اردو ترجمہ · Urdu

عمرو بن شعیب رحمہ اللہ سے روایت ہے کہ رسول اللہ ﷺ جب بارش کی دعا مانگتے تو فرماتے :’’ اے اللہ ! اپنے بندوں اور جانوروں کو پانی پلا اور اپنی رحمت کو ( ہم پر ) پھیلا اور اپنے مردہ شہر کو زندہ ( اور آباد ) فرما ۔‘‘

اردو ترجمہ · Urdu

حضرت انس بن مالک رضی اللہ عنہ روایت کرتے ہیں کہ ایک شخص رسول اللہ ﷺ کے پاس ( خطبہ جمعہ کے دوران ) آیا اور کہنے لگا کہ اے اللہ کے رسول ! ( بارش نہ ہونے کی وجہ سے ) چوپائے ہلاک ہو گئے ہیں اور ( سامان خرید و فروخت نہ ہونے کی وجہ سے یا خشک سالی کی وجہ سے ریت اڑ اڑ کر ) راستے بند ہو گئے ہیں ، لہٰذا اللہ سے دعا کیجئے ، چنانچہ رسول اللہ ﷺ نے ( وہیں منبر پر دوران خطبہ ) دعا فرمائی تو جمعہ ہی سے بارش ہونے لگی ، ( جو اگلے جمعہ تک مسلسل جاری رہی ) تو پھر ایک شخص رسول اللہ ﷺ کی خدمت میں حاضر ہوا اور کہنے لگا کہ اے اللہ کے رسول ! ( زیادہ پانی اور سیلاب کی وجہ سے ) گھر منہدم ہو گئے ہیں ، راستے بند ہو چکے ہیں اور جانور مر رہے ہیں ، تو رسول اللہ ﷺ نے یہ دعا فرمائی :’’ اے اللہ ! ( ان بادلوں کو لے جا ) پہاڑوں پر ، ٹیلوں پر ، وادیوں کے نشیبوں پر اور درختوں کے اگنے کی جگہوں پر ۔‘‘ حضرت انس رضی اللہ عنہ کہتے ہیں کہ ( یہ دعا ہوتے ہی ) بادل مدینہ منورہ سے کپڑے کے پھٹنے کی طرح پھٹ گیا ( اور مدینہ کے اوپر آسمان صاف ہو گیا ) ۔‘‘