اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ یقیناً ہر پیغمبر ( علیہ السلام ) کے لیے ایک ( خصوصی ) دعا ( مقرر ) تھی جو وہ مانگ لیتا تھا ، ( لیکن ) میں نے یہ ارادہ کیا ہے کہ میں اپنی یہ دعا آخرت میں اپنی امت کی شفاعت کے لیے ( دنیا میں ) چھپائے رکھوں ۔‘‘

اردو ترجمہ · Urdu

یحیی بن سعید رحمہ اللہ کو یہ خبر پہنچی کہ رسول اللہ ﷺ یہ دعا مانگا کرتے تھے :’’ اے اللہ ! اے صبح کو پیدا کرنے والے ! اے رات کو سکون ( اور راحت کا سبب ) بنانے والے ! اے سورج اور چاند کو حساب سے چلانے والے ! میری طرف سے قرض کی ادائیگی فرما ، مجھے فقیری سے ( نکال کر ) غنی ( اور بے نیاز ) فرما ، اور مجھے میری سماعت ، میری بصارت اور میری قوت کے ساتھ اپنی راہ میں ( انھیں استعمال کرا کے ) فائدہ عطا فرما ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ جب تم میں سے کوئی شخص دعا مانگے تو یہ نہ کہا کرے کہ اے اللہ ! اگر تو چاہے تو مجھے بخش دے ، اے اللہ اگر تو چاہے تو مجھ پر رحم فرما ، ( بلکہ ) اُسے چاہیے کہ پختگی سے سوال ( اور دعا ) کرے کیونکہ یقیناً اللہ کو کوئی بھی مجبور کرنے والا نہیں ہے ۔‘‘

اردو ترجمہ · Urdu

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ تم میں سے کسی کی بھی ( ہر جائز ) دعا قبول کی جاتی رہتی ہے جب تک کہ جلد بازی سے کام نہ لے ، ( کہ ) یہ کہنے لگے کہ میں نے یہ دعا تو کی ہے لیکن وہ میرے حق میں قبول نہیں ہوئی ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ ہمارا رب تعالیٰ ہر رات آسمان دنیا پر نزول فرماتا ہے جس وقت کہ رات کا آخری تہائی حصہ باقی رہ جاتا ہے ، پھر وہ کہتا ہے : کون ہے جو مجھ سے دعا کرے تو میں اس کی دعا قبول کروں ؟ اور کون ہے جو مجھ سے مانگے تو میں اُسے عطا کروں ؟ اور کون ہے جو مجھ سے استغفار کرے تو میں اس کو بخش دوں ۔

اردو ترجمہ · Urdu

اُم المومنین سیدہ عائشہ رضی اللہ عنہا روایت کرتی ہیں کہ میں رسول اللہ ﷺ کے پہلو میں سوئی ہوئی تھی ، رات کے کسی حصے میں مَیں نے آپ ﷺ کو گم پایا ( تو میں اپنے ہاتھ سے آپ ﷺ کو دھونڈنے لگی ) تو میں نے آپ کو اپنے ہاتھ سے چھو لیا ، چنانچہ میرا ہاتھ آپ کے پاؤں ( کے اندرونی حصے ) پر پڑا ، اس حال میں کہ آپ سجدے میں ( یہ دعائیہ کلمات ) کہہ رہے تھے :’’ ( اے اللہ ! ) میں تیری رضا مندی کے ساتھ تیری ناراضی سے پناہ مانگتا ہوں ، تیری سزا سے ( بچنے کے لیے ) تیری معافی کی پناہ میں آتا ہوں ، اور میں تجھ سے ( یعنی تیری پکڑ اور عذاب سے بچنے کے لیے ) تیری پناہ میں آتا ہوں ، میں تیری تعریف کا ( مکمل ) احاطہ نہیں کر سکتا ( اور اس کی حق ادائیگی نہیں کر سکتا ) ، توُ تو اسی طرح ہی ہے جس طرح تو نے ( خود ) اپنی تعریف فرمائی ہے ۔‘‘

اردو ترجمہ · Urdu

طلحہ بن عبید اللہ بن کریز رحمہ اللہ سے روایت ہے کہ رسول اللہ ﷺ نے فرمایا :’’ سب سے افضل دعا عَرَفہ کے دن ( 9 ذوالحج ) کی دعا ہے ، اور میں نے اور مجھ سے پہلے انبیائے کرام علیہم السلام نے جو سب سے افضل کلمات کہے ہیں وہ یہ ہیں : اللہ کے سوا کوئی معبود برحق نہیں ، وہ یکتا ہے ، اس کا کوئی شریک نہیں ۔‘‘

اردو ترجمہ · Urdu

حضرت عبداللہ بن عباس رضی اللہ عنہ سے روایت ہے کہ رسول اللہ ﷺ اُن ( صحابہ کرام رضی اللہ عنہ ) کو یہ دعا اس طرح ( اہمیت دے کر ) سکھاتے جس طرح اُنھیں قرآن کی ( کوئی ) سورت سکھاتے تھے ، آپ ﷺ فرماتے :’’ اَللّٰھُمَّ اِنِّیْ اَعُوْذُبِکَ مِنْ عَذَابِ جَھَنَّمَ وَ اَعُوْذُبِکَ مِنْ عَذَابِ الْقَبْرِ وَ اَعُوْذُبِکَ مِنْ فِتْنَۃِ الْمَسِیْحِ الدَّجَّالِ وَ اَعُوْذُبِکَ مِنْ فِتْنَۃِ الْمَحْیَا وَالْمَمَاتِ ‘‘ ’’ اے اللہ ! بے شک میں جہنم کے عذاب سے تیری پناہ مانگتا ہوں ، اور میں عذابِ قبر سے تیری پناہ پکڑتا ہوں اور میں مسیح دجّال کے فتنے سے تیری پناہ میں آتا ہوں اور میں زندگی و موت کے فتنے سے تیری پناہ چاہتا ہوں ۔‘‘

