اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ جو شخص دن میں سو مرتبہ یہ پڑھے ( لَا اِلٰہَ اِلَّا اللّٰہُ وَحْدَہٗ لَا شَرِیْکَ لَہٗ ، لَہٗ الْمُلْکُ وَ لَہٗ الْحَمْدُ وَھُوَ عَلیٰ کُلِّ شَیْئٍ قَدِیْرٌ ) ’’ اللہ کے سوا کوئی معبود برحق نہیں ، وہ یکتا ہے ، اس کا کوئی شریک نہیں ، اسی کے لیے بادشاہت ہے اور اسی کے لیے سب حمد ہے اور وہ ہر چیز پر خوب قادر ہے ۔‘‘ ( جو شخص دن میں اسے سو بار پڑھے گا ) تو یہ ( عمل ) اس کے حق میں دس گردنوں ( یعنی غلام لونڈیاں آزاد کرنے کے اجر ) کے برابر ہو گا ، اس کے لیے سو نیکیاں لکھ دی جائیں گی ، اس سے سو گناہ مٹا دیے جائیں گے اور شام تک سارا دن یہ ( کلمات ) اس کے لیے شیطان سے بچاؤ ( اور حفاظت کا ذریعہ ) بنے رہیں گے اور ( اس دن ) یہ آدمی جو عمل ( اللہ کے حضور پیش کرنے کے لیے ) لائے گا ، کوئی اور شخص اس سے افضل عمل نہ لا سکے گا ، سوائے اس کے جس نے اس سے بھی بڑھ کر ( یہ وظیفہ پڑھنے کا ) عمل کیا ہو گا ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ جس شخص نے دن میں سو بار ( سُبْحَانَ اللّٰہِ وَ بِحَمْدِہٖ ) پڑھا اس کے سارے گناہوں کو اس سے مٹا دیا جائے گا ، اگرچہ وہ سمندر کی جھاگ کے برابر ہوں ۔‘‘

اردو ترجمہ · Urdu

حضرت ابوہریرہ رضی اللہ عنہ کہتے ہیں کہ جس شخص نے ہر نماز کے بعد 33 بار سُبْحَانَ اللّٰہ ، 33 دفعہ اَللّٰہُ اَکْبَرُ اور 33 مرتبہ اَلْحَمْدُ لِلّٰہِ کہا ( ، یہ تعداد ننانوے ہو گئی ) اور پھر اس نے سو کا اختتام (( لَا اِلٰہَ اِلَّا اللّٰہُ وَحْدَہٗ لَاشَرِیْکَ لَہٗ لَہُ الْمُلْکُ وَلَہُ الْحَمْدُ وَھُوَ عَلیٰ کُلِّ شَیْئٍ قَدِیْرٌ )) کے ساتھ کیا تو اس کے سارے گناہ معاف کر دیے جائیں گے خواہ وہ سمندر کی جھاگ کی مثل ہوں ۔

اردو ترجمہ · Urdu

عمارہ بن صیاد رحمہ اللہ سے روایت ہے کہ انھوں نے سعید بن مسیب کو ( اَلْبَاقِیَاتُ الصَّالِحَاتُ ) ( کی تفسیر ) کے بارے کہتے ہوئے سنا کہ ان سے مراد بندے کا یہ ( کلمات ) کہنا ہے : ( اَللّٰہ اَکْبَرُ وَ سُبْحَانَ اللّٰہِ وَالْحَمْدُ لِلّٰہِ وَ لَا اِلٰہَ اِلَّا اللّٰہُ وَ لَا حَوْلَ وَ لَا قُوَّۃَ اِلَّا بِاللّٰہِ ) ۔

اردو ترجمہ · Urdu

حضرت ابودرداء رضی اللہ عنہ سے روایت ہے ، انھوں نے کہا کہ کیا میں تمھیں اس کام کی خبر نہ دوں جو تمھارے اعمال میں تمھارے لیے سب سے بہتر ہے ، تمھارے درجات میں بلندی کا سب سے زیادہ باعث بننے والا عمل ہے ، تمھارے مالک کے ہاں سب سے پاکیزہ عمل ہے ، تمھارے لیے سونا چاندی ( رب کی راہ میں ) دینے سے بھی بہتر ہے اور تمھارے حق میں اس سے بھی بہتر ہے کہ تم اپنے دشمن سے ( میدانِ جنگ میں ) ملو تو تم ان کی گردنیں مارو اور وہ تمھاری گردنیں ماریں ؟ لوگوں نے عرض کیا کہ کیوں نہیں ( ضرور بتائیے ) تو انھوں نے کہا کہ وہ عمل اللہ تعالیٰ کا ذکر ہے … ( اس حدیث کے راوی ) زیاد بن ابی زیاد رحمہ اللہ کہتے ہیں کہ حضرت ابوعبدالرحمن معاذ بن جبل رضی اللہ عنہ نے فرمایا کہ آدم کے بیٹے نے ذکر الٰہی سے بڑھ کر کوئی اور ایسا عمل نہیں کیا جو اسے عذاب الٰہی سے ( سب سے ) زیادہ نجات دینے والا ہو ۔

اردو ترجمہ · Urdu

حضرت رفاعہ بن رافع رضی اللہ عنہ روایت کرتے ہیں کہ ہم ایک دن رسول اللہ ﷺ کے پیچھے نماز پڑھ رہے تھے ۔ جب رسول اللہ ﷺ نے رکوع سے اپنا سر مبارک اٹھا کر ( سَمِعَ اللّٰہُ لِمَنْ حَمِدَہٗ ) کہا تو ایک شخص نے آپ ﷺ کے پیچھے ( ذرا بلند آواز میں ) یہ پڑھا : ( رَبَّنَا وَلَکَ الْحَمْدُ حَمْدًا کَثِیْرًا طَیِّبًا مُّبَارَکًا فِیْہِ ) ’’ اے ہمارے رب ! تیرے ہی لیے سب حمد ہے ، ایسی حمد جو بہت زیادہ بہت پاکیزہ ، بہت بابرکت ہے ۔‘‘ پھر جب رسول اللہ ﷺ نماز سے فارغ ہوئے تو دریافت فرمایا : ’’ ابھی ابھی بولنے والا کون تھا ؟‘‘ ایک آدمی کہنے لگا کہ میں ( تھا ) ، اے اللہ کے رسول ! تو رسول اللہ ﷺ نے فرمایا :’’ یقیناً میں نے تیس سے کچھ زائد فرشتوں کو دیکھا کہ وہ ان کلمات کی طرف جلدی ( اور ایک دوسرے سے سبقت ) کر رہے تھے کہ ان میں سے کون یہ کلمات سب سے پہلے لکھتا ( اور انھیں درج کرنے کا شرف پاتا ) ہے ۔‘‘