اردو ترجمہ · Urdu

سیدہ عائشہ رضی اللہ عنہا زوجہ پیغمبر ﷺ روایت کرتی ہیں کہ رسول اللہ ﷺ کے عہد مبارک میں سورج گہن زدہ ہو گیا تو رسول اللہ ﷺ نے لوگوں کو ( یوں ) نماز پڑھائی کہ ( پہلی رکعت میں ) کھڑے ہوئے تو ( خوب ) لمبا قیام کیا ، پھر رکوع میں چلے گئے تو ( خوب ) لمبا رکوع کیا ، پھر کھڑے ہوئے تو لمبا قیام کیا جو پہلے قیام سے ذرا کم تھا ، پھر رکوع میں گئے تو لمبا رکوع کیا جو پہلے رکوع سے کچھ کم تھا ، پھر سر اٹھایا ( اور کھڑے ہوئے ) پھر سجدے میں چلے گئے ، پھر دوسری رکعت میں بھی اسی طرح کیا ، پھر ( نماز سے ) اس حال میں فارغ ہوئے کہ آفتاب روشن ہو چکا تھا ، ( اتنی لمبی نماز پڑھائی کہ اس کے دوران ہی سورج گرہن ختم ہو گیا ، ) پھر آپ ﷺ نے لوگوں کو خطبہ دیا ، چنانچہ اللہ کی حمد و ثنا بیان کی ، پھر فرمایا :’’ یقیناً سورج اور چاند اللہ تعالیٰ کی نشانیوں میں سے دو نشانیاں ہیں ، نہ تو یہ کسی کی موت کی وجہ سے گہناتے ہیں اور نہ کسی کی زندگی کی وجہ سے ، لہٰذا جب تم اس ( گہن ) کو دیکھو تو اللہ سے دعا کرو ، اور اس کی کبریائی بیان کرو اور صدقہ خیرات کرو ۔‘‘ پھر فرمایا :’’ اے امتِ محمد ( ﷺ ) ! اللہ کی قسم ! اللہ تعالیٰ سے بڑھ کر کوئی بھی زیادہ غیرت والا نہیں ، ( خصوصاً اس معاملے میں ) کہ اس کا کوئی بندہ یا بندی زنا کا ارتکاب کرے ، اے محمد ﷺ کی امت ! اللہ کی قسم ! اگر تم بھی وہ کچھ جان لو جو میں جانتا ہوں ( میری طرح تمھیں بھی معرفت اور علم یقین حاصل ہو جائے ) تو تم ہنسو تھوڑا اور روؤ زیادہ ۔‘‘

اردو ترجمہ · Urdu

حضرت عبداللہ بن عباس رضی اللہ عنہ سے روایت ہے ، کہتے ہیں کہ رسول اللہ ﷺ کے زمانے میں سورج گہنا گیا تو رسول اللہ ﷺ نے نماز ادا کی اور لوگوں نے بھی آپ کے ہمراہ نماز پڑھی ، چنانچہ آپ ﷺ نے تقریباً سورۂ بقرہ ( کی تلاوت میں صرف ہونے والے وقت ) کے برابر لمبا قیام کیا ، پھر لمبا رکوع کیا ، پھر سر اٹھا کر لمبا قیام کیا جو پہلے قیام سے قدرے کم تھا ، پھر آپ نے لمبا رکوع کیا جو پہلے رکوع سے نسبتاً کم تھا ، پھر آپ نے ( کھڑے ہونے کے بعد ) سجدہ فرمایا ، پھر ( دوسری رکعت میں بھی ) لمبا قیام کیا جو ( سب سے ) پہلے ( یا اپنے سے پہلے ) قیام سے کچھ کم تھا ، پھر لمبا رکوع کیا جو ( سب سے ) پہلے ( یا متصل گزشتہ ) رکوع سے ذرا کم تھا ، پھر سر اٹھایا اور لمبا قیام کیا جو کہ ( سب سے ) پہلے ( یا اپنے سے پہلے یعنی تیسرے ) قیام سے کچھ چھوٹا تھا ، پھر لمبا رکوع کیا جو ( سب سے ) پہلے ( یا متصل پہلے ) رکوع سے ذرا مختصر تھا ، پھر سجدے میں چلے گئے ، پھر اس حال میں نماز سے فارغ ہوئے کہ آفتاب روشن ہو چکا تھا ، پھرفرمایا :’’ یقیناً شمس و قمر اللہ کی نشانیوں میں سے دو نشانیاں ہیں ، جو نہ کسی کی موت کی بنا پر گہن زدہ ہوتے ہیں اور نہ کسی کی زندگی کی وجہ سے ، لہٰذا جب تم اسے دیکھو تو اللہ کو یاد کیا کرو ۔‘‘ صحابہ کرام رضی اللہ عنہم نے عرض کیا کہ اے اللہ کے رسول ! ہم نے آپ کو ( حالتِ نماز میں ) اپنی اسی جگہ پر دیکھا تھا کہ ( جیسے ) آپ کوئی چیز پکڑنے لگے تھے ، پھر ہم نے آپ کو دیکھا کہ آپ ( اُلٹے پاؤں ) پیچھے ہٹ آئے تھے تو ( رسول اللہ ﷺ نے ) فرمایا :’’ بے شک میں نے جنت دیکھی تھی ( یا فرمایا کہ مجھے جنت دکھائی گئی تھی ) تو میں نے اس میں سے ( انگور وغیرہ کا ) ایک خوشہ پکڑنا چاہا تھا ، اور اگر میں اُسے پکڑ لیتا تو جب تک دُنیا باقی رہتی تم اُس سے کھاتے ہی رہتے ، اور ( پھر ) میں نے آگ دیکھی تھی ( جس وقت کہ پیچھے ہٹا تھا ) ، چنانچہ میں نے آج کی طرح کا کبھی بھی کوئی بھیانک ( ہولناک ، ہیبت ناک ، مکروہ اور گھبراہٹ آمیز ) منتظر نہیں دیکھا اور میں نے دیکھا کہ جہنم والوں میں عورتیں ( تعداد میں نسبتاً ) زیادہ ہیں ۔‘‘ لوگوں نے دریافت کیا کہ کس وجہ سے اے اللہ کے رسول ؟ آپ ﷺ نے فرمایا :’’ ان کے کفر کی وجہ سے ۔‘‘ پوچھا گیا کیا کہ وہ اللہ کا کفر کرتی ہیں ؟ فرمایا :’’ وہ خاوند ( کا کفر اور کفران نعمت یعنی اُس ) کی ناشکری کرتی ہیں ، اسی طرح احسان ( کا بھی کفر ، انکار اور اس ) کی ناشکری کرتی ہیں ، اگر تو اُن میں سے کسی پر سارا زمانہ ( یعنی زندگی بھر ) احسان کرتا رہے ، پھر وہ تجھ سے کوئی چیز دیکھ لے ( یعنی تیری طرف اُسے ناگواری ، ناراضی یا کوئی تکلیف و رنج پہنچ جائے ) تو وہ کہہ اٹھے گی کہ میں نے تو تجھ سے کبھی بھی کوئی بھی خیر نہیں دیکھی ۔ ( تیرے ہاں کبھی سکھ کا سانس تک نہیں آیا ۔ ) ‘‘