اردو ترجمہ · Urdu

حضرت عبداللہ بن عباس رضی اللہ عنہ سے روایت ہے کہ رسول اللہ ﷺ جب رات کے درمیان میں ( تہجد کی ) نماز کے لیے کھڑے ہوتے تو ( تکبیر تحریمہ کے بعد اور سورۂ فاتحہ سے پہلے ) یہ ( دعا ) پڑھتے :’’ اے اللہ ! تیرے ہی لیے سب حمد ہے ، ( کیونکہ ) تو آسمانوں اور زمین کا نُور ( اور انھیں منوّر فرمانے والا ) ہے ، اور تیرے ہی لیے سب حمد ہے ( کیونکہ ) تو آسمانوں اور زمین کو خوب قائم رکھنے والا ہے ، اور تیرے ہی لیے حمد ہے ، ( کیونکہ ) تو آسمانوں اور زمین کا اور جو کوئی بھی ان میں ( رہتے ) ہیں ، اُن سب کا ( تو ہی ) ربّ ہے ، تو برحق ہے ، تیرا ( ہر ایک ) قول برحق ہے ، تیرا ( دیا ہوا ہر ) وعدہ برحق ہے ، تجھ سے ( ہماری ) ملاقات برحق ہے ، جنت برحق ہے ، جہنم برحق ہے ، اور قیامت ( بھی ) برحق ہے ، ( یہ سب غیبی امور مبنی بر حقیقت ہیں اور کچھ یقیناً موجود ہیں اور کچھ آ کر رہیں گے ۔ ) اے اللہ ! تیرے ہی لیے میں مطیع ہوا ، تیرے ساتھ ہی میں ایمان لایا ، تجھ ہی پر میں نے توکل کیا ، تیری ہی طرف میں نے رجوع کیا ، تیرے ہی ساتھ ( اور تیری تائید و نصرت اور توفیق کے ساتھ ) میں نے ( تیرے دشمنوں سے ) جھگڑا کیا اور تیری ہی طرف میں فیصلہ لے کر آیا ، لہٰذا تو میرے لیے اُن تمام گناہوں کی مغفرت فرما جو میں نے پہلے کیے اور جو بعد میں کیے اور جو چھپ کر کیے اور جو علانیہ کیے ، تو ہی میرا معبود ہے ، تیرے سوا کوئی سچا معبود نہیں ہے ۔‘‘

اردو ترجمہ · Urdu

عبداللہ بن عبداللہ بن جابر بن عتیک رحمہ اللہ روایت کرتے ہیں کہ حضرت عبداللہ بن عمر رضی اللہ عنہ ہمارے پاس ( ہماری بستی ) ’’ بنی معاویہ ‘‘ میں تشریف لائے ، یہ انصار ( مدینہ ) کی بستیوں میں سے ایک بستی ( کا نام ) ہے ، حضرت عبداللہ بن عمر رضی اللہ عنہ نے پوچھا : کیا تم جانتے ہو کہ رسول اللہ ﷺ نے تمھاری اس مسجد میں کس جگہ نماز ادا فرمائی تھی ؟ میں نے اُن سے کہا کہ جی ہاں اور میں نے مسجد کی ایک جانب ان کے لیے اشارہ کیا ، پھر انھوں نے مجھ سے پوچھا کہ کیا تمھیں ان تین باتوں کا علم ہے جن کی دعا رسول اللہ ﷺ نے اس جگہ مانگی تھی کہ اللہ تعالیٰ اُن ( اُمتِ محمدیہ والوں ) پر ان کے علاوہ ( اقوام میں ) سے کسی دشمن کو غالب ( اور مسلط ) نہ کرے ، اور ان کو قحط سالی کے ساتھ ہلاک نہ کرے ، چنانچہ آپ ﷺ کو یہ دونوں ( دعائیں قبولیت کے ساتھ ) دے دی گئیں اور ( پھر تیسری ) یہ دعا مانگی کہ اللہ تعالیٰ اُن ( مسلمانوں ) کی آپس میں لڑائی نہ ہونے دے لیکن اس ( دعا ) کو آپ ﷺ سے روک لیا گیا … حضرت ابن عمر رضی اللہ عنہ نے فرمایا کہ تو نے سچ کہا ، ( پھر ) حضرت عبداللہ بن عمر رضی اللہ عنہ فرمانے لگے کہ قیامت کے دن تک ( مسلمانوں کی باہمی ) قتل و غارت مسلسل جاری رہے گی ۔

اردو ترجمہ · Urdu

زید بن اسلم رحمہ اللہ سے روایت ہے ، وہ کہا کرتے تھے کہ جو کوئی شخص بھی دعا کرتا ہے تو وہ ضرور تین نتائج میں سے کسی نہ کسی کے درمیان میں ہوتا ہے ، یا تو اس کی وہی دعا قبول ہو ( کر ہو بہو ظاہر ہو ) جاتی ہے ، یا پھر اس کے حق میں ( آخرت کے لیے ) ذخیرہ کر دی جاتی ہے اور یا پھر اس ( کے گناہوں ) کا کفارہ بنا دی جاتی ہے ۔