اردو ترجمہ · Urdu

حضرت ابوسعید خدری رضی اللہ عنہ روایت کرتے ہیں کہ انھوں نے ایک شخص کو سنا ، وہ ( رات کے وقت ) سورۂ { قُلْ ہُوَاللّٰہُ اَحَدٌ } کو بار بار پڑھے جا رہا تھا ، چنانچہ جب انھوں نے ( حضرت ابوسعید خدری رضی اللہ عنہ ) نے صبح کی تو رسول اللہ ﷺ کے پاس آئے اور آپ کے سامنے اس کا تذکرہ کیا ، گویا کہ آدمی ( حضرت ابوسعید رضی اللہ عنہ اپنے آپ کو مراد لے رہے ہیں ) اس سورت کو ( اپنی دانست میں ) بہت کم ( اور چھوٹا عمل ) سمجھ رہا تھا ، تو رسول اللہ ﷺ نے فرمایا :’’ قسم اس ذات کی جس کے ہاتھ میں میری جان ہے ! یقیناً یہ سورت تہائی قرآن کے برابر ہے ۔‘‘

اردو ترجمہ · Urdu

حضرت ابوہریرہ رضی اللہ عنہ روایت کرتے ہیں کہ میں رسول اللہ ﷺ کے ہمراہ ( کہیں سے ) آیا ، آپ ﷺ نے ایک شخص کو { قُلْ ہُوَاللّٰہُ اَحَدٌ } پڑھتے ہوئے سنا تو فرمایا :’’ واجب ہو گئی ۔‘‘ میں نے آپ ﷺ سے عرض کیا کہ اے اللہ کے رسول ! کیا ( چیز واجب ہو گئی ) ؟ فرمایا :’’ جنت ۔‘‘ حضرت ابوہریرہ رضی اللہ عنہ کہتے ہیں : میں نے چاہا کہ اس شخص کے پاس جاؤں اور اسے ( یہ ) خوشخبری سنا دوں ( لیکن ) پھر میں ڈر گیا کہ کہیں رسول اللہ ﷺ کی معیت ( اور صحبت ) میں صبح کا کھانا مجھ سے ( نہ ) رہ جائے ، چنانچہ میں نے ( اس با برکت ) کھانے کو ترجیح دی ، پھر میں اس شخص کی طرف گیا تو دیکھا کہ وہ تو جا چکا ہے ۔

اردو ترجمہ · Urdu

ابن شہاب رحمہ اللہ سے روایت ہے ، انھیں حمید بن عبدالرحمن بن عوف نے خبر دی کہ سورۂ { قُلْ ہُوَاللّٰہُ اَحَدٌ } تہائی قرآن کے برابر ہے اور سورہ { تَبٰرَکَ الَّذِیْ بِیَدِہِ الْمُلْکُ } اپنے پڑھنے والے کی طرف سے بحث کرے گی ۔