اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے ( حبشہ کے مسلمان ہو جانے والے بادشاہ ) نجاشی رحمہ اللہ کی اطلاع ( بذریعہ وحی ) اسی دن دے دی تھی جس میں وہ فوت ہوئے تھے ، اور آپ ﷺ صحابہ کو لے کر عیدگاہ کی طرف گئے ، پھر ان کی صف بندی کی اور ( نماز جنازہ میں ) چار تکبیرات کہیں ۔

اردو ترجمہ · Urdu

حضرت ابوامامہ بن سہل بن حنیف رضی اللہ عنہما سے روایت ہے کہ ایک مسکین عورت بیمار ہو گئی ، رسول اللہ ﷺ کو اس کی بیماری کی اطلاع دی گئی ، ابوامامہ رضی اللہ عنہ کہتے ہیں کہ رسول اللہ ﷺ مسکینوں کی تیمارداری فرمایا کرتے تھے اور ان کے متعلق پوچھتے رہتے تھے ، چنانچہ رسول اللہ ﷺ نے ( صحابہ رضی اللہ عنہم سے ) فرمایا :’’ جب یہ فوت ہو جائے تو مجھے اطلاع دے دینا ‘‘ ، ( وہ عورت فوت ہو گئی ) پھر رات کے وقت اس کا جنازہ نکالا گیا ، صحابہ رضی اللہ عنہم نے رسول اللہ ﷺ کو جگانا مناسب نہ سمجھا ، پھر جب رسول اللہ ﷺ نے صبح کی تو آپ کو اس عورت کے ساتھ پیش آنے والے معاملے کی خبر دی گئی ، تو آپ نے فرمایا :’’ کیا میں نے تمھیں حکم نہ دیا تھا کہ مجھے اس کی اطلاع دے دینا ؟‘‘ انھوں نے عرض کیا کہ اے اللہ کے رسول ! ہم نے ناپسند جانا کہ رات کے وقت آپ کو گھر سے نکالیں اور آپ کو بیدار ( کر کے آپ کی نیند میں خلل واقع ) کریں ، چنانچہ رسول اللہ ﷺ باہر تشریف لے گئے یہاں تک کہ اس کی قبر پر ( جا کر اس کے پاس قبلہ رخ ہو کر ) لوگوں کی صف بندی کی اور ( اس کا جنازہ ادا کرتے ہوئے ) آپ ﷺ نے چار تکبیرات کہیں ۔

اردو ترجمہ · Urdu

امام مالک رحمہ اللہ نے ابن شہاب رحمہ اللہ سے اس شخص کے متعلق سوال کیا جو نماز جنازہ کی بعض تکبیروں کو پا لیتا ہے اور بعض اس سے رہ جاتی ہیں تو انھوں نے جواب دیا کہ جو تکبیریں اس سے رہ جائیں وہ انھیں بعد میں پورا کرے ۔