اردو ترجمہ · Urdu

عبدالرحمن بن عبد ، قاری رحمہ اللہ روایت کرتے ہیں کہ میں نے حضرت عمر بن خطاب رضی اللہ عنہ کو یہ فرماتے ہوئے سنا کہ میں نے حضرت ہشام بن حکیم بن حزام رضی اللہ عنہما کو سورۂ فرقان کی تلاوت اس انداز کے علاوہ کرتے ہوئے سنا کہ جس انداز ( اور قراءت ) کے ساتھ میں اسے پڑھتا تھا اور رسول اللہ ﷺ نے خود مجھے یہ سورت پڑھائی تھی ، ( اب چونکہ حضرت ہشام رضی اللہ عنہ کی قراءت میری قراءت سے الگ تھی تو میں نے سمجھا کہ وہ قرآن غلط پڑھ رہے ہیں ، ) سو قریب تھا کہ میں ان پر ( ان کی حالت نماز ہی میں ) جلد بازی کرتا ( اور ان پر غصہ نکالتا لیکن ) پھر میں نے ان کو مہلت دی ، یہاں تک کہ وہ نماز سے فارغ ہو گئے ، پھر میں نے انھی کی چادر ان کے گلے میں ڈال کر ( ان کو غصے سے پکڑ لیا اور ) ان کو رسول اللہ ﷺ کی خدمت میں لے آیا اور عرض کیا کہ اے اللہ کے رسول ! بے شک میں نے اسے سنا ، یہ سورۂ فرقان کو اس قراءت سے ہٹ کر پڑھ رہا تھا جو آپ نے مجھے اس کی قراءت پڑھائی ، تو رسول اللہ ﷺ نے فرمایا :’’ اس کو چھوڑ دو ۔ ‘‘ پھر آپ نے فرمایا :’’ اے ہشام پڑھو : تو اس نے وہی قراءت پڑھی جو میں نے اسے پڑھتے ہوئے سنی تھی ۔‘‘ آپ نے فرمایا :’’ اسی طرح ہی یہ سورت نازل ہوئی ہے ۔‘‘ پھر مجھ سے فرمایا :’’ تم پڑھو ۔‘‘ تو میں نے اسے ( اپنی قراءت میں ) پڑھا ، تو آپ ﷺ نے ( اس کے متعلق بھی ) فرمایا :’’ اسی طرح ہی یہ سورت نازل ہوئی ہے ۔ یقیناً یہ قرآن سات حرفوں ( یعنی سات قراءتوں ) پر نازل ہوا ہے ، لہٰذا اس میں سے جو آسان ہو اسے پڑھ لیا کرو ۔‘‘

اردو ترجمہ · Urdu

حضرت عبداللہ بن عمر رضی اللہ عنہما سے روایت ہے کہ رسول اللہ ﷺ نے فرمایا :’’ یقیناً حافظ قرآن کی مثال تو صرف اور صرف باندھے ہوئے اونٹوں والے شخص کی سی ہے ، اگر وہ ان کا خیال رکھے گا ( اور ان کا ایک ایک گھٹنا باندھ دے گا ) تو ان کو ( اپنے پاس ) روک لے گا اور اگر ان ( گھٹنوں ) کو کھول دے گا تو وہ ( موقع پا کر اس کی دسترس سے نکل کر ) چلے جائیں گے ۔‘‘

