اردو ترجمہ · Urdu

حضرت زید بن خالد جہنی رضی اللہ عنہ روایت کرتے ہیں کہ رسول اللہ ﷺ نے حدیبیہ کے مقام پر رات کو ہونے والی بارش کے بعد فجر کی نماز پڑھائی ، پھر جب آپ ﷺ فارغ ہوئے تو لوگوں کی طرف ( رخ پھیر کر ) متوجہ ہوئے اور فرمایا :’’ کیا تم جانتے ہو کہ تمھارے رب نے کیا کہا ہے ؟‘‘ صحابہ کرام رضی اللہ عنہ نے عرض کیا کہ اللہ اور اس کا رسول ہی بہتر جانتے ہیں ، تو آپ ﷺ نے فرمایا :’’ اللہ نے کہا ہے کہ ( آج ) میرے کچھ بندے میرے ساتھ ایمان لانے والے بن گئے اور کچھ کافر ہو گئے ، سو جس نے تو یہ کہا کہ ہمیں اللہ کے فضل اور رحمت سے بارش عطا کی گئی ، تو یہ میرے ساتھ ایمان رکھنے والا اور ستارے ( کی تاثیر ) کا انکار و کفر کرنے والا شخص ہے اور رہا وہ شخص جس نے یہ کہا کہ ہمیں فلاں فلاں تارے ( اور نچھتر کی گردش ) سے بارش ملی ہے تو یہ شخص میرے ساتھ کفر کرنے والا ، تارے کے ساتھ ایمان لانے والا ہے ۔

اردو ترجمہ · Urdu

امام مالک رحمہ اللہ کو یہ خبر پہنچی کہ رسول اللہ ﷺ فرمایا کرتے تھے :’’ جب بحریہ یعنی سمندر کی طرف سے بادل اٹھے ( جو کہ مدینہ منورہ کے مغرب میں ہے ) اور ملک شام کی طرف جانے لگے ( جو مدینہ کے شمال میں ہے ) تو یہ ایک وافر ( پانی والا ) چشمہ ہے ( جس سے خوب بارش برسے گی ) ۔‘‘

اردو ترجمہ · Urdu

امام مالک رحمہ اللہ کو یہ خبر پہنچی کہ جس وقت لوگوں پر بارش برسی ہوتی تو حضرت ابوہریرہ رضی اللہ عنہ جب صبح کرتے تو کہتے کہ ہمیں ’’ فتح والے تارے ‘‘ سے بارش ملی ہے ، ( اور اس فتح والے تارے کا مطلب سمجھانے کے لیے ) پھر وہ یہ آیت مبارکہ تلاوت کرتے ( جس میں ’’ فتح ‘‘ یعنی کھلنے کا تذکرہ ہے ) { مَا یَفْتَحِ اللّٰہُ لِلنَّاسِ مِنْ رَّحْمَۃٍ فَلَا مُمْسِکَ لَہَا } ( فاطر 35 : 2 ) ’’ اللہ تعالیٰ لوگوں کے لیے ( اپنی ) رحمت میں سے جو کچھ بھی کھول دے تو کوئی اسے بند کرنے والا نہیں ۔‘‘