اردو ترجمہ · Urdu

سیدہ عائشہ زوجہ پیغمبر ﷺ سے روایت ہے کہ ایک یہودن عورت ان کے پاس آئی ، وہ ان سے کچھ مانگ رہی تھی ، ( اور مانگنے والوں کی عادت کے مطابق ) وہ کہنے لگی کہ اللہ تجھے قبر کے عذاب سے بچائے ۔ حضرت عائشہ رضی اللہ عنہا نے رسول اللہ ﷺ سے دریافت کیا کہ کیا لوگوں کو ان کی قبروں میں عذاب میں مبتلا کیا جائے گا ؟ تو رسول اللہ ﷺ نے فرمایا :’’ میں بھی اس ( عذاب قبر ) سے اللہ کی پناہ کا طالب ہوں ۔‘‘ پھر ( یوں ہوا کہ ) ایک ( دن ) صبح ( کے وقت ) آپ ﷺ سواری پر سوار ہوئے تو ( ادھر ) سورج گہن میں آ گیا ، آپ ﷺ چاشت ہی کے وقت واپس لوٹ آئے پھر ( امہات المومنین کے ) حجروں کے درمیان سے گزرے ، پھر ( مسجد میں آ کر ) کھڑے ہوئے اور نماز ادا کرنے لگے ، لوگ بھی آپ ﷺ کے پیچھے کھڑے ہو گئے ، چنانچہ آپ ﷺ نے لمبا قیام کیا ، پھر لمبا رکوع کیا ، پھر سر اٹھا کر لمبا قیام کیا جو پہلے قیام سے چھوٹا تھا ، پھر لمبا رکوع کیا جو پہلے رکوع سے کم تھا ، پھر سر اٹھایا ، پھر سجدے میں چلے گئے ، پھر ( دوسری رکعت میں بھی ) لمبا قیام کیا جو پہلے قیام سے کچھ کم تھا ، پھر لمبا رکوع کیا جو پہلے رکوع سے نسبتاً کم تھا ، پھر سر اٹھا کر لمبا قیام کیا جو پہلے قیام سے ذرا کم تھا ، پھر لمبا رکوع کیا جو پہلے رکوع سے قدرے کم تھا ، پھر سر اٹھایا ، پھر سجدے میں چلے گئے ، پھر ( سلام پھیر کر نماز سے ) فارغ ہوئے پھر جو کچھ اللہ نے چاہا آپ ﷺ نے ( خطبے میں ) ارشاد فرمایا ، پھر صحابہ کرام رضی اللہ عنہم کو حکم دیا کہ عذاب قبر سے پناہ مانگیں ۔