اردو ترجمہ · Urdu

سیدہ عائشہ رضی اللہ عنہا زوجہ رسول ﷺ سے روایت ہے کہ حضرت حارث بن ہشام رضی اللہ عنہ نے نبی کریم ﷺ سے عرض کیا کہ آپ پر وحی کیسے آتی ہے ؟ تو رسول اللہ ﷺ نے فرمایا :’’ کبھی کبھار تو وہ گھنٹی کی آواز کی شکل میں آتی ہے اور وہ مجھ پر سب سے زیادہ سخت ( کیفیت والی ) ہوتی ہے ، جب وہ مجھ سے جدا ہوتی ہے تو میں وہ ( سب کچھ ) یاد کر چکا ہوتا ہوں جو اس ( فرشتہ جبریل ) نے کہا ہوتا ہے ، اور کبھی کبھار فرشتہ میرے لیے کسی آدمی کی شکل اختیار کر لیتا ہے ، پھر وہ مجھ سے گفتگو کرتا ہے تو وہ جو کچھ بھی کہتا ہے میں اسے یاد کر لیتا ہوں ۔‘‘ سیدہ عائشہ کہتی ہیں کہ یقیناً میں نے آپ ﷺ کو دیکھا ، آپ پر سخت سردی والے دن میں وحی نازل ہوتی ، پھر وہ آپ ﷺ سے اس حال میں جدا ہوتی کہ بلاشبہ آپ کی پیشانی مبارک پسینے سے بہہ رہی ہوتی تھی ۔

اردو ترجمہ · Urdu

ہشام بن عروہ رحمہ اللہ اپنے والد سے روایت کرتے ہیں کہ سورۂ { عَبَسَ وَتَوَلّٰی } حضرت عبداللہ بن ام مکتوم رضی اللہ عنہ کے متعلق نازل ہوئی ، وہ رسول اللہ ﷺ کی خدمت عالیہ میں آئے اور عرض کرنے لگے کہ اے محمد ( ﷺ ) ! مجھے اپنے قریب کوئی جگہ بتا دیجیے ( تاکہ میں آپ کے پاس بیٹھ سکوں ) ، اس وقت نبی کریم ﷺ کے پاس مشرکین ( قریش ) کے بڑوں میں سے کوئی شخص ( بیٹھا ہوا ) تھا ، تو رسول اللہ ﷺ اس ( عبداللہ رضی اللہ عنہ ) سے اعراض فرما کر دوسرے شخص کی طرف توجہ کرنے لگے اور اس سے پوچھنے لگے کہ ’’ اے فلاں ! میں جو کچھ کہہ رہا ہوں کیا تو اس میں کوئی حرج محسوس کرتا ہے ؟ وہ کہنے لگا کہ نہیں نہیں ، خونوں کی قسم ! میں آپ کی بات میں کوئی حرج نہیں دیکھتا ، تو ( اس اعراضِ پیغمبر ﷺ کی بنا پر ) سورۂ عبس نازل ہوئی ۔

اردو ترجمہ · Urdu

زید بن اسلم رحمہ اللہ اپنے والد سے روایت کرتے ہیں کہ رسول اللہ ﷺ اپنے کسی سفر میں چلے جا رہے تھے ، رات کے وقت حضرت عمر بن خطاب رضی اللہ عنہ بھی آپ کے ہمراہ چل رہے تھے ، حضرت عمر رضی اللہ عنہ نے آپ سے کسی چیز کے متعلق سوال کیا تو رسول اللہ ﷺ نے جواب نہ دیا ، انھوں نے پھر پوچھا تو آپ ﷺ نے جواب نہ دیا ، انھوں نے پھر ( تیسری بار ) پوچھا تو آپ ﷺ نے اب بھی ان کو جواب نہ دیا ، حضرت عمر رضی اللہ عنہ ( تو پریشان ہو گئے اور اپنے آپ سے ) کہنے لگے : عمر ! تجھے تیری ماں گم پائے ( یعنی کاش ! تو مر گیا ہوتا اور یہ نوبت نہ آتی ) تو نے رسول اللہ ﷺ سے تین بار مبالغہ و اصرار سے سوال کیا ( لیکن ) آپ ﷺ نے کسی باری میں تجھے جواب نہیں دیا ، حضرت عمر رضی اللہ عنہ کہتے ہیں کہ میں نے ( پریشانی کے عالم میں ) اپنے اونٹ کو حرکت دی یہاں تک کہ میں سب لوگوں سے آگے ہو گیا ، ( یہ سمجھ کر شاید آقا علیہ السلام مجھ پر ناراض ہیں اور مجھے اپنے قریب نہیں دیکھنا چاہتے ) اور میں ڈر رہا تھا کہ کہیں میرے بارے میں قرآن ( نہ ) نازل ہو جائے ، پھر ( واقعی ایسا ہی محسوس ہوا کیونکہ ) میں ( زیادہ دیر ) نہ ٹھہرا تھا کہ میں نے ایک زور سے پکارنے والے کو سنا جو مجھے آواز دے رہا تھا ، حضرت عمر رضی اللہ عنہ کہتے ہیں کہ میں نے ( دل میں ) کہا کہ یقیناً مجھے اسی بات کا خطرہ ہے کہ میرے متعلق کچھ قرآن نازل ہوا ہو گا ، وہ کہتے ہیں کہ میں رسول اللہ ﷺ کے پاس آیا اور آپ کو سلام عرض کیا تو ( آپ نے ) فرمایا :’’ یقیناً آج رات مجھ پر ایک ایسی سورت نازل کی گئی ہے جو مجھے ہر اس چیز سے زیادہ محبوب ہے جس پر سورج طلوع ہوتا ہے ۔‘‘ پھر آپ ﷺ نے ( سورۂ فتح کی طرف اشارہ کرتے ہوئے اس کی پہلی آیت کی ) تلاوت فرمائی ۔ { اِنَّا فَتَحْنَا لَکَ فَتْحًا مُّبِیْنًا } ’’ یقیناً ہم نے آپ کو واضح فتح عطا فرمائی ہے ۔‘‘

