اردو ترجمہ · Urdu

سیدہ عائشہ رضی اللہ عنہا زوجہ پیغمبر ﷺ سے روایت ہے کہ بے شک رسول اللہ ﷺ کو ( یمن کی ) سُحُول بستی کے بنے ہوئے تین سفید کپڑوں میں کفن دیا گیا جن میں نہ کوئی ( سلی ہوئی ) قمیص تھی اور نہ کوئی پگڑی ۔

اردو ترجمہ · Urdu

یحیی بن سعید رحمہ اللہ سے روایت ہے کہ رسول اللہ ﷺ کو سحول بستی کے تیار شدہ تین سفید کپڑوں میں دفن کیا گیا ۔

اردو ترجمہ · Urdu

یحیی بن سعید رحمہ اللہ سے روایت ہے ، ان کو یہ خبر پہنچی کہ حضرت ابوبکر صدیق رضی اللہ عنہ نے سیدہ عائشہ رضی اللہ عنہا سے پوچھا ، جس وقت کہ وہ ( مرضُ الموت میں مبتلا اور ) بیمار تھے ، ( پوچھا کہ ) کتنے کپڑوں میں رسول اللہ ﷺ کو کفن دیا گیا تھا ، تو سیدہ عائشہ رضی اللہ عنہا نے کہا کہ سحول بستی کے بنے ہوئے تین سفید کپڑوں میں ، پھر حضرت ابوبکر صدیق رضی اللہ عنہ نے اس کپڑے کے متعلق جو ان کے اوپر تھا ، فرمایا کہ اس کپڑے کو لے لو ، اسے گیرو یا زعفران لگا ہوا ہے ، اسے دھو ڈالنا ، پھر مجھے دو اور کپڑوں سمیت اس میں کفنا دینا ، سیدہ عائشہ رضی اللہ عنہا کہنے لگیں کہ یہ کیا بات ہوئی ( کیا نئے کپڑے ختم ہو گئے ہیں ) ؟ تو حضرت ابوبکر رضی اللہ عنہ فرمانے لگے کہ مردے کی نسبت زندہ شخص نئے کپڑوں کا زیادہ محتاج ہوتا ہے ، یہ کفن تو صرف اور صرف پیپ اور خون ( وغیرہ ) کے لیے ہے ۔

اردو ترجمہ · Urdu

حضرت عبداللہ بن عمرو بن عاص رضی اللہ عنہما سے روایت ہے ، انھوں نے فرمایا : میت کو قمیص پہنائی جائے اور ازار بھی پہنایا جائے اور ایک تیسرے کپڑے میں اسے لپیٹ دیا جائے ( جسے لفافہ کہتے ہیں ) اور اگر ایک کپڑے کے سوا کچھ بھی نہ ہو تو اسی میں اس کی تکفین کی جائے ۔