اردو ترجمہ · Urdu

صالح بن خوات رحمہ اللہ اس صحابی ( یعنی اپنے والد حضرت خوات بن جبیر ) رضی اللہ عنہ سے روایت کرتے ہیں جنھوں نے رسول اللہ ﷺ کے ساتھ غزوہ ذات الرقاع میں نمازِ خوف ادا کی تھی کہ ایک گروہ نے آپ ﷺ کے ساتھ صف بنا لی اور دوسرا گروہ دشمن کے سامنے صف آراء ہو گیا ، چنانچہ رسول اللہ ﷺ نے اس گروہ کو ایک رکعت پڑھائی جو آپ ﷺ کے ہمراہ تھا ، پھر آپ ( اگلی رکعت کے لیے خاموشی سے ) کھڑے رہے اور انھوں نے ( یعنی پہلے گروہ نے ) اپنی نماز خود ہی مکمل کر لی ، ( اور سلام پھیر دیا ) پھر وہ چلے گئے اور دشمن کے سامنے صف آراء ہو گئے اور دوسرا گروہ ( نبی کریم ﷺ کے پیچھے ) آ گیا ، چنانچہ آپ ﷺ نے ان کو وہ رکعت نماز پڑھائی جو آپ کی نماز میں سے باقی تھی ، ( اب چونکہ نبی کریم ﷺ کی نماز خوف دو رکعت مکمل ہو چکی تھی اس لیے ) پھر رسول اللہ ﷺ ( حالت تشہد میں ) بیٹھے رہے اور انھوں نے ( یعنی دوسرے گروہ نے جن کی ابھی ایک رکعت باقی تھی ) اپنی نماز خود مکمل کر لی ( اور جب وہ بھی تشہد پڑھ چکے تو ) پھر آپ ﷺ نے ان کے ساتھ ( مل کر ) سلام پھیر دیا ۔

اردو ترجمہ · Urdu

صالح بن خوات رحمہ اللہ سے روایت ہے کہ حضرت سہل بن ابی حثمہ رضی اللہ عنہ نے انھیں بیان کیا ( اور بتایا ) کہ نماز خوف کا طریقہ یہ ہے : امام کھڑا ہو جائے اور اس کے ساتھیوں کی ایک جماعت اس کے ساتھ ( نماز کے لیے کھڑی ) ہو جائے ، جبکہ دوسری جماعت دشمن کے سامنے ( موجود ) رہے ، پھر امام اپنے ساتھ والوں کو ایک رکعت پڑھائے اور سجدے کر کے کھڑا ہو جائے ، چنانچہ جب وہ سیدھا کھڑا ہو جائے تو پھر ( اسی حالت میں خاموشی سے ) کھڑا رہے اور وہ ( اس کے ساتھ والے مقتدی ) اپنے لیے ( خود ہی ) باقی ماندہ ایک رکعت ادا کر کے سلام پھیر دیں اور چلے جائیں اور ( لیکن ) امام ( مسلسل ) کھڑا ہی رہے ، پھر یہ ( جب ) ( پہلی جماعت والے ) دشمن کے سامنے ( صف آراء ) ہو جائیں ، تو دوسری جماعت والے ( مجاہدین ) آ جائیں جنھوں نے ( ابھی تک ) نماز نہیں پڑھی ، چنانچہ وہ امام کے پیچھے آ کر ( خود ہی ) تکبیر تحریمہ کہیں اور ( اب ) امام ان کو بھی ایک رکعت پڑھا کر سجدے کرے اور پھر ( چونکہ امام کی دو رکعتیں پوری ہو گئیں وہ تشُہد پڑھ کر اکیلا ہی ) سلام پھیر دے اور ( جبکہ ) وہ ( دوسرے گروہ والے بھی خود ہی بغیر امام کے ) کھڑے ہو کر اپنے لیے ( اپنی اپنی ) دوسری رکعت ادا کریں اور سلام پھیر دیں ۔

اردو ترجمہ · Urdu

نافع رحمہ اللہ سے روایت ہے کہ حضرت عبداللہ بن عمر رضی اللہ عنہ سے جب نماز خوف کے متعلق سوال کیا جاتا تو وہ فرماتے کہ امام لوگوں کے ایک گروہ کے ساتھ آگے ہو جائے ، ( دشمن سے اتنی دوری پر کہ وہاں تک ان کے تیر نہ پہنچ سکیں ) ، پھر امام ان کو ایک رکعت پڑھائے اور ان ( مجاہدین ) میں سے ایک ( دوسرا ) گروہ امام اور دشمن کے درمیان میں موجود رہے اور نماز نہ پڑھے ، پھر جب امام اپنے ساتھ والوں کو ایک رکعت پڑھا لے تو وہ ( دوسری رکعت پڑھے بغیر ) پیچھے ہٹ آئیں اور ان لوگوں کی جگہ کھڑے ہو جائیں جنھوں نے ( ابھی کچھ بھی ) نماز نہیں پڑھی اور وہ ( پہلے گروہ والے ) سلام نہ پھیریں ، ( بہرحال ) جنھوں نے نماز نہیں پڑھی ( اب ) وہ آگے ہو جائیں ( اور امام کے پیچھے صف بنا لیں ) ، پھر امام ان کو بھی ایک رکعت پڑھائے ، پھر امام تو ( سلام پھیر کر نماز سے ) فارغ ہو جائے اس حال میں کہ وہ ( اپنی ) دو رکعتیں پوری کر چکا ہو ، پھر دونوں گروہوں میں سے ہر گروہ والے ( باری باری ) کھڑے ہو جائیں اور امام کے فارغ ہو جانے کے بعد اپنی اپنی ایک ایک رکعت ادا کر لیں تو ( اس طرح ) دونوں گروہوں میں سے ہر کوئی دو دو رکعتیں پڑھ چکا ہو گا ، پھر اگر ( دشمن کا ) خوف اس سے بھی شدید تر ہو تو ( تمام ) لوگ ( الگ الگ ) نماز ادا کریں ، ( خواہ ) پیدل اپنے پاؤں پر کھڑے کھڑے ( یا چلتے ہوئے ) پڑھ لیں یا سوار ہو کر ( اشارے سے پڑھ لیں ) ، ( اور خواہ ) وہ قبلہ کی طرف رخ کرنے والے ہوں یا نہ ہوں ۔

اردو ترجمہ · Urdu

سعید بن مسیب رحمہ اللہ سے روایت ہے ، کہتے ہیں کہ رسول اللہ ﷺ نے جنگ خندق کے دن ظہر و عصر کی نماز نہ پڑھی یہاں تک کہ سورج غروب ہو گیا ۔