اردو ترجمہ · Urdu

حضرت ابوسعید خدری رضی اللہ عنہ روایت کرتے ہیں کہ میں نے رسول اللہ ﷺ کو یہ فرماتے ہوئے سنا :’’ تم میں ( خوارج کی ایک ) قوم نکلے گی ، تم اپنی نماز کو ان کی نماز کے مقابلے میں ، اپنے روزوں کو ان کے روزوں کے مقابلے میں اور تم اپنے اعمال کو ان کے اعمال کے مقابلے میں حقیر سمجھو گے ( ظاہر میں وہ بہت زیادہ عبادت گزار اور متقی محسوس ہوں گے ) ، وہ قرآن پڑھیں گے لیکن وہ ( صرف ان کے مونہوں اور زبانوں تک محدود ہو گا اور ) ان کے حلقوں سے ( پار ہو کر نیچے سینے اور دل تک ) تجاوز نہیں کرے گا ، وہ دین سے اس طرح پار گزر جائیں گے جس طرح ( تیز رفتار ) تیر شکار ( ہدف ) سے پار گزر جاتا ہے ( اور اتنی تیزی سے گزرتا ہے کہ شکار ہونے والے جانور کے جسم سے گزرنے کے باوجود بالکل صاف ہوتا ہے اور اس کی تیزی کی وجہ سے گوشت اور خون کو اس پر لگنے کا موقع ہی نہیں ملتا ۔ ) تم ( تیر کے ) پھل ( یعنی نوکدارانی اور پیکان ) کو دیکھو تو ( وہاں ) کوئی چیز ( لگی ہوئی ) نہ دیکھو گے ، تم ( اس کی ) لکڑی کو دیکھو تو ( وہاں بھی ) کچھ نہ دیکھو گے ، تم ( اس کے ) پر میں دیکھو تو کچھ بھی نہ دیکھ پاؤ گے ، اور البتہ ( تیر کے ) سوفار ( یعنی وہ حصہ جہاں کمان کی تانت اور تندی ٹکتی ہے اور چھوٹا سا گڑھا ہوتا ہے تو اس ) میں تم شک کرو گے ( کہ شاید یہاں خون کے کچھ اثرات پہنچے ہیں ) ۔‘‘

اردو ترجمہ · Urdu

امام مالک رحمہ اللہ کو یہ خبر پہنچی کہ حضرت عبداللہ بن عمر رضی اللہ عنہما سورۂ بقرہ پر آٹھ سال ٹھہرے رہے ( اور ) اسے سیکھتے رہے ۔