجا گیا تھا تاکہ میں ان کے لیے دعا کروں ۔‘‘

اردو ترجمہ · Urdu

نافع رحمہ اللہ سے روایت ہے کہ حضرت ابوہریرہ رضی اللہ عنہ نے فرمایا : جنازے لے کر چلنے میں جلدی کیا کرو ، کیونکہ یا تو وہ ( میت ) خیر ( و بھلائی کا منبع اور خیر ہی کی مستحق ) ہے جس کی طرف تم اسے ( جلد ) پہنچا دو گے یا پھر وہ شر ( کا مجسمہ اور برائی سے بھرپور بوجھ ) ہے جسے تم اپنی گردنوں سے ( جلد ) اتار دو گے ۔