اردو ترجمہ · Urdu

حضرت جابر بن عتیک رضی اللہ عنہ سے روایت ہے کہ رسول اللہ ﷺ حضرت عبداللہ بن ثابت رضی اللہ عنہ کی تیمارداری کے لیے تشریف لائے ، آپ ﷺ نے ان کو اس حالت میں پایا کہ ان پر ( بیماری کی شدت اور بیہوشی کا ) غلبہ ہو چکا تھا ، آپ ﷺ نے انھیں ذرا بلند آواز سے پکارا لیکن انھوں نے ( بیہوشی کی وجہ سے ) آپ ﷺ کو کوئی جواب نہ دیا تو رسول اللہ ﷺ نے ( اِنَّا لِلّٰہِ وَ اِنَّا اِلَیْہِ رَاجِعُوْنَ ) پڑھا ( کیونکہ یہ کلمہ صرف موت پر ہی نہیں بلکہ کسی بھی مصیبت پر پڑھا جاتا ہے ) آپ ﷺ نے ( انھیں کنیت سے مخاطب کر کے ) فرمایا :’’ اے ابو ربیع ! ہم تجھ پر مغلوب ہو گئے ہیں ۔‘‘ ( تقدیر کے مقابلے میں ہمارا کوئی بس نہیں چلتا ۔ گھر والوں نے سمجھا کہ شاید موت آ گئی ہے ) تو عورتوں کی چیخ نکل گئی اور وہ رونے لگیں ، حضرت جابر بن عتیک رضی اللہ عنہ انھیں خاموش کرانے لگے تو رسول اللہ نے فرمایا :’’ انھیں چھوڑ دو ، پھر جب واقع ہو جائے تو کوئی رونے والی ہرگز نہ روئے ۔‘‘ صحابہ رضی اللہ عنہم نے عرض کیا کہ اے اللہ کے رسول ! واقع ہو جانے سے کیا مراد ہے ؟ فرمایا :’’ ( مطلب یہ ہے کہ ) جب وہ مر جائے ( اور اس پر موت واقع ہو جائے ) ‘‘ ، ان کی ( حضرت عبداللہ بن ثابت رضی اللہ عنہ کی ) بیٹی اپنے والد کو مخاطب کر کے کہنے لگی کہ بے شک میں یہ امید لگائے بیٹھی تھی کہ آپ ( جہاد کے دوران ) شہید ہوں گے کیونکہ بلاشبہ آپ تو ( جہاد کے لیے ) اپنی تیاری بھی مکمل کر چکے تھے ، تو ( یہ سن کر ) رسول اللہ ﷺ نے فرمایا :’’ یقیناً اللہ تعالیٰ نے ان کی نیت کے حساب سے ان کا اجر جاری فرما دیا ہے ، اور ( بھلا ) تم کس چیز کو شہادت شمار کرتے ہو ؟‘‘ لوگوں نے عرض کیا کہ اللہ کی راہ میں قتل ہو جانے کو ۔ تو رسول اللہ ﷺ نے فرمایا :’’ راہ الٰہی میں قتل ہونے کے علاوہ بھی سات قسم کے شہداء ہیں : طاعون کی وبا سے مرنے والا بھی شہید ہے ، پانی میں ڈوب کر مرنے والا بھی شہید ہے ، پہلو کی تکلیف سے مرنے والا بھی شہید ہے ، پیٹ کی بیماری سے مرنے والا بھی شہید ہے ، جل کر مرنے والا بھی شہید ہے ، گرنے والی چیز کے نیچے آ کر مرنے والا بھی شہید ہے ، وہ عورت بھی شہید ہے جو ( بچے کی پیدائش سے پہلے ہی یا اس کے دوران یا بعد میں ) زچگی کی تکلیف سے مر جاتی ہے ۔‘‘

اردو ترجمہ · Urdu

عمرہ بنت عبدالرحمن رحمہ اللہ سے روایت ہے ، انھوں نے ام المؤمنین سیدہ عائشہ رضی اللہ عنہا کو اس وقت کہتے ہوئے سنا جب ان کے سامنے یہ تذکرہ کیا گیا کہ حضرت عبداللہ بن عمر رضی اللہ عنہما کہتے ہیں : میت کو زندہ شخص کے رونے کی وجہ سے عذاب دیا جاتا ہے ، تو سیدہ عائشہ رضی اللہ عنہا نے فرمایا : اللہ تعالیٰ ابوعبدالرحمن ( یعنی حضرت ابن عمر رضی اللہ عنہما ) کی مغفرت فرمائے ، آگاہ رہو ، انھوں نے جھوٹ نہیں بولا لیکن وہ بھول گئے ہیں یا ان سے خطا ہو گئی ہے ، ( قصہ دراصل یوں تھا کہ ) رسول اللہ ﷺ ایک یہودن کے پاس سے گزرے جس ( کی موت ) پر اس کے گھر والے رو رہے تھے تو رسول اللہ ﷺ نے فرمایا :’’ یقیناً یہ لوگ تو اس پر رو رہے ہیں اور اسے اپنی قبر میں عذاب دیا جا رہا ہے ۔‘‘