اردو ترجمہ · Urdu

سعید بن مسیب رحمہ اللہ سے روایت ہے ( جسے وہ دیگر کتب احادیث میں حضرت ابوہریرہ رضی اللہ عنہ سے بیان کرتے ہیں ) کہ بلاشبہ جب رسول اللہ ﷺ غزوۂ خیبر سے واپس لوٹے تو ( ایک رات ) چلتے ہی رہے ، حتیٰ کہ جب رات کے آخری حصے میں داخل ہوئے ( اور نیند غلبہ پانے لگی ) تو پڑاؤ ڈال دیا اور بلال رضی اللہ عنہ سے فرمایا :’’ ہمارے لیے صبح کی نماز کا خیال رکھنا ‘‘ اور ( پھر ) رسول اللہ ﷺ اور آپ کے صحابہ رضی اللہ عنہم سو گئے اور ( اِدھر ) حضرت بلال رضی اللہ عنہ اتنی دیر تک خیال رکھتے رہے ( اور جاگتے رہے ) جتنا اُن کے لیے ( اللہ کی جانب سے ) مقدر کیا گیا تھا ، پھر انھوں نے اپنی اونٹنی کے ساتھ ٹیک لگا لی اور فجر ( پوہ پھوٹنے کے مقام یعنی مشرق ) کی طرف منہ کر لیا لیکن اُن کی آنکھوں نے اُن پر غلبہ پا لیا ( اور وہ بھی سو گئے ) ، چنانچہ ( وقت پر ) نہ تو رسول اللہ ﷺ بیدار ہو سکے ، نہ بلال رضی اللہ عنہ اور نہ ہی قافلے کا کوئی اور فرد اُٹھ سکا ، یہاں تک کہ اُن پر دھوپ پڑنے لگی تو رسول اللہ ﷺ ( سب سے پہلے بیدار ہوئے اور ) چونک اٹھے ، پھر فرمایا :’’ اے بلال ! یہ کیا ( کر دیا ) ہے ؟‘‘ تو بلال رضی اللہ عنہ عرض کرنے لگے : اے اللہ کے رسول ! میری جان کو اسی ( اللہ ) نے ( نیند کے ذریعے ) پکڑ لیا تھا جس نے آپ کی جان کو پکڑے رکھا ۔ چنانچہ رسول اللہ ﷺ نے فرمایا :’’ ( یہاں سے ) کوچ کر جاؤ ( اور سواریوں کو ہانک لے چلو ) ‘‘ تو انھوں ( یعنی تمام صحابہ کرام رضی اللہ عنہم ) نے اپنی سواریوں کو اٹھایا اور تھوڑی دور تک چلایا ، پھر رسول اللہ ﷺ نے ( اذان کہلوائی ، وضو کیا ، دو سنتیں ادا فرمائیں ، پھر ) بلال رضی اللہ عنہ کو حکم دیا تو انھوں نے اقامت کہی ، پھر رسول اللہ ﷺ نے انھیں صبح کی نماز پڑھائی ، پھر جب نماز سے فارغ ہوئے تو فرمایا :’’ جو شخص بھی نماز کو بھول جائے تو جب اُسے وہ نماز یاد آئے تو ( فوراً ) اُسے ادا کر لے ، کیونکہ بے شک اللہ تعالیٰ اپنی کتاب میں فرماتے ہیں :’’ نماز کو میری یاد کے لیے قائم کیجیے ۔‘‘

اردو ترجمہ · Urdu

زید بن اسلم رحمہ اللہ سے روایت ہے ( اور وہ دیگر کتب حدیث کے مطابق حضرت عبداللہ بن مسعود رضی اللہ عنہ سے روایت کرتے ہیں ) کہ رسول اللہ ﷺ نے مکہ مکرمہ کے راستے پر ایک رات پڑاؤ ڈالا اور بلال رضی اللہ عنہ کی ذمہ داری لگائی کہ وہ آپ ﷺ کو نماز کے لیے جگائیں گے ، ( لیکن ہوا یوں کہ ) پھر بلال رضی اللہ عنہ بھی سو گئے اور وہ سب ( اہلِ قافلہ ) بھی سوئے رہے ، یہاں تک کہ جب وہ بیدار ہوئے تو سورج ان پر طلوع ہو چکا تھا ، چنانچہ لوگ اس حال میں نیند سے جاگے کہ وہ ( نماز قضا ہو جانے کی وجہ سے ) گھبرائے ہوئے تھے ، تو رسول اللہ ﷺ نے ان کو حکم دیا کہ سوار ہو جائیں ( اور چل پڑیں ) یہاں تک کہ اس وادی سے نکل جائیں اور فرمایا :’’ یقیناً یہ ایسی وادی ہے جس میں شیطان ہے ۔‘‘ چنانچہ لوگ سوار ہوئے یہاں تک کہ وہ اس وادی سے نکل گئے ، پھر رسول اللہ ﷺ نے انھیں حکم فرمایا کہ ( سواریوں سے ) اُتر پڑیں اور وضو کر لیں اور بلال رضی اللہ عنہ کو حکم فرمایا کہ وہ نماز کے لیے اذان دیں یا تکبیر ( اقامت ) کہنے کا حکم دیا ، چنانچہ رسول اللہ ﷺ نے لوگوں کو نماز پڑھائی ، پھر آپ ﷺ ( نماز سے فارغ ہو کر اپنا رُخ مبارک موڑتے ہوئے ) اُن کی طرف پھرے تو ان کی گھبراہٹ کو دیکھا ، پھر ( اُن کی تسلی کے لیے ) فرمایا :’’ اے لوگو ! بے شک اللہ نے ہماری روحوں کو قبض کر لیا تھا اور اگر وہ چاہتا تو اس وقت کے علاوہ کسی اور وقت میں بھی لوٹا سکتا تھا ، لہٰذا جب تم میں سے کوئی نماز سے سویا رہ جائے یا اُسے بھول جائے ، پھر اس کی طرف گھبرا کر اُٹھے تو اُسے چاہیے کہ اس نماز کو اسی طرح ہی پڑھے جس طرح کہ وقت میں پڑھا کرتا تھا ۔ پھر رسول اللہ ﷺ ابوبکر رضی اللہ عنہ کی طرف متوجہ ہوئے اور فرمایا :’’ یقیناً شیطان بلال رضی اللہ عنہ کے پاس آیا ، اس حال میں کہ وہ نماز میں کھڑے تھے ، پھر ( اُس نے نیند کا غلبہ ڈال کر ) انھیں لٹا دیا ، پھر مسلسل ان کو یوں تھپکیاں دیتا رہا جس طرح بچے کو تھپکایا جاتا ہے ، حتیٰ کہ وہ سو گئے ۔ ( ابوبکر رضی اللہ عنہ کو یہ حقیقت بتا کر پھر خود ) بلال رضی اللہ عنہ کو رسول اللہ ﷺ نے بلا لیا ، تو بلال رضی اللہ عنہ نے رسول اللہ ﷺ کو بالکل اسی طرح خبر سنائی جس طرح رسول اللہ ﷺ ابوبکر رضی اللہ عنہ کو خبر سنا چکے تھے ، تو ابوبکر رضی اللہ عنہ کہنے لگے : میں گواہی دیتا ہوں کہ بلاشبہ آپ ﷺ اللہ کے رسول ہیں